Уйғур академийиси уйғур вә чәтәллик тәтқиқатчилар үчүн академийә тор кутупханиси тәсис қилди

Ихтиярий мухбиримиз әркин тарим
2016-06-29
Елхәт
Пикир
Share
Принт
Уйғур академийә тор кутупханиси көрүнүши.
Уйғур академийә тор кутупханиси көрүнүши.
RFA/Erkin Tarim

Йеқинқи бир нәччә йилдин буян уйғур академийәси мол мәзмунлуқ һәрхил илмий паалийәтләрни җанландуруп вәтини ичи вә сиртидики илим сөйәр яшларниң мәниви байлиқини ашуруш үчүн хизмәт қилмақта.

Уйғур академийиси йеқинда уйғур вә чәтәллик тәтқиқатчилар үчүн академийә тор кутупханиси тәсис қилди. Уйғур академийиси рәиси абдулһәмид қарахан әпәндиниң ейтишичә, йеңи ечилған академийә тор кутупханисида нөвәттә 1000 дин артуқ уйғурчә, түркчә вә инглизчә елкитаб вә мақалә бар болуп, бу кутупхана давамлиқ толуқланмақта икән.

Бу һәқтә зияритимизни қобул қилған абдулһәмид қарахан әпәнди алди билән уйғур академийисиниң қиливатқан муһим хизмәтлири тоғрисида қисқичә мәлумат берип өтүшни халайдиғанлиқини баян қилип мундақ деди: «уйғур академийиси қурулғандин буян һазирғичә нурғун маддий вә мәниви қийинчилиқларға йолуққан болсиму, һәр қетимлиқ илмий муһакимә йиғин вә паалийәтләрни техиму пиланлиқ, сүпәтлик вә тәртиплик елип беришқа тиришти. Бу хил илмий паалийәтләр нәтиҗисидә дуняниң һәрқайси җайлиридин кәлгән, илим йолида җапалиқ издиниватқан уйғур зиялийлири вә уйғур оқуғучилар бир-бири билән учришиш вә пикир алмаштуруш пурситигә игә болди. Қатнашқан уйғур зиялийлири сунған илмий тәтқиқат нәтиҗилири вәтән ичи, сиртидики яшларға тарқитилди. Уйғур академийәси һәр йили маддий қийинчилиқи бар, тиришчан вә әла нәтиҗилик 10 нәпәр уйғур магистир вә доктор оқуғучисиниң оқушини хатирҗәм давам қилалиши вә милләткә ярамлиқ болуп йетишип чиқиши үчүн тәвпиқ оқуш мукапати тәсис қилип, оқушта әлачи вә миллитини сөйидиған оқуғучиларни маддий ярдәм билән тәминлиди.»

Уйғур академийә рәиси абдулһәмид қарахан әпәнди мәзкур академийәниң йеқинда уйғур вә чәтәллик тәтқиқатчилар үчүн академийә тор кутупханиси тәсис қилиштики мәқсити һәққидә тохтилип мундақ деди: «йеқинқи йиллардин буян вәтән ичи-сиртидики пидакар яшлар муһим китаб вә мақалиләрни тор бәтләрдә һәмбәһирлинип келиватқан болсиму, мақалә вә китабларниң даим өчүрүлүп яки тор бәтниң тақилип қелиши сәвәблик издимәкчи болған әсәрләргә еришәлмәсликтәк қийинчилиқ бар иди. Униң үстигә һәр кәсиптики уйғур зиялийлар вә тәтқиқатчилар үчүн қиммәтлик материял мәнбәси болалайдиған, башқа һәрхил тилларда елан қилинған уйғурларға мунасивәтлик тәтқиқат нәтиҗилири, китаб вә илмий мақалиләргә еришиштә университетларниң санлиқ мәлумат амбириға сирттин кирәлмәслик сәвәбидин бәзи тосалғулар бар иди. Уйғур акадимийәси бу җәһәтләрдики бошлуқни толдуруп, һәр саһәдики илим издигүчи яшлиримизниң мәниви еһтияҗини қамдаш, уйғурларға мунасивәтлик тәтқиқат мақалилири, китаб журналларни топлап академийә тор кутупханисида елан қилишни башлиди.»

У йеңи ечилған академийә тор кутупханисида нөвәттә 1000 дин артуқ уйғурчә, түркчә вә инглизчә китабниң қоюлуп болғанлиқини, уйғур оқурмәнләрни буларни ортақлишишқа чақирип мундақ деди: «йеңи ечилған академийә тор кутупханисида нөвәттә 1000 дин артуқ уйғурчә, түркчә вә инглизчә елкитаб вә мақалә бар болуп, кутупхана давамлиқ толуқланмақта. Уйғур академийиси вәтән ичи вә сиртидики уйғурларниң мәниви еһтияҗини қандуруш, уйғурларниң миллий вә тарихи кимликини күчләндүрүп, милләтниң аң сапасини юқири көтүрүш үчүн һәммәйләнниң ортақ күч чиқирип, уйғурларға мунасивәтлик китаб, мақалә вә илмий тәтқиқат нәтиҗилирини академийә тор кутупханисида уйғурлар билән ортақлишишқа чақириду.»

Уйғур зиялийси абдувәли аюп әпәнди уйғур академийисиниң бундақ бир тор кутупханиси тәсис қилғанлиқиниң уйғур чәтәлдики оқурмәнләр үчүн қилинған зор хизмәт икәнликини баян қилди.

Улар уйғур зиялийларниң өз қолида бар болған уйғурларға мунасивәтлик һәрхил тилдики елкитаб вә мақалиләрни елхәт адреси арқилиқ әвәтип беришини үмид қилиду. Уйғур академийәси тор кутупханисини зиярәт қилиш, мақалә, китаблардин пайдилиниш үчүн www.akademiye.org ‹http://www.akademiye.org' академийә орган тор бетидики издәш рамкисиниң астидики мунасивәтлик улиниш-«академийә тор кутупханиси» арқилиқ киргили вә уйғурларға мунасивәтлик пүтүн елкитаб вә мақалиләрни чүшүргили болиду.

Уйғур академийиси 2009-йили 9-айда истанбулда қурулғандин илмий җәмийәт болуп, һазирғичә 7 қетим уйғур пән тәтқиқатчи, әдиб вә мутәхәссисләр учришишида һәрхил темиларда илмий муһакимә йиғини, 6 қетим уйғур магистир, доктор оқуғучилар илмий муһакимә йиғини вә 6 қетим уйғур ана тил илмий муһакимә йиғини уюштурди. Униңдин башқа тарихи шәхсләрни хатириләш үчүн уйғур мутәпәккурларни хатириләш илмий муһакимә йиғини вә һәрхил муназирә вә лексийә паалийәтлирини орунлаштуруп кәлмәктә. Бәзи уйғур зиялийлириниң ейтишичә, бу паалийәтләр йилдин-йилға техиму мол мәзмунлуқ болуп, кәспийлишишкә қарап йүзләнмәктә вә илғар пикирләр оттуриға қоюлуп, уйғур яшлириниң вәтән вә милләт үчүн хизмәт қилишида түрткилик рол ойнимақта вә уларға наһайити чоң илһам болмақта икән.

Пикирләр (0)
Share
Толуқ бәт