Uyghur akadémiyisi Uyghur we chet'ellik tetqiqatchilar üchün akadémiye tor kutupxanisi tesis qildi

Ixtiyariy muxbirimiz erkin tarim
2016-06-29
Élxet
Pikir
Share
Print
Uyghur akadémiye tor kutupxanisi körünüshi.
Uyghur akadémiye tor kutupxanisi körünüshi.
RFA/Erkin Tarim

Yéqinqi bir nechche yildin buyan Uyghur akadémiyesi mol mezmunluq herxil ilmiy pa'aliyetlerni janlandurup wetini ichi we sirtidiki ilim söyer yashlarning meniwi bayliqini ashurush üchün xizmet qilmaqta.

Uyghur akadémiyisi yéqinda Uyghur we chet'ellik tetqiqatchilar üchün akadémiye tor kutupxanisi tesis qildi. Uyghur akadémiyisi re'isi abdulhemid qaraxan ependining éytishiche, yéngi échilghan akadémiye tor kutupxanisida nöwette 1000 din artuq Uyghurche, türkche we in'glizche élkitab we maqale bar bolup, bu kutupxana dawamliq toluqlanmaqta iken.

Bu heqte ziyaritimizni qobul qilghan abdulhemid qaraxan ependi aldi bilen Uyghur akadémiyisining qiliwatqan muhim xizmetliri toghrisida qisqiche melumat bérip ötüshni xalaydighanliqini bayan qilip mundaq dédi: "Uyghur akadémiyisi qurulghandin buyan hazirghiche nurghun maddiy we meniwi qiyinchiliqlargha yoluqqan bolsimu, her qétimliq ilmiy muhakime yighin we pa'aliyetlerni téximu pilanliq, süpetlik we tertiplik élip bérishqa tirishti. Bu xil ilmiy pa'aliyetler netijiside dunyaning herqaysi jayliridin kelgen, ilim yolida japaliq izdiniwatqan Uyghur ziyaliyliri we Uyghur oqughuchilar bir-biri bilen uchrishish we pikir almashturush pursitige ige boldi. Qatnashqan Uyghur ziyaliyliri sun'ghan ilmiy tetqiqat netijiliri weten ichi, sirtidiki yashlargha tarqitildi. Uyghur akadémiyesi her yili maddiy qiyinchiliqi bar, tirishchan we ela netijilik 10 neper Uyghur magistir we doktor oqughuchisining oqushini xatirjem dawam qilalishi we milletke yaramliq bolup yétiship chiqishi üchün tewpiq oqush mukapati tesis qilip, oqushta elachi we millitini söyidighan oqughuchilarni maddiy yardem bilen teminlidi."

Uyghur akadémiye re'isi abdulhemid qaraxan ependi mezkur akadémiyening yéqinda Uyghur we chet'ellik tetqiqatchilar üchün akadémiye tor kutupxanisi tesis qilishtiki meqsiti heqqide toxtilip mundaq dédi: "Yéqinqi yillardin buyan weten ichi-sirtidiki pidakar yashlar muhim kitab we maqalilerni tor betlerde hembehirlinip kéliwatqan bolsimu, maqale we kitablarning da'im öchürülüp yaki tor betning taqilip qélishi seweblik izdimekchi bolghan eserlerge érishelmesliktek qiyinchiliq bar idi. Uning üstige her kesiptiki Uyghur ziyaliylar we tetqiqatchilar üchün qimmetlik matériyal menbesi bolalaydighan, bashqa herxil tillarda élan qilin'ghan Uyghurlargha munasiwetlik tetqiqat netijiliri, kitab we ilmiy maqalilerge érishishte uniwérsitétlarning sanliq melumat ambirigha sirttin kirelmeslik sewebidin bezi tosalghular bar idi. Uyghur akadimiyesi bu jehetlerdiki boshluqni toldurup, her sahediki ilim izdigüchi yashlirimizning meniwi éhtiyajini qamdash, Uyghurlargha munasiwetlik tetqiqat maqaliliri, kitab zhurnallarni toplap akadémiye tor kutupxanisida élan qilishni bashlidi."

U yéngi échilghan akadémiye tor kutupxanisida nöwette 1000 din artuq Uyghurche, türkche we in'glizche kitabning qoyulup bolghanliqini, Uyghur oqurmenlerni bularni ortaqlishishqa chaqirip mundaq dédi: "Yéngi échilghan akadémiye tor kutupxanisida nöwette 1000 din artuq Uyghurche, türkche we in'glizche élkitab we maqale bar bolup, kutupxana dawamliq toluqlanmaqta. Uyghur akadémiyisi weten ichi we sirtidiki Uyghurlarning meniwi éhtiyajini qandurush, Uyghurlarning milliy we tarixi kimlikini küchlendürüp, milletning ang sapasini yuqiri kötürüsh üchün hemmeylenning ortaq küch chiqirip, Uyghurlargha munasiwetlik kitab, maqale we ilmiy tetqiqat netijilirini akadémiye tor kutupxanisida Uyghurlar bilen ortaqlishishqa chaqiridu."

Uyghur ziyaliysi abduweli ayup ependi Uyghur akadémiyisining bundaq bir tor kutupxanisi tesis qilghanliqining Uyghur chet'eldiki oqurmenler üchün qilin'ghan zor xizmet ikenlikini bayan qildi.

Ular Uyghur ziyaliylarning öz qolida bar bolghan Uyghurlargha munasiwetlik herxil tildiki élkitab we maqalilerni élxet adrési arqiliq ewetip bérishini ümid qilidu. Uyghur akadémiyesi tor kutupxanisini ziyaret qilish, maqale, kitablardin paydilinish üchün www.akademiye.org 'http://www.akademiye.org' akadémiye organ tor bétidiki izdesh ramkisining astidiki munasiwetlik ulinish-"Akadémiye tor kutupxanisi" arqiliq kirgili we Uyghurlargha munasiwetlik pütün élkitab we maqalilerni chüshürgili bolidu.

Uyghur akadémiyisi 2009-yili 9-ayda istanbulda qurulghandin ilmiy jem'iyet bolup, hazirghiche 7 qétim Uyghur pen tetqiqatchi, edib we mutexessisler uchrishishida herxil témilarda ilmiy muhakime yighini, 6 qétim Uyghur magistir, doktor oqughuchilar ilmiy muhakime yighini we 6 qétim Uyghur ana til ilmiy muhakime yighini uyushturdi. Uningdin bashqa tarixi shexslerni xatirilesh üchün Uyghur mutepekkurlarni xatirilesh ilmiy muhakime yighini we herxil munazire we léksiye pa'aliyetlirini orunlashturup kelmekte. Bezi Uyghur ziyaliylirining éytishiche, bu pa'aliyetler yildin-yilgha téximu mol mezmunluq bolup, kespiylishishke qarap yüzlenmekte we ilghar pikirler otturigha qoyulup, Uyghur yashlirining weten we millet üchün xizmet qilishida türtkilik rol oynimaqta we ulargha nahayiti chong ilham bolmaqta iken.

Toluq bet