Almatadiki Uyghur gimnaziyiside ana til küni xatirilendi

Ixtiyariy muxbirimiz oyghan
2015-02-25
Share
qazaqistan-almata-uyghur-ana-til-mektep.jpg Almatadiki Uyghur gimnaziyiside ana til künini xatirlesh pa'aliyitidin bir körünüsh
RFA/Oyghan


Melumki, 1999 - yilning 17 - noyabir küni bilim, pen we medeniyet mesililiri boyiche birleshken döletler teshkilatining bash ilmiy muhakime yighini xelq'ara ana til künini jakarlighan bolup, 2000 - yildin buyan her yili 21 - féwralda til bayrimi dawam qilmaqta.

Uning bash meqsiti yoqap kétiwatqan tillarni saqlap qélish we ularni rawajlandurush, tilgha bolghan hörmetni ashurushtin ibaret. Shu munasiwet bilen 21 - féwral küni almata shehirining dostluq mehellisige orunlashqan abdulla rozibaqiyéf namidiki 153 - mektep - gimnaziyede xelq'ara ana til künige béghishlan'ghan bayramliq murasim bolup ötti. Uninggha gimnaziye oqughuchiliri we mu'ellimliri, shundaqla ziyaliylar, jem'iyetlik birleshmiler wekilliri, ata - anilar qatnashti. Murasimni gimnaziyening "Shox yigitler" topi sha'ir we yazghuchi mesümjan zulpiqarofning sözige, kompozitor ismayiljan isayéfning muzikisigha yézilghan "Ana til" naxshisi bilen achti.

Murasimni bashqurghan til we edebiyat penining mu'ellimi zulfiye abdullayéwa doklat qilghandin kéyin, oqughuchilar sha'irlardin abduméjit döletof, mahmut abduraxmanof, dolqun yasin, iliya bextiya, ilaxun hoshurof we bashqilarning ana til heqqidiki shé'irlirini oqudi. Uningda shundaqla her xil edebiyat musabiqilirining ghalibliri atalghan oqughuchilar we mu'ellimler özliri yazghan shé'irlirini oqudi, pexriy yarliqlar bilen teqdirlendi.

Sözge chiqqan qazaqistan Uyghurlirining jumhuriyetlik étno - medeniyet merkizining re'isi shahimerdan nurumof, qazaqistan yazghuchilar ittipaqi yénidiki Uyghur edebiyati kéngishining bashliqi, yazghuchi exmetjan hashirof, gimnaziye mudiri shawket ömerof we bashqilar ana tilning Uyghurlar hayatida tutqan orni, ana tilida oqushning ehmiyiti, milliy qedriyetler heqqide öz pikirlirini bildürüp, mezkur murasimni uyushturghuchilargha özlirining cheksiz minnetdarliqini izhar qildi.

Murasim dawamida gimnaziyening yash naxshichiliri we ussulchiliri teyyarlighan konsért programmisi körsitildi.

Radiyomiz ziyaritini qobul qilghan jughrapiye penlirining doktori, proféssor shéripjan nadirof bu heqte öz qarashlirini bildürdi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet