Қазақистандики уйғур мәктәплири оқуш йилини тамамлиди

Ихтиярий мухбиримиз ойған
2016-05-26
Share
Akhirqi-qongghuraq-murasimi-2.JPG "ахирқи қоңғурақ" мурасимидин көрүнүш. 2016-Йили 25-май, алмата.
RFA/Oyghan

Мәлум болушичә, қазақистанниң алмата шәһири вә алмата вилайитиниң панфилоф наһийисидики яркәнт шәһири вә йезилири, шундақла уйғур, әмгәкчиқазақ вә талғир наһийилиригә қарашлиқ йезиларда орунлашқан таза уйғур тилидики вә уйғур, қазақ һәм рус тиллиридики арилаш мәктәпләрдә билим еливатқан уйғур балилири 2015- вә 2016-оқуш йилини тамамлап, 25-майда "ахирқи қоңғурақ" йиғиниға қатнашти. Миңлиған оқуғучилар вә муәллимләр, юрт-җамаәтчилик, зиялийлар, билим бериш идарилири, җәмийәтлик бирләшмиләр һәм аммиви ахбарат васитилири вәкиллири вә башқилар қатнашқан бу мурасимда әла оқуған вә мәктәпниң җәмийәтлик ишлириға актип арилашқан оқуғучилар, шундақла үнүмлүк ишлигән устазлар пәхрий ярлиқлар вә баһалиқ соғилар билән тәқдирләнди.

Шу җүмлидин алмата шәһириниң уйғурлар көп олтурақлашқан достлуқ мәһәллисидики абдулла розибақийеф намидики 153-мәктәп-гимназийәдә бу йили 29 оқуғучи мәктәпни тамамлиди, кейинки оқуш йилида болса, 70 тин ошуқ қиз-йигит мәктәпни тамамлимақчи. Мурасимда сөзгә чиққан қазақистан уйғурлириниң җумһурийәтлик етно-мәдәнийәт мәркизи рәисиниң орунбасари, җумһурийәтлик "уйғур авази" гезитиниң баш муһәррири ершат әсмәтоф, пешқәдәм зиялийлар зерип молотоф, рабик исмайилоф вә башқилар йиғин қатнашқучилирини оқуш йилиниң мувәппәқийәтлик тамамлиниши билән, шундақла гимназийә мудири шавкәт өмәрофниң йеқинда алмата шәһәрлик мәслиһәт әзасиға сайлиниши билән қизғин тәбриклиди вә гимназийә коллектипи вә оқуғучилириға чоң утуқлар тилиди.

Радийомиз зияритини қобул қилған а. Розибақийеф намидики 153-мәктәп-гимназийә мудириниң орунбасари аидәм асқарованиң тәкитлишичә, билим бериш җәрянида киргүзүлүватқан йеңи программиларниң асасий мәқсити оқуғучилар өзлириниң қандақ оқуш керәкликигә диққәт бөлүп олтуруп, уларниң өз ойлири билән дәлиллирини ениқ йәткүзәләйдиған, һәм язмичә, һәм әркин бәдиий тәсвиргә маһир, бир нәччә тилни өзләштүргән, риқабәткә қабил, һәр тәрәплимилик шәхсләрни тәрбийиләштин ибарәттур. У мундақ деди: "гимназийәмиз мушу аталған йөнилишләрдә 2015-вә 2016-оқуш йилида еғиз толдуруп ейтарлиқ утуқларға йәтти. Бизниң үч айлиқ курслардин өткән муәллимлиримизниң сани бүгүнки күндә 49ға йәткән болса, йил бойи 42 муәллимимиз қайта тәйярлаш курслиридин өтти. Бу йили көп тиллиқ программисини киргүзүш бойичә алмата шәһиридә биринчи орунға игә болдуқ, оқуғучилиримизму қазақ тили бойичә юқири көрсәткүчләргә игә болди." а. Асқарова бу йәрдә оқуғучиларниң пүтүнләй мәмликәт бойичә өткүзүлгән "ярқин келәчәк", "мәмликәтлик тил мениң тилим" дегәнгә охшаш җумһурийәтлик, шәһәрлик мусабиқиләрниң ғалиби аталғанлиқини тәкитлиди.

Игилишимизчә, бу йили шундақла, мәсилән, алмата шәһириниң заря востока мәһәллисидики мурат һәмрайеф намидики 150-мәктәпни 22 оқуғучи, султанқорған мәһәллисидики мәсим яқупоф намидики 101-мәктәп-гимназийәни 18, әмди панфилоф наһийисиниң яркәнт шәһиридики хелил һәмрайеф намидики оттура мәктәпни 24, билал назим намидики оттура мәктәпни 35 оқуғучи тамамлиған.

Радийомиз зияритини қобул қилған мурат һәмрайеф намидики 150-мәктәп мудириниң оқуш ишлири бойичә орунбасари реһимбүви муһәммәтова мәктәп оқуғучилириниң мәктәп бойичә өткүзүлгән атақлиқ алим мурат һәмрайефниң 80 йиллиқиға беғишланған вә "тирәкимиз мустәқиллиқ, тиликимиз турақлиқ, биликимиз бирлик" темисидики билим фестиваллирида, шундақла һәр хил пәнләр бойичә наһийә вә шәһәр миқясида өтүлгән мусабиқиләрдә мәктәп оқуғучилириниң юқири дәриҗиләргә еришкәнликини ейтип, мундақ деди: "биздә шәһәрлик иншалар бойичә өткән ‹вәтәнни қоғдиғучилар', ‹мениң мустәқил қазақистаним', ‹рәһмәт, аниҗан', ‹мустәқил қазақистан мениң келәчиким' намлиқ билим көврүклиригә қатнашқан оқуғучилиримиз даим мукапатлиқ орунларға еришиду. Биздә балилиримиз пәқәт билим тәрәптинла әмәс, тәнһәрикәт һәм сәнәт тәрипидинму юқири орунларға игә болди."

Мәлуматларға қариғанда, алмата вилайитигә қарашлиқ пәнҗим, алтөй, чулуқай, садир, ғалҗат, чоң вә кичик ақсу, кеңәш, дардамту, кәтмән, ават, маливай, қорам, челәк, қаратуруқ, таштиқара, бесағаш, туздибастав вә башқиму көплигән йезилардики арилаш мәктәпләр болуп, барлиқида һазир 15 миңдин ошуқ уйғур балилири билим алмақта. Бүгүнки күндә уйғур җамаәтчиликини тәшвишләндүрүватқан мәсилиләрниң бири уйғур тилида оқуватқан балилар саниниң кемийип кетиватқини болуп, бу әһвал болупму йеза йәрлиридә байқалмақта.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт