Lukarno filim féstiwalida Uyghur we tibet mesilisi küntertipke élip kélindi

Filim féstiwalida shiwétsariye fédératsiye hökümet re'isi égnazzo kasisning aldigha chiqqan Uyghur, tibet naraziliq bildürgüchiler. 2024-Yili 12-awghust, lukarno

Bügün yeni 12-awghust küni, shiwéytsariyening lukarno shehiride bashlan'ghan xelq'ara filim féstiwalida d u q, merkizi gérmaniyediki Uyghur yashlar herikiti we shiwéytsariyediki tibet, Uyghur teshkilatliri birleshme pa'aliyet élip bérip Uyghur we tibet mesilisini küntertipke élip kelgen.

Lukarno filim féstiwali her yili bir qétim ötküzülidighan yawropadiki eng chong dunyawi féstiwal. Bu féstiwalda dunyaning her teripidin filimlirini körsitish üchün lokarnogha kelgen filim shirketliri, rézhissorlar we artislar qizil gilemde tamashibinlar bilen yüz körüshidighan bolup, bu yilqi féstiwali lukarnodiki 12 kinoxana we üsti ochuq tenterbiye saraylirida élip bérilidiken we shundaqla xitayning shiwéytsariyediki lobi teshkilati bolghan “Shiwéytsariye xitay soda uyushmisi” özining teshwiqat filimlirini qatnashturidiken.

Bu munasiwet bilen, merkizi shiwéytsariyening lukarnodiki “Lukarno kishilik hoquq fondi” ning orunlashturushi we d u q, shiwéytsariye Uyghur jem'iyiti, gérmaniyediki Uyghur yashlar herikiti teshkilati, shiwéytsariye tibet dostluq jem'iyiti we shiwéytsariyediki her qaysi kishilik hoquq teshkilatlirining birlikte élip bérishi bilen, 12-awghust küni lukarnoda “Uyghurlargha erkinlik”, “Tibetlerge erkinlik” dégen témida naraziliq pa'aliyetliri élip bérilghan.

RFA/Hebibulla Izchi

Bu heqte shiwéytsariye tibet dostluq jem'iyitidin bettina ekker xanim, tepsiliy melumat bérip ötti.

U mundaq dédi: “Bügün biz tibet dostluq jem'iyiti, lukarnodiki tibet jem'iyiti, Uyghur teshkilatliri birliship lukarno filim féstiwalida naraziliq pa'aliyiti élip barduq. Biz pa'aliyitimizni shiwéytsariye fédératsiye hökümitining pirézidénti kasis filim féstiwalining échilishigha kelgende bashliduq. Dunyaning her teripidin kelgen diplomatlar, siyasetchiler, sen'etkarlar we dangliq artislarning filim féstiwaligha kirishige ülgürüp élip barghanliqimiz üchün, ularning hemmisi bizni we qollirimizdiki pilakatlarni, sherqiy türkistan, tibet bayraqlirimizni kördi”.

Shiwéytsariyediki mezkur filim féstiwali munasiwiti bilen 12-awghustni shiwéytsariye hökümiti “Diplomatiye küni” dep békitken bolup, bu küni lukarnoda shiwéytsariyediki chet el elchiliri, diplomatlar we dunyaning her teripidin kelgen filim ishligüchiler, artislar we rézhissorlargha hökümet ziyapiti bérilgen.

RFA/Hebibulla Izchi

Bu diplomatiye künining asasliq meqsitining xitay bilen bolghan diplomatik munasiwet we xitay-shiwétsariye soda uyushmisining teshwiqatini qilish ikenlikini ilgiri sürgen dunya Uyghur qurultiyi yashlar komitéti re'isi erkin zunun radiyomizning ziyaritini qobul qilip, bu heqte tepsiliy melumat bérip: “Bizning meqsitimiz shiwéytsariyege özining kishilik hoquq qimmet qarishigha hörmet qilishni xatirilitish we xitaydek sherqiy türkistanda irqiy qirghinchiliq élip bériwatqan bir diktator dölet bilen erkin soda kélishimini imzalashning tarixiy xataliq ikenlikini bildürüsh” deydu.

Bu filim féstiwalidin burunla xitayning bu yerde özining teshwiqatini qilidighanliqidin xewer tapqan “Lukarno kishilik hoquq fondi” we “Shiwéytsariye Uyghur jem'iyiti” bu qétimqi pa'aliyetni nahayiti qisqa waqitta teshkillep royapqa chiqarghan bolup, 12-awghust shiwéytsariye fédératsiye hökümiti re'isi égnazo kassining aldigha sherqiy türkistanning ay yultuzluq bayriqini kötürüp chiqqan, shiwéytsariye Uyghur jem'iyiti re'isi rizwan'ay ilham “Xitaydek bir irqiy qirghinchiliq élip bériwatqan dölet bilen kélishim imzalash shiwéytsariyening qimmet qarishigha zit,” dep radiyomiz arqiliq bu heqtiki özining köz qarishini anglarmenler bilen ortaqlashti.

Bu pa'aliyette mexsus “Uyghurlargha erkinlik” , “Tibetke erkinlik” dégen xetler bésilghan mingdin jiq mayka bu féstiwalgha qatnashqili kelgen kishilerge tarqitilghan bolup, bezi kishiler Uyghurlar we tibetlerge medet bérip neq meydandila üstidiki könglikini chiqirip bu maykilarni kiyiship féstiwalgha qatnashqan. Tibet dostluq jem'iyitidin bettina ekker xanim yene bu heqtimu melumat bérip ötti.

RFA/Hebibulla Izchi

U sözide “Biz bügün bu yerde qilghan bu pa'aliyetlirimizning sherqiy türkistan, tibet we Uyghur xelqige azraq bolsimu yardimi bolsa, hökümet bizning bu naraziliqimizgha diqqet qilsa dégen ümmitimiz” deydu.

D u q yashlar komitéti re'isi erkin zununning bildürüshiche, bu féstiwalda 14-awghust küni xitay filim shirketlirimu bir qisim qizil filimlarni we atalmish gherbiy yurt teswirlen'gen teshwiqat filimlirini quyidighan bolup, bu munasiwet bu qétimqi birleshme naraziliq pa'aliyiti yene üch kün dawam qilidiken.