Лопнур ядро синақ мәйданида йеңи тонел байқалған

Мухбиримиз мәмәтҗан җүмә
2021.08.01
Лопнур ядро синақ мәйданида йеңи тонел байқалған Хитайниң уйғур райониға җайлашқан лопнур ядро қораллирини синақ қилиш мәркизи.
Photo: RFA

NPR Радийосиниң сүний һәмраһ сүрәтлирини мисал қилип хәвәр қилишичә, хитайниң уйғур райониға җалашқан лопнур ядро қораллирини синақ қилиш мәркизини кеңәйтиватқанлиқи мәлум икән.

Хәвәргә қариғанда, хитай мәзкур ядро қораллирини синақ қилиш мәркизигә йеңи тонел қезишқа вә йеңи йоллар ясашқа башлиған болуши мумкин икән.

Хәвәрдә көрситишичә, хусусий җуғрапийәлик анализ ширкити-AllSource Analysis “йәршари” намилиқ санаәт сүний һәмраһширкити тәминлигән сүрәтләргә асасән бу һәқтики пәрәзләрни оттуриға қойған.

Хәвәрдә нәқил қилишичә, мәзкур анализ ширкитиниң анализ вә мәшғулат ишлириға мәсул муавин баш директори ренний бабарз: “бу илгири ядро синиқи паалийити үчүн пайдилинилған районлар билән туташтурулған йеңи қурулуштур,” дегән. Әмма у йәнә, бу тонелниң немигә ишлитилидиғанлиқиниң һазирчә ениқ әмәсликини қошумчә қилған.

Хитай 1997-йилидин башлап дунядики башқа асаслиқ ядро күчлиригә әгишип ядро синиқини вақтинчә тохтатқанлиқини елан қилған. У шундин кейин кәң көләмлик ядро синиқи елип бармиған болсиму, ядро қораллириниң ядросиз запчаслирини синақ қилишни давамлаштурған.

Мәлуматқа асасланғанда, хитай һәрбий даирилири 1964-йилдин 1997-йилғичә лопнурда 47 қетим атом синиқи елип барған. Бу синақ җәрянида тарим вадиси әтрапидики уйғурлар атом радиятсийәсиниң тәсиригә учрап өлүп кәткән яки һәр хил ғәйрий кесәлләргә гириптар болған.

Илгирики хәвәрләрдә хитайниң өткән йили баһарда уйғур районида мәхпий һалда ядро синиқи елип барған болуши мумкинлики илгири сүрүлгән иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.