Almatada Uyghur edebiyati we sen'iti heqqidiki tetqiqatlar tonushturuldi

13-Aprélda almatadiki yazghuchilar öyide qazaqistan yazghuchilar ittipaqi terkibidiki Uyghur edebiyati kéngishining uyushturushi we qazaqistan Uyghurlirining jumhuriyetlik étnomedeniyet merkizi hem sheherlik Uyghur medeniyet merkizining qollap­quwwetlishi bilen qazaqistan bilim we pen ministirliqi muxter ewézof namidiki edebiyat we sen'et instituti neshr qilghan “Qazaqistan xelqlirining zamaniwi edebiyati”, “Qazaqistan xelqlirining muzika sen'iti”, “Qazaqistan xelqlirining sehne sen'iti”, “Hazirqi edebiyattiki omumiy insaniy qedriyetler”, “Qazaqistan xelqi edebiyati” namliq kitablarni tonushturush murasimi bolup ötti. Uyghur edebiyati kéngishining bashliqi, tonulghan yazghuchi we dramatorg exmetjan hashirof murasim échilishida söz qilip, edebiyat we sen'et instituti xadimlirini, jumhuriyetlik we sheherlik medeniyet merkizi wekillirini, shundaqla qazaq we Uyghur sha'ir-yazghuchilirini tonushturdi.

Aldi bilen sözge chiqqan qazaqistan Uyghurlirining jumhuriyetlik étnomedeniyet merkizi re'isi, qazaqistan xelqi assambléyisi kéngishining ezasi shahimerdan nurumof qazaq xanliqining 550 yilliqi, qazaqistan xelqi assambléyisining 20 yilliqi, sowét-gérman urushidiki ulugh ghalibiyetning 70 yilliqi munasiwiti bilen yighin qatnashquchilirini tebriklep, qazaqistandiki milliy siyaset, 2050 dölet istratégiyisining tüp meqsiti we ehmiyiti heqqide öz pikirlirini ilgiri sürdi. Muxter ewézof namidiki edebiyat we sen'et institutining mudiri, filologiye penlirining doktori welixan qalijan Uyghur we qazaq xelqlirining türk dunyasida tutqan ornigha, bolupmu köp esirlik tarixqa ige Uyghur medeniyitining, Uyghur edebiyatining dunya medeniyitige qoshqan töhpisige yuqiri bahasini berdi. U shundaqla meyli qazaqistandiki bolsun, meyli Uyghur élidiki bolsun, zamaniwi Uyghur edebiyatining bügünki künde her jehettin tetqiq qilinishqa layiq ikenlikini, kélechekte buning emelge ashurulushigha özining küch chiqiridighanliqini tekitlep, mezkur murasimni uyushturghuchilargha cheksiz minnetdarliqini izhar qildi. Murasimda söz alghan mezkur institut alimliridin pen doktorliri güljahan orda, gülmira musaghulowa, amantay axétof, alimjan hemrayéf, shundaqla qazaq sha'irliridin shömüshbay saghiyéf, da'ulétbék baytursinof, rusiyelik Uyghur sha'iri wilyam sadiqof, elfarabi namidiki qazaq dölet uniwérsitéti sherqshunasliq fakultétining proféssori roshen'gül awakowa, sen'etshunasliq penlirining namzati gülnara sayitowa we bashqilar Uyghur ediblirining qazaqistan xelqliri edebiyatining tereqqiyatigha qoshuwatqan töhpisini, uning mezmun we shekil jehettin téximu béyiwatqanliqini alahide tekitlidi.

Murasimda jumhuriyetlik we sheherlik medeniyet merkizi namidin, shundaqla yazghuchi we dramatorg shayim shawayéf a'ilisi namidin qazaq alimlirigha, shundaqla yazghuchi exmetjan hashirof we filologiye penlirining doktori alimjan hemrayéflargha soghilar teqdim qilindi.

Radi'omiz ziyaritini qobul qilghan qazaq sha'iri we terjimani da'ulétbék baytursinof mezkur murasim heqqide öz qarashlirini otturigha qoydi.