Balilar edebiyati yazghuchisi memetjan abliz böriyarning tutqunda ikenliki delillendi

Muxbirimiz shöhret hoshur
2018-11-19
Élxet
Pikir
Share
Print
Balilar edebiyati yazghuchisi memetjan abliz böriyar ependi.
Balilar edebiyati yazghuchisi memetjan abliz böriyar ependi.
Oqurmen teminligen

Muxbirimizning qeshqer Uyghur neshriyatidiki tutqunlar heqqide élip barghan éniqlashliri dawamida mezkur neshriyatning oqup tekshürüsh ishxanisining mudiri, balilar edebiyati yazghuchisi memetjan abliz böriyarningmu tutqunda ikenliki delillendi. Weziyettin xewerdar kishilerdin biri uning "Böriyar" dégen texellusi seweblik tutulghanliqini ilgiri sürse, yene biri memetjan abliz böriyar oqup tekshürgen 100 din artuq kitabta "Mesile" chiqqanliqi seweblik tutulghanliqini ilgiri sürmekte.

Qeshqer Uyghur neshriyatidin 14 kishining tutqunda ikenliki heqqide radiyomizgha kelgen inkasta mezkur neshriyatning oqup tekshürüsh bölümining mudiri memetjan abliz böriyarningmu tutqunda ikenliki yézilghan.

Matériyallarda tonushturulushiche, memetjan abliz böriyar 1958‏-yili üstün atushta tughulghan. 1983‏-Yili shinjang uniwérsitétini püttürüp, 1986‏-yilining yil axirigha qeder shinjang ma'arip institutida oqutquchiliq qilghan. 1987‏-Yili birinchi aydin bu yil tutqun qilin'ghan'gha qeder qeshqer Uyghur neshriyatida tehrir we mudir bolup xizmet qilghan.

Biz memetjan abliz böriyarning ehwalini éniqlash üchün qeshqer Uyghur neshriyatining ishxana mudiri gaw ligha téléfon qilduq. U memetjan ablizning ishqa kéliwatqan yaki kelmeywatqanliqi heqqidiki so'alimizgha jawab bérelmidi.

Radiyomizgha kelgen inkasta memetjan abliz böriyarning bu yil öktebirning deslepki heptisi tutqun qilin'ghanliqi yézilghan. Qeshqer Uyghur neshriyatining qoghdash xadimi memetjan abliz böriyarning tutqun qilin'ghanliqidin xewiri barliqini, emma délosining tepsilatidin xewersizlikini éytti. Qeshqer Uyghur neshriyati tewe bolghan bolghan dongxu(sherqiy köl) saqchixanisining xadimimu memetjan ablizning tutqun qilin'ghanliqini inkar qilmidi.

Yene radiyomizgha kelgen inkasta memetjan abliz tekshürüp imza qoyghan 100 din artuq kitabtin "Mesile" chiqqanliqi, shunga uning délosining sotqa tapshurulghanliqi yézilghan. Qeshqer weziyitidin xewerdar kishilerdin biri uning "Böriyar" dégen texellusiningmu da'irilerde "Bölgünchilik" gumani qozghighanliqini ilgiri sürdi.

Qeshqerdiki alaqidar xadimlardin biri memetjan ablizning bu yilning béshida pénsiyege iltimas sun'ghanliqi, emma qeshqer Uyghur neshriyatidin bayqalghan "Mesililik kitablar" arisida uningmu jawabkarliqi bar kitablar bolghanliqi üchün pénsiye iltimasining ret qilinip üstidin tekshürüsh élip bérilghanliqi we bir ayning aldida tutup kétilgenlikini delillidi.

Matériyallarda tonushturulushiche, memetjan abliz böriyar Uyghur ösmürlirining en'eniwi oyunlirini qézish we retlesh bilen izchil shughullinip kelgen bolup, "Uyghur ösmürlirining en'eniwi oyunliri" namliq 4 tomluq kitabi neshr qilin'ghan. U yene "Uyghur balilar éghiz edebiyati qamusi", "Uyghur balilar qoshaqliri we tépishmaqliri" qatarliq kitablarni tüzüp neshr qildurghan. Uning yene "Sirliq axsham" namliq bir nesrler toplimimu neshr qilin'ghan. Weziyettin xewerdar kishiler da'irilerning tutqun qilin'ghan yazghuchi we tehrirlerning qaysi kitabidin "Mesile" chiqqanliqini jem'iyetke ashkarilimaywatqanliqini ilgiri sürdi.

Éniqlashlirimizdin memetjan abliz böriyarning tutqun qilin'ghanliqi delillen'gen bolsimu, emma uning nöwette yighiwélish lagérida yaki qamaqxanida )tutup turush ornida( ikenliki téxi jezmleshmidi. Memetjan abliz böriyarning tutulushigha u tehrirligen we testiqlighan kitablardin bashqa yene u özi yazghan kitablarningmu seweb bolghan yaki bolmighanliqi téxi ayding emes.

Toluq bet