Уйғур мәктәплиридики тән җазаси вә ата - аниларниң әндишиси (1)

Ихтиярий мухбиримиз әзиз
2016-03-25
Share
mektep-balilarni-urush.jpg Мәктәпләрдики балиларни уруш һадисиси
Photo: RFA

Иҗтимаий таратқулар арқилиқ уйғурлар җәмийитигә мәлум болуватқан, шундақла көп қисим ата - аниларни биарам қиливатқан реал мәсилиләрниң бири һәрқайси мәктәпләрдики дәрсханиларда көзгә челиқидиған оқуғучиларни уруш вә уларға тән җазаси бериш мәсилисидур. Зияритимиз җәрянида алақидар органлар вә ата - анилар бу әһвалларниң мәвҗутлуқини, шундақла өзлириниң бу һәқтики әндишилирини ипадилиди.

Йеқинда фейсбок қатарлиқ иҗтимаий таратқуларда үрүмчидики мәлум оттура мәктәпниң дәрсханисида бир уйғур оқутқучиниң бирнәччә оқуғучини қатар турғузуп қоюп, қолидики сүпүргә билән оқуғучиларни тапшуруқ ишлимәсликтә әйибләп бир баштин уруп чиққанлиқи һәққидики видио тарқалған. Арқа рәттики оқуғучилар бу көрүнүшләрни башқиларға билиндүрмәй телефон арқилиқ видиоға еливалғанлиқтин, алди рәттә олтурған оқуғучиларниң мәктәп формисидики мәктәп нами бу ишниң қәйәрдә болғанлиқидин мәлумат бериду.

Уйғур мәктәплиридики оқуғучиларға қаритилған тән җазасиға даир әһвалларни игиләп беқиш үчүн мәркизий шәһәр үрүмчидики маарип системиси билән алақилишиш җәрянида үрүмчи шәһәрлик 3 - оттура мәктәп оқуғучилириниң өткән йили үрүмчи шәһириниң башлиқи илһам сабирға язған очуқ хети вә илһам сабирниң җаваб хети диққитимизгә чүшти.

Очуқ хәттә оқуғучилар мәктәптики оқутқучиларниң оқуғучиларни уридиғанлиқи вә халиғанчә тән җазаси беридиғанлиқиға даир қилмишларни һәмдә оқуғучиларниң ғуруриға тегиш әһвалиниң еғирлиқини инкас қилған. Шуниң билән биргә, навада юқиридин мупәттиш хадимлири келип тапшуруқ миқдари, оқутқучиларниң тән җазаси қоллиниш әһвали, мәктәпләрниң артуқчә һәқ йиғивелиш әһвали қатарлиқлар һәққидә соал сорап қалса, оқуғучилар җәзмән мәктәп тәрипидин алдин тәйярлап берилгән инкар қилиш характеридики ялған җавабларни бериши тәләп қилиниватқанлиқини паш қилған. Ата - анилар болса мәктәп рәһбәрликиниң оқуғучиларни коллектип ялғанчилиққа риғбәтләндүрүштәк бу хил қилмишидин наһайити ғәзәпләнгән.

Һалбуки, үрүмчи шәһәрлик һөкүмәтниң сайбағ районлуқ маарип идариси арқилиқ 3 - оттура мәктәпкә йәткүзгән җавабида бу әһвалларниң натоғра йосунда оттуриға чиққанлиқи етирап қилинған болсиму, шәһәрлик һөкүмәт бу һәқтә башқилар рази болғудәк һәл қилиш чарисини оттуриға қоялмиған. Әксичә қелиплишип қалған коничә усулда "пат йеқинда һәл қилиш үмидидә" болуватқанлиқи әскәртилгән.

Уйғур аптоном райониниң мәркизи болған үрүмчи шәһириниң сиясәт җәһәттә башқа районлардин хелила әркин болидиғанлиқидәк реаллиқни көздә тутуп, мәзкур әһвалларниң қайси дәриҗидә икәнликини ениқлап бақмақчи болдуқ. Бу җәрянда зияритимизни қобул қилған үрүмчидики бир ана өзиниң билидиғанлирини биз билән ортақлашти.

Үрүмчиниң тудунхаба районида олтурушлуқ йәнә бир кишиму бир қисим мәктәпләрдики оқутқучиларниң тән җазаси бериш қилмиши һәққидә аңлиғанлирини баян қилди.

Шуниң билән биз, оқуғучиға тән җазаси бериватқан оқутқучи һәққидики видиоға асасән шу мәктәп билән алақиләштуқ. Мәктәпниң илмий мудири дәсләп буни инкар қилған болсиму, ахирида шундақ бир ишниң болғанлиқини етирап қилди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт