Shiwétsiyediki Uyghurlar ana tilini saqlap qélish üchün pa'al heriket qilmaqta

Ixtiyariy muxbirimiz éhsan
2017-02-20
Share
shiwetsiye-ana-til-mektipi.jpg Shiwétsiyediki ana til mektipi oqughuchiliri.
RFA/Éhsan

Shiwétsiyede yashawatqan her qaysi millet xelqi özining diniy étiqadi, örp-adetliri we til-yéziqini saqlap qélish üchün meschit, mektep we medeniyet merkezliri qatarliq orunlarni échip kelmekte.

Shiwétsiye ma'arip organliri mes'ullirimu mekteplerdiki chet'ellik balilargha ana til dersi ötüshke alahide köngül bölüp, ana til oqutquchilirini orunlashturup bermekte.

Shiwétsiyede yashawatqan Uyghur perzentlirinimu bu ewzelliklerdin behrimen qilish üchün mexsus Uyghur tili oqutquchisi teklip qilip, döletning bu siyasitidin ünümlük paydilanmaqta.

Shiwétsiyening paytexti sitokholmning akalla rayonidiki kordoba xelq'araliq bashlan'ghuch mektipide 15 neper Uyghur oqughuchi oquwatqan bolup, bu mekteptiki Uyghur perzentlirining ana tilini saqlap qalalishi üchün, shiwétsiyede turushluq Uyghur ma'arip uyushmisi mes'ullirining mektep mudiri bilen birqanche qétim körüshüp alahide küch chiqirishi netijiside, Uyghur tili mektepning chet'el tili derslik tizimlikige resmiy kirgüzüldi we bir neper Uyghur oqutquchining heptide 3 sa'et Uyghurche ders ötüshi testiqlandi.

Uyghur ma'arip uyushmisining re'isi abdullah kökyarning bildürüshiche, korduba xelq'ara bashlan'ghuch mektipide hazir jem'iy 15 neper Uyghur perzenti bar bolup, bularning ana tilini saqlap qélishi üchün 2017 -yili 13 -féwral künidin bashlap, her heptining düshenbe künliri 3 sa'et Uyghur ana tili dersi ötilishke bashlighan.

Bu munasiwet bilen, Uyghur ma'arip uyushmisining re'isi abdulla kökyarni ziyaret qilduq. U ziyaritimizni qobul qilip özlirining 2017-yilliq pilanigha ana tilni kücheytish meqsitide shiwétsiye ma'aripining ana til derslikini tesis qilish siyasitidin paydilinip, Uyghur oqughuchilar sani köp bolghan mekteplerde Uyghur tili dersliki tesis qilghanliqini anglatti.

Shiwétsiyediki mexmut qeshqiri mektipining mes'uli abbas ependi bu mektepte izchil oqughan ösmürlerning Uyghurche sözlishish, yézish, oqush jehetlerde qandaq usullarni qollinip kéliwatqanliqini tepsiliy anglatti.
Abbas ependi sözide yene, ana tilni saqlap qélishta özlirining éliwatqan tedbirliri heqqide tejribilirini anglatti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet