Bir dada: milliy kimlikini perzentlirimge miras qaldurush burchumdur

Gollandiyidiki Uyghur jama'iti "Yawropa sherqiy türkistan ma'arip jem'iyiti" ning teshkillishi bilen Uyghur ösmürlirini ana til we Uyghur medeniyiti boyiche terbiyileshke bashlidi.
Ixtiyariy muxbirimiz pida'iy
2013-02-05
Élxet
Pikir
Share
Print
"Yawropa sherqiy türkistan ma'arip jem'iyiti" teshkilligen Uyghur ösmürlirini ana til we Uyghur medeniyiti boyiche terbiyilesh kursidin körünüsh. 2013-Yili 2-féwral, gollandiye.
"Yawropa sherqiy türkistan ma'arip jem'iyiti" teshkilligen Uyghur ösmürlirini ana til we Uyghur medeniyiti boyiche terbiyilesh kursidin körünüsh. 2013-Yili 2-féwral, gollandiye.
RFA/Pidaiy

Bir qisim ata-anilar milliy kimlikini perzentlirige miras qaldurush mes'uliyitini ada qilish üchün mezkur pa'aliyetke qatnashqanliqini bildürüshti.

Melum bolushiche, gollandiyidiki "Yawropa sherqiy türkistan ma'arip jem'iyiti" 4 yashtin ashqan ösmürlerni sistémiliq terbiyilesh üchün 6 ayliq kurs pilanini tüzüp chiqqan. 2-Féwraldin bashlan'ghan bu kurs yuqiriqi pilanni emeliyleshtürüsh üchün alghan tunji qedem iken.

Ana til we Uyghur medeniyiti boyiche terbiyilesh kursidiki balilarning hemdastixanliqidiki xushalliqi. 2013-Yili 2-féwral, gollandiye.
Ana til we Uyghur medeniyiti boyiche terbiyilesh kursidiki balilarning hemdastixanliqidiki xushalliqi. 2013-Yili 2-féwral, gollandiye. RFA/Pidaiy

Ders shu yer waqti etigen sa'et 10 din, chüshtin kéyin sa'et 3 qeder dawam qildi. Yéngi xizmet merkizide hazirlan'ghan oqutush sinipining tunji qararliq oqughuchiliri, yéshi we sewiyisige qarap 3 guruppigha ayrildi. Ders her bir guruppida ana til, exlaq we diniy bilimler, hékmetlik hékayiler bilen dewr qildi. Ders ariliqida aram élish, namaz we ghizalinish qatarliq programmilarmu orunlashturuldi.

Balilarning ders waqtidiki qizghinliq we intilishliri, dem élish waqtidiki sekrep-taqlashliri, tamaq waqtidiki hemdastixanliqi we sep-bolup tizilip birge namaz oqushliri balilar üchün tépilghusiz xushalliq bergendek qilatti. Kichik balilarmu omaq we chüchük awazliri bilen hés qilghan xushalliqlirini bildürdi.

"Yawropa sherqiy türkistan ma'arip jem'iyiti" ezaliri, milliy kimlikining kélechiki bolghan ösmürlerni terbiyileshning jiddiylikini xilidin biri eskertip kelgen idi. Ular ilgiri a'ililerge bérip we yaki tor alaqe qorallirida ders uyushturup térishchanliq körsetken bolsimu, ünümi kütkendek bolmay "Balilarni jezmen bir yerge yéghip mektep sheklide terbiyilesh lazim", dégen qararigha kelgen idi. Shuning üchün bu qétim yéngi xizmet merkizi hazirlap, eng aldi bilen balilarning oqush ishini rawajlandurushqa atlan'ghanidi. Bu munasiwet bilen tunji derstiki keypiyatni eynen bilish üchün barghan ziyaritimizde diqqitimizni eng bek tartqini, balilarning bir-biri bilen tamamen dégüdek gollandche paranglishishqa yüzlinip kétiwatqanliqi boldi we ewlad terbiyisidiki bu jiddiyetning yenimu toghriliqini hemmimiz qaytidin hés qilghan bolduq.

Ziyaritimizni qobul qilmighan bolsimu, baliliridiki bu özgirishni hés qilghan atilar: "Biz milliy we diniy kimlikimizni saqlashning ghémide yürüp, balilirimiz bu halgha keptu. Bu mes'uliyetke sel qarawatqanlarning baliliri néme bolup ketkendu?" dep, ejeblen'genlikini bildürdi.

Yiraq hélmon shehiridin ikki oghlini élip kelgen eysa qarim ziyaritimizni qobul qilip öz tesiratini anglatti. U, kimlikini perzentlirige miras qaldurush mes'uliyitini ada qilish üchün mezkur pa'aliyetke qatnashqanliqini bildürdi.

Toluq bet