Хуа ән саяһәт ширкитиниң муавин директори айтурсун елиниң лагерда өлгәнлики дәлилләнди

Мухбиримиз шөһрәт һошур
2019-06-18
Елхәт
Пикир
Share
Принт
Лагерда өлгәнлики дәлилләңән хуа ән саяһәт ширкитиниң муавин директори айтурсун ели.
Лагерда өлгәнлики дәлилләңән хуа ән саяһәт ширкитиниң муавин директори айтурсун ели.
Photo: RFA

Түнүгүн хәлқаралиқ уйғур кишилик һоқуқ вә демократийини илгири сүрүш җәмийитиниң тор бетидә уйғур аптоном районлуқ аяллар бирләшмисигә аит мәхпий материял икәнлики илгири сүрүлгән бир Авазлиқ сөһбәт Хатириси елан қилинди. Сөһбәт мәзкур бирләшминиң мәлум бир хадими билән қизи лагерда өлгән бир ана арисида давам қилған. Бу материялда қәшқәр хуа ән саяһәт ширкитиниң муавин директори вә саяһәт йетәкчиси 34 яшлиқ айтурсун елиниң лагерда өлгәнлики қәйт қилинған. Мухбиримизниң ениқлашлири давамида бу аваз хатирисиниң аяллар бирләшмисигә тәвә икәнлики айдиңлашмиған болсиму, айтурсунниң лагерда өлгәнлики дәлилләнди. Төвәндә мухбиримиз шөһрәт һошурниң бу һәқтә тәйярлиған программиси диққитиңларда болиду.

Һөрмәтлик радио аңлиғучилар, аптоном районлуқ аяллар бирләшмисигә аит мәхпий материял икәнлики илгири сүрүлгән мәзкур сөһбәт хатирисидә, айтурсун елиниң кимлики һәққидә мундақ мәлумат берилгән. Дейилишичә, қәшқәр хуа ән саяһәт ширкитиниң муавин директори, 34 яшлиқ айтурсун ели бултур 6 ‏-айниң 5‏-күни аталмиш тәрбийәләшкә елип кетилгән вә аридин 4 күн өткәндә, айтурсунниң җәсити аилисигә тапшурулған. Мәзкур торбәттики бу сөһбәт хатирисиниң мәнбәси һәққидики чүшәндүрүштә, бир муһаҗир уйғурниң үрүмчидики алақидар қаналлири арқилиқ мәзкур аваз хатирисини қолға чүшүргәнлики вә буни алақидар дөләт вә ахбарат органлириға йәткүзүп қоюш тилики билән вашингтонда паалийәт елип бериватқан дуня уйғур қурултийиниң сабиқ алий рәһбири рабийә қадир ханимға йәткүзгәнлики баян қилинған. . Биз бу сөһбәт хатирисиниң растинила аптоном районлуқ аяллар бирләшмисигә аит яки әмәсликини ениқлаш үчүн мәзкур органға телефон қилдуқ. Даириләр, бу һәқтә зиярәт қобул қилишни рәт қилғандин кейин, қәшқәр хуа ән саяһәт ширкитигә телефон қилдуқ. Ширкәт хадими, айтурсун елиниң вапат болуштин аввал бу ширкәттә ишлигәнликини дәлиллиди. Мәзкур хадим, айтурсунниң қачан вапат болғанлиқи һәққидики соалимизға ‹өткән йилниң мушу айлири' дәп җаваб бәрди. Биз йәнә муһаҗирәттики уйғурлар арисида ениқлаш елип бериш арқилиқ мәзкур сөһбәт хатирисиниң әсли толуқ нусхисиға ериштуқ. Буниңда айтурсунниң өлүм хәвириниң аилисигә уқтурулуш җәряни һәққидә мунулар қәйт қилинған. Мәлум болушичә, айтурсун лагерға әкитилип 4 күндин кейин икки нәпәр сақчи айтурсунниң аилисигә йетип кәлгән вә униң хизмәт орни вә саламәтлик әһвали һәққидә мәлумат сориған. Арқидин әгәр улар ғовға чиқармиса, дохтурханиға апирип қизини көрситидиғанлиқини ейтқан. Әмма униң җан үзүп болғанлиқини баян қилмиған. Айтурсунниң аниси патигүл ясин билән дадиси дадиси ели ғопур дохтурханиға кәлгәндә бир топ пуқрачә кийингән сақчиларниң қоршавида өзини көргән. 

Һөрмәтлик радио аңлиғучилар, юқирида 34 яшлиқ муавин директор айтурсун елиниң өлүми һәққидә аптоном районлуқ аяллар бирләшмисигә аит икәнлики илгири сүрүлгән бир аваз хатирисидә қәйт қилинғанлар вә қәшқәр хуа ән саяһәт ширкитиниң баянлирини диққитиңларға сундуқ.

Пикирләр (0)
Share
Толуқ бәт