Enxuy ölkisining guma nahiyisige qilghan hemkarliq yardimi-“Qosh til oqutquchilirini terbiyilesh”

Guma nahiye muji yéza yéngiwagh bashlan'ghuch mektepning sinipliridin biri.

2015-Yili 7-ayning 3-künidiki 6.5 Bal yer tewresh Uyghurlar diyaridiki eng namrat nahiyilerning biri xoten wilayitige qarashliq guma nahiyisini bir qétim metbu'at yüzige élip chiqqan idi.

Bügün Uyghurche ündidar betliride tarqalghan “Guma nahiyisi muji yéziliq yéngiwagh bashlan'ghuch mektipidiki namrat oqughuchilargha qishliq kiyim i'ane qilish” heqqidiki muraji'et xéti we alaqidar resimler bizni mezkur nahiyining hazirqi ehwaligha yene bir qétim diqqitimizni aghdurushqa ündimekte. Murajetnamida mundaq déyilidu: menki (.....) Silerdin pul emes, belki öydiki baliliringlar kiymigen yaki kiyip téxi konirimighan, tashliwétishni oylishiwatqan kona-yéngi kiyim-kéchekliringlarni sorisam bérersilermu? qish pesli yétip keldi. Xoten guma nahiyisi muji kenti yéngi bagh bashlan'ghuch mektipidiki omaq Uyghur perzentlirimizning qish peslini issiq we illiq chiqirishi üchün bir türküm kiyim-kéchek we ayaghlargha mohtajdur! eger éghir körmisingiz mushu balilirimizgha yardem qolimizni ayimighan bolsaq! tarqitip qoysingiz sawab bolidu.

Muraji'etnamining axirigha kiyim-kéchek ewetish üchün mektep adrésini ishlitishke bolidighanliqi eskertilgen.

Biz mezkur muraji'etnamige da'ir ehwallarni éniqlash üchün muji yéziliq yéngiwagh mektepke téléfon qilduq. Téléfon ziyariti arqiliq shu nerse aydinglashtiki, mektepning hazirqi omumiy shara'iti yaxshi iken, yeni yéngi sélin'ghan yéngi oqutush binasi mektepning asasliq oqu-oqutush éhtiyajigha yétidiken. Peqet ikki sinip oqughuchi sinip yétishmigenliktin waqtinche kona binaning ikki éghizliq sinipida oquwétiptu. Emma, oqughuchilar asasiy jehettin déhqanlarning perzenti bolghachqa chüshlük tamaq, oqush puli we derslik kitab heqqi dégenler kechürüm qilin'ghan bolsimu, biz xewer tapqan nöwettiki qishliq kiyim qiyinchiliqi kélip chiqqan iken.

Biz bu ehwallarni yenimu delillesh üchün guma nahiyilik ma'arip idarisige téléfon qilduq. Idare bashliqi rahmanjan memettin ehwal igilimekchi bolghinimizda u özining ürümchidin qaytish sepiride ikenlikini éytip, su'allirimizgha jawab bérishtin özini qachurdi. Shuning bilen biz guma nahiyilik ma'arip idarisining tor bétini ziyaret qilghinimizda guma nahiyisining enxuy ölkisi nuqtiliq yardem béridighan nahiye ikenliki aydinglashti. Nahiyilik ma'arip idarisidin téléfonimizni alghan xitay xizmetchi xadimmu bu nuqtini delillidi. Shu yosunda enxuy ölkisi bilen hemkarliq munasiwiti ornatqan guma nahiyisining biwasite iltimas qilishi arqisida yerlik oqutquchilarni “Qosh tilliq oqutush” ning telipi boyiche awwal enxuyda birnechche qararliq terbiyilesh kursi bashlan'ghanliqi, kéyinche bu xildiki yardemni téximu kücheytish meqsitide enxuydin xitay oqutquchilarning birnechche türkümge bölünüp, gumigha kélip ma'arip sahesige ishqa chüshkenliki ayan boldi. Muji yéziliq hökümettiki bir xizmetchi xadimmu yéngiwagh mektipide xitay balilirining yoqluqini, oqughuchilarning pütünley Uyghur déhqanlarning baliliri ikenlikini delillidi.

Guma nahiyilik ma'arip idarisining tor bétidiki melumatlar gumidiki herqaysi mekteplerde diniy ashqunluqqa qarshi teshwiqat herikitining aktip yürgüzülüwatqanliqini ishare qilidu.

Tepsilatini awaz ulinishidin anglighaysiler.