Da'iriler qeshqer uniwérsitétidiki 4 proféssorning jazalan'ghanliqini axbarattin yoshurmaqta

Muxbirimiz shöhret hoshur
2018-09-10
Élxet
Pikir
Share
Print
Qeshqer uniwérsitétining mudiri proféssor erkin ömer.
Qeshqer uniwérsitétining mudiri proféssor erkin ömer.
Social Media

Xitay da'iriliri qeshqer uniwérsitétining 4 neper proféssori we mudirliridin bolghan erkin ömer, qurban osman, gülnar obul we muxter abdoghopur qatarliq 4 kishining wezipisidin élip tashlan'ghanliqini qeshqer uniwérsitétining tor bétide xewer qilghan bolsimu, emma ularning "Ikki yüzlimichilik" bilen jazalan'ghanliqini tilgha almighan. Muxbirimiz bügün "Ikki yüzlimichilik" bilen eyiblinip jazalan'ghanliqi aldinqi küni delillen'gen bu töt neper proféssorning nede tutup turuluwatqanliqi heqqide qeshqer wilayitidiki her derijilik hökümet organliridin melumat igilidi. Yerlik da'iriler bu ehwalning "Dölet mexpiyetliki" ikenlikini tilgha élip, melumat bérishni ret qildi.

Qeshqer uniwérsitétning tor bétide 2-séntebir küni élan qilin'ghan mektep rehberlik qatlimida özgirish bolghanliqi heqqidiki xewerde mezkur töt neper Uyghur proféssorning wezipisidin élip tashqanliqi uqturulghan bolsimu, emma ularning"Ikki yüzlimichilik" bilen eyiblen'genliki tilgha élinmighan.

Halbuki, bizning aldinqi jüme künidiki ehwal éniqlishimiz dawamida qeshqer uniwérsitéti mektep memuriyitining bir xadimi mezkur 4 Uyghurning "Ikki yüzlimichilik" xataliqi ötküzgenliki we shu sewebtin wezipisidin élip tashlan'ghanliqini ashkarilighan idi. Uniwérsitét toridiki mezkur xewerdin melum bolushiche2-séntebir küni Uyghur aptonom rayonluq partkom intizam tekshürüsh komitéti, teshkilat bölümi, ma'arip nazariti qatarliq orunlarning rehberliridin teshkillen'gen bir guruppa mezkur uniwérsitétta bashqarma derijiliktin yuqiri kadirlar yighini chaqirip, yuqiriqi 4 Uyghur proféssorni wezipisidin élip tashlash qararining etrapliq tekshürüsh we chongqur oylinishtin kéyin bérilgenlikini bayan qilghan.

Biz mezkur töt proféssorning ishxanisidiki xadimlardin melumat élish üchün qeshqer uniwérsitétigha qayta téléfon qilduq. Özini uniwérsitét qomandanliq merkizining xadimi dep tonushturghan bir kishi gülnar obul qatarliq proféssorlarning ishxana nomurlirini dep bérelmeydighanliqini, bu uchurni intizam tekshürüsh qatarliq alaqidar organlardin sorishimiz kéreklikini éytti.

Uniwérsitét tor bétidiki mezkur xewerde töt neper Uyghur proféssorni wezipisidin qaldurush qararning chong weziyetni közde tutup, shi jinpingning ebediy eminlik chaqiriqigha awaz qoshup we uniwérsitét xizmetliridiki netijini békitishte "Bölgünchilikke qarshi turush" ni asasi ölchem qilip bérilgenliki bayan qilin'ghan. Yeni xewerde ularning siyasiy meydanida mesile chiqqanliqi isharetlen'gen bolsimu, emma konkrét néme xataliq ötküzgenliki tilgha élinmighan. Ulargha bashqa xizmet bérilgen yaki mekteptin heydelgenliki üstidimu toxtalmighan. Ötken hepte radiyomizgha uchur yetküzgen weziyettin xewerdar bir kishi mezkur töt proféssorning tutqun qilin'ghanliqi we nede tutup turuluwatqanliqidin a'ile-tawabi'atlirining xewersizlikini melum qilghan idi.

Qeshqer wilayetlik partkom teshwiqat bölümi bu töt proféssorning nede tutup turuluwatqanliqidin xewiri yoqluqini éytti. Xitay torbetliride öchürülmey qalghan bezi xewerlerde proféssor gülnar obulning uniwérsitét partkomining da'imiy hey'et ezasi we birliksep bölüm bashliqi ikenliki bayan qilin'ghan. Shunga biz uning nöwettiki ehwali heqqide wilayetlik partkom birliksep bölümidinmu melumat soriduq. Téléfonimizni qobul qilghan xadimmu bu téma heqqide gep qilishtin özini qachurdi.

Weziyettin xewerdar kishi bu töt proféssor üstidiki tekshürüshning partkom intizam tekshürüsh komitéti teripidin élip bérilghanliqi we "Ikki yüzlimichilik" qalpiqi kiydürülgendin kéyin ularning qanun orunlirigha tapshurup bérilgenlikini melum qilghan idi. Biz shunga qeshqer wilayetlik partkom intizam tekshürüsh bölümining délo melum qilish bölümigimu téléfon qilduq. Bu xadimmu bu heqte melumat bérishni ret qildi. Qeshqer sheherlik siyasiy-qanuni komitétining bir xadimi gülnar obul qatarliq bu 4 proféssorning nede tutup turuluwatqanliqining "Dölet mexpiyetliki" ikenliki we bu heqte melumat bérishke bolmaydighanliqini éytti.

Téléfon ziyaretlirimiz dawamida qeshqerdiki melum bir idare xadimi proféssor gülnar obulning ikki yilning aldida xitay ölkiliridiki bir zhurnalda Uyghurlarning medeniyet tarixi we diniy esebiylik mesilisi heqqide pikir bayan qilghanliqi, eyni waqitta alqishlan'ghan u pikirlerning emdilikte "Hökümetning siyasitige astirtin qarshi turush" dep qaralghanliqi we mushu sewebtin "Ikki yüzlimichilik" bilen eyiblen'genlikini ilgiri sürdi. Emma u mezkur maqalining éniq menbesini körsitip bérelmidi.

Toluq bet