London bilen biryussélda xitaygha qarshi chong namayish ötküzüldi

Ixtiyariy muxbirimiz erkin tarim
2020-10-02
Élxet
Pikir
Share
Print

En'gliyening london shehiridiki xitay elchixanisi bilen bélgiye paytexti biryusséldiki xitay elchixanisi aldida chong namayish ötküzüldi.

Dunya Uyghur qurultiyining chaqiriqi bilen 1-öktebir küni dunyaning herqaysi jayliridiki Uyghurlar köplep olturaqlashqan sheherlerde xitay xelq jumhuriyiti qurulghanliqining 71 yilliqi, shundaqla Uyghur élining kommunist xitay teripidin ishghal qilin'ghanliqining 71 yilliqi munasiwiti bilen xitaygha qarshi keng-kölemlik namayishlar ötküzülgen. Jümlidin en'gliyening london shehiridiki xitay elchixanisi bilen bélgiye paytexti biryusséldiki xitay elchixanisi aldidimu namayish ötküzüldi. Ikkila namayishqa Uyghurlardin sirt birqisim tibetler we mongghullar shuningdek xongkongluqlar we teywenliklermu ishtirak qilghan.

Londondiki namayish sa'et üchtin yettigiche ötküzülgen bolup, namayishqa londondiki Uyghurlardin bashqa yene libéral partiyesining wekili we kishilik hoquq organlirining wekilliri, shundaqla birqisim tibetlikler, xongkongluqlar, teywenlikler we jenubiy mongghuliyeliklermu qatnashqan.

Namayishta d u q ning londondiki ishxanisining mes'uli rehime mexmut xanim Uyghurlargha wakaliten nutuq sözlep, xitayning sherqiy türkistan xelqi üstidin élip bériwatqan "Irqiy qirghinchiliq" siyasitini qattiq eyibligen. Namayishchilar qollirida "Tibetlerge erkinlik, xongkongluqlargha erkinlik, xitay Uyghurlargha élip bériwatqan irqiy qirghinchiliqini toxtatsun, kishilik hoquq teshkilatliri közüngni ach" dégen lozunkilarni kötürgen halda xitay elchixanisi aldida 4 sa'et namayish qilghan. Rehime mexmut xanim neq meydandin ziyaritimizni qobul qilip namayish toghrisida melumat berdi.

En'gliye Uyghur jem'iyiti bashqurush hey'iti ezasi kérem zahir ependi londonda ikki yerde xitaygha qarshi namayish ötküzülgenlikini, elchixana aldidiki namayishqa 400 etrapida kishi ishtirak qilghanliqini bayan qildi.

10-Ayning 1-küni Uyghur, tibet we mongghullardin bolup 700 etrapida kishi bélgiye paytexti biryusséldiki xitay elchixanisining aldigha jem bolup xitayning 71 yildin buyan élip bériwatqan bésim siyasitige naraziliq bildürdi.

Bu qétimliq zor namayish biryussél waqti chüshtin kéyin sa'et 3 te "Sherqiy türkistan istiqlal marshi" bilen bashlan'ghan bolup, namayishqa biryussél we uning etrapidiki Uyghurlar, tibetler, mongghullar, xongkongluqlar, teywenlikler we démokrat xitaylarmu ishtirak qilghan. Bélgiye Uyghur jem'iyiti re'isi abdullam rano ependi ziyaritimizni qobul qilip, namayishning nahayiti yaxshi ötkenlikini bayan qildi.

U, namayishqa Uyghurlarning burunqigha qarighanda téximu aktipliq bilen qatnashqanliqini bayan qildi.

Biz mezkur namayishqa ishtirak qilghan Uyghurlar bilenmu téléfon söhbiti élip barduq. Ular hemme birdek xitayning sherqiy türkistanni bésiwalghanliqining 71 yilliqi munasiwiti bilen ötküzülgen namayishta xitayni qattiq eyibleydighanliqini, xitayni sherqiy türkistandin chiqip kétishke chaqirghanliqini tekitleshti.

Bélgiyening paytexti biryusséldiki yawropa parlaménti binasining aldida 2018-yili 4-ayning 27-künimu d u q 5000 kishi ishtirak qilghan namayish uyushturghanidi.

Toluq bet