Xeyri-saxawatchiler bishkekte Uyghur ana til mektipi qurush teshebbusini qollidi

Qurban héyt munasiwiti bilen 9-ayning 24-küni qirghizistanning bishkek shehéride xeyri-saxawet pa'aliyiti uyushturulup, Uyghur jama'iti arisidiki turmushida qiyinchiliqi bolghan, qurbanliq qilish imkaniyiti bolmighan 400 a'ilige qurbanliq gösh tarqitildi. Gérmaniyedin kelgen xeyri-saxawatchiler bishkektiki Uyghurlarning Uyghur ana til mektipi qurush teshebbusini qollap-quwetleydighanliqini bildürdi.

Bu yil qurban héyt harpisida gérmaniyediki “Sherqi türkistan uchur merkizi”ning rehbiri abdujélil qaraqash ependining teshebbusi we uyushturushi bilen, gérmaniyediki türk qérindashlar teripidin qirghizistandiki Uyghurlargha iqtisadi yardem bérilgen hemde bu yardem qirghizistan'gha yétip kelgendin kéyin “Ittipaq” jem'iyitining sabiq re'isi dilmurat ekber, “Alamidin” meschitining imami mirza hajim qatarliqlar yashlarni teshkillep 100 dane qurbanliq qoy teyyarlighan idi.

24-Séntebir küni qurban héyt namizidin kéyin, bishkek shehiridiki Uyghur jama'itining wekilliri, aqsaqallar hemde her qaysi mehellilerning yigit bashliri “Libidinowka” mehellisige jem bolup, gérmaniyedin kelgen türk qérindashlarning wekili rejep atesh ependining qatnishishida teyyarlan'ghan qurbanliq qoylarni soyup, turmushida éghir qiyinchiliqi barlar, miyiplar hemde yashan'ghanlargha tarqitip bérildi.

Qurbanliq soyush pa'aliyiti jama'etning kolléktip tekbiri bilen bashlandi.

Bu qétimqi pa'aliyetning uyushturghuchiliridin biri bolghan “Alamidin”meschitning imami mirza hajim mundaq dédi: “Allah ta'alla bu qétimqi xeyri-ihsan pa'aliyitining teshebbuschisi bolghan abdujélil qaraqash ependining qirghizistan Uyghurlirigha qilghan yardemlirini qobul qilsun. Xeyri-éhsan sahiplirigha alla ta'alla öz dergahidin sawap-ejirler eylisun”.

“Ittipaq”jem'iyitining sabiq re'isi dilmurat ekber nöwette qirghizistan Uyghurliri duch kéliwatqan qiyinchiliqlar heqqide toxtilip munularni bildürdi: “Qirghizistanda yash ewladlirimiz öz ana tilini untup qéliwatidu. Eger imkaniyet bolsa, gérmaniyediki türk qérindashlirimiz bizning qirghizistanda bir Uyghur tilidiki mektep yaki Uyghur medeniyet merkizi quruwilishimizgha yardem bergen bolsa.”

Gérmaniyedin kelgen rejep atesh ependi pa'aliyet dawamida söz qilip,“Sherqi türkistan uchur merkizi”ning rehbiri abdujélil qaraqash ependining qirghizistan Uyghurlirigha öz ana tilidiki mektep qurup bérish teshebbusining türk qérindashlarning qollishigha érishkenlikini bildürüp mundaq dédi: “Gérmaniyediki türk teshkilatlirining qirghizistan Uyghurlirigha bolghan yardimi buningdin kéyinmu dawamlishidu. Biz abdujélil ependining qirghizistan Uyghurlirigha Uyghur tilidiki mektep qurup bérish teshebbusini qollaymiz. Allah xalisa, yéqin kelgüside qirghizistanda Uyghur tilidiki bir mektep qurulghusi.”