Gollandiyediki Uyghur qiz ösmürliri öz medeniyitini ögendi

Gollandiyediki “Yawropa sherqiy türkistan ma'arip jem'iyiti” gollandiyede yashawatqan Uyghur qiz ösmürlerge 3 künlük mexsus kamp pa'aliyiti orunlashturup bergen bolup, mezkur pa'aliyette ösmür qizlar teshkillik halda qur'an oqush, ana til-yéziqidin sawat chiqirish, jama'etliship namaz oqush we ghizalinish arqiliq milliy we diniy örp-adetlirini ögen'gen.

Pa'aliyet teshkilligüchi orun“Yawropa sherqiy türkistan ma'arip jem'iyiti”ning mes'uli isa qarihajimdin igilishimizche: mezkur pa'aliyet 2015‏-yili 31‏-dékabirdin 2016‏-yili 2‏-yanwarghiche 3 kün dawam qilghan bolup, pa'aliyetke ishtirak qilghan qizlar bu pa'aliyetning untulghusiz bir xushalliq ichide ötkenlikini bildürgen. Isa qarihajimning éytishiche bu pa'aliyet arqiliq gollandiyede yashawatqan qiz ösmürlernimu öz-ara uchrashturup, yillardin béri dawam qilip kéliwatqan hepte axiri ikki künlük kurslarda terbiyilinishke yéteklesh meqset qilin'ghan iken.

Isa qarihajimning bildürüshiche telim-terbiyege alaqidar herqandaq ösmürdin, burunqidekla héchqandaq heq élinmaydiken.

U yene milliy we diniy telim-terbiyening perzentlerning istiqbali üchün tosalghu emes belki, muhim bir roli barliqini؛ hepte axiri ikki künlük kursta öz-ara gollandiye ma'aripidiki derslerde hemkarlishish usuli arqiliq, balilarning téximu yüksek netije bilen oquyalishigha türtke boluwatqanliqini ilgiri sürdi. U yene hazirqi we kelgüsidiki pilanlar heqqidimu uchur bérish bilen birge, telim-terbiyening ehmiyiti we qimmitini bayan qildi.

Mezkur pa'aliyetke ishtirak qilghan qizlarmu ziyaritimizni qobul qilip, bu pa'aliyette köp nersilerni ögen'genlikini we köngüllük untulghusiz bir waqit kechürgenlikini bayan qildi.

Pa'aliyetke perzenti bilen birge kélip yardemde bolghan güzelnur xanim özining hés-tuyghulirini radi'o anglighuchilirimiz bilen ortaqlashti.

Mezkur jem'iyet 2013‏-yili 1‏-yanwardin bashlap hazir ishlitiwatqan gollandiyening zeyst shehiridiki merkizi ornini muqimlashturghandin béri, her heptining axiri shenbe we yekshenbe ikki künlük “Ana til we medeniyet” kursini tesis qilip, telim-terbiye ishlirini jari qildurup kéliwatqan idi. Uningda türlük shara'itlarning teqezzasidin oghullar asas qilghan idi. Mana emdi, bezi shertlerning hazirlinishi bilen qiz ösmürlergimu mexsus orun belgilesh aldida turmaqta iken.