Los anzhélistiki ot apitide Uyghurlargha ziyan-zexmet yetmidi
2025.01.10

Amérikidiki munasiwetlik taratqularning xewerliridin melum bolushiche, kaliforniye ishtatining los anzhélis (Los Angeles) shehiri teweside 7-yanwar bashlan'ghan ot apiti qattiq boran tesiride barghanche kéngiyishke bashlighan. 8-Yanwar kéchigiche los anzhélis shehiridiki ot apiti éghir bolghan töt rayondin 100 mingdin artuq ahale öyliridin köchürülgen, 300 mingdin artuq ahalining toki toxtighan.
N b s (NBC) ning 9-yanwar küni neq meydandin bérilgen xewiridin melum bolushiche, shu küni ot apiti téximu éghirlashqan. Los anzhélis saqchi idarisining tarqaqlashturush buyruqi bilen 9-yanwar küni 180 minggha yéqin ahale öz öyliridin köchürülüp, bixeter rayonlargha orunlashturulghan. Xewerde saqchi da'irilirining sözidin neqil élinip “Bezi rayonlar qarimaqqa ‛bomba tashlan'ghandek‚ haletke kelgen” déyilgen.
Los anzhélis shehirining kasta'ik (Castaic) rayonida olturushluq erkin sidiq ependining radiyomizgha bildürüshiche, 17 milyon ahalisi bolghan los anzhélis shehirining töt rayonida éghir ot apiti körülgen. Nöwette ot apiti eng éghir bolghan déngiz boyidiki malibu rayoni we édin rayoni qatarliq jaylarda öylerning köyüp kétishi éghir bolghan.
Erkin sidiq ependining bildürüshiche, los anzhélis shehirining ot apiti yüz bergen rayonlarda tarqaq halette olturaqlashqan Uyghurlar 100 etrapida bolup, öz'ara alaqiliship turush netijiside, Uyghurlarning hazirche ot apitige uchrimighanliqi, bir a'ililik Uyghurning tarqaqliship olturaqlashqanliqi melum bolghan.
Erkin sidiq ependining bildürüshiche, 7-yanwar bashlan'ghan ot apiti küchlük shamal tesiridin nahayiti tézlikte kéngeygen bolup, bezi rayonlarda otni öchürüsh mumkin bolmighan. Köp qisim jaylarda tok toxtighan bolup, ular yashawatqan kasta'ik rayonidimu tok toxtighan. Emma ot ketken rayon bilen ularning arisini tagh tosup turidighanliqi, shuningdek shamal yönilishi qarshi terepke urghini üchün bu rayonda is-tütek éghir emes iken.
Los anzhélis shehirining kasta'ik rayonida olturaqlashqan Uyghurlardin nurnisa qurban xanimning radiyomizgha bildürüshiche, u ishlewatqan toluq ottura mektep apet rayonida bolghini üchün shu jayliq ma'arip idarisining uqturushi bilen 8-yanwardin bashlap mektepte ders toxtighan.
Nurnisa xanimning éytishiche, hazirgha qeder özi tonuydighan Uyghurlardin birerining ot apitining ziyan-zexmitige uchrighanliqini anglimighan. Emma u mektipidiki bir neper oqutquchining öyi köyüp ketkenlikini, birqanche oqutquchining ot apiti seweblik tarqaqlashturulghanliqini bildürdi.
Xewerlerdin melum bolushiche, bu qétimqi ot apiti los anzhélis shehirining holliwod (Hollywood) kino sheherchisi jaylashqan tagh baghridiki orman bilen zich qaplan'ghan sayahet nuqtiliri we qimmet bahaliq olturaq öy rayonlirida yüz bergen. Nurghunlighan qimmet bahaliq olturaq öyler, chong dukanlar we birqanche mektep köyüp ketken.
Erkin sidiq ependining bildürüshiche, köyüp ketken olturaq öylerning köp qismi nechche milyon dollarliq öyler bolup, iqtisadiy ziyan éghir iken.
Yuqiriqi awaz ulinishidin tepsilatini anglaysiler.