Uyghur akadémiyesi 10 neper Uyghur oqughuchigha 2018 yilliq “Tewpiq oqush mukapati” bérishni qarar qildi

Ixtiyariy muxbirimiz erkin tarim
2018.03.02
Share on WhatsApp
Share on WhatsApp
tewpiq-mukapati-2018.JPG Uyghur akadémiyisining tor bétidiki 2018-yilliq tewpiq oqush mukapatigha a'it yazma.
RFA/Erkin Tarim

Bash shtabi istanbuldiki Uyghur akadémiyesi yéqinda 10 neper Uyghur oqughuchining 2018-yilliq “Tewpiq oqush mukapati” gha érishkenlikini bildürdi.

Türkiyede oquwatqan Uyghur oqughuchilar sanining köpiyishige egiship, ularning oqushigha yardem bérish we iqtisadiy qiyinchiliqlirini hel qilish üchün türkiyede pa'aliyet élip bériwatqan Uyghur akadémiyesi “Tewpiq oqush mukapati” tesis qilghan idi. 2014-Yili tesis qilin'ghan mezkur mukapat türkiyede öz rasxoti bilen yaxshi oquwatqan, iqtisadiy jehettin qiyinchiliqi bar oqughuchilargha her yili tarqitilip kelmekte.

Uyghur akadémiyesi 2018-yilliq “Tewpiq oqush mukapati” gha érishken oqughuchilarning tizimlikini élan qildi. Bu munasiwet bilen radiyomiz ziyaritini qobul qilghan Uyghur akadémiyisining bashliqi abdulhemid qaraxan ependi 2018-yili 1-ayning 30-küni mukapatqa iltimas qilish toghrisida uqturush tarqatqanliqini, 25 neper Uyghur oqughuchining iltimas qilghanliqini, buning ichidin netijisi eng yaxshi bolghan 10 oqughuchigha oqush mukapati bérishni qarar qilghanliqini bayan qildi. 

Merkizi istanbulda turushluq Uyghur akadémiyesi 4 yildin buyan “Tewpiq oqush mukapati” ni tarqitip kelmekte. Uyghur akadémiyesi chet'ellerdiki meripetperwer karxanichilar bilen tijaretchilerning yardimi we i'anisini qobul qilip, uni oqush mukapati teriqiside yaxshi oquwatqan, emma iqtisadiy yardemge mohtaj Uyghur oqughuchilargha tarqitip kelmekte. Akadémiyening bashliqi abdulhemid qaraxan ependi mezkur oqush mukapatini élish üchün Uyghur oqughuchilarning qandaq shertlerni hazirlishi kérekliki heqqide toxtaldi.

Istanbul tijaret uniwérsitétining 4-yilliq oqughuchisi burhan seley ziyaritimizni qobul qilip, ötken yilidin tartip yurti bilen bolghan alaqisi üzülüp qalghachqa özining iqtisadiy jehettin qiynilip qalghanliqini, yéqinda Uyghur akadémiyisining oqush mukapatigha iltimas sunup mezkur mukapatqa érishkenlikini bayan qildi. 

Melumki, türkiye Uyghurlar eng köp olturaqlashqan döletlerning biri hésablinidu. Türkiyede yawropa döletliridikidek musapirlargha turmush yardem puli bérilmeydu. Türkiyede dangliq uniwérsitétlargha imtihan bérip yaxshi kesiplerge ötken Uyghur oqughuchilar köp bolsimu, emma ular oqush heqqini töleshte qiynalmaqta. Bulardin biri ötken yili istanbul uniwérsitétining qanun kespige tallan'ghan Uyghur qiz-amine barattur. U, özining a'iliside 9 janning yashaydighanliqini, ikkisining nöwette uniwérsitétta oquwatqanliqini, dadisining türk tilini yaxshi bilmigechke téxiche ish tapalmighanliqini, özining mezkur oqush mukapatigha érishkenlikidin bekla xursen bolghanliqini bayan qildi.

Ziyaritimiz jeryanida amine barat yene istanbul uniwérsitétining qanun kespide tiriship oqup, kelgüside wetini we milliti üchün xizmet qilidighanliqini bildürdi.

2017-Yili misirda oquwatqan oqughuchilarni xitay hökümiti xitaygha qaytishqa mejburlighanda, bu oqughuchilarning köpi türkiyege kéliwalghan idi. Ularning köpi türkiyediki uniwérsitétlargha orunlashqan bolsimu, emma yurti bilen bolghan alaqisi késilgen bolghachqa, éghir iqtisadiy qiyinchiliqqa duchar bolmaqtiken. Abdulhemid qaraxan ependi bu heqte tepsiliy melumat berdi. U, bu oqughuchilargha iqtisadiy jehettin yardem qilishni xalaydighan Uyghurlarning ikki xil yol bilen yardem qilsa bolidighanliqini bildürdi.

Uyghur akadémiyesi 2009-yili 9 neper Uyghur ziyaliysi teripidin qurulghan bolup, her yili türlük témilarda ilmiy muhakime yighinliri chaqirghandin sirt, 2014-yilidin bügün'giche yaxshi oquwatqan 49 Uyghur oqughuchigha oqush mukapat puli tarqatqan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.