Uyghur akadémiyesi "Tewpiq oqush mukapati" ni kücheytishni qarar qildi

Ixtiyariy muxbirimiz erkin tarim
2017-08-18
Share
Tewpiq-Mukapati-turkiyede-oqush.jpg Uyghur akadémiyesi tesis qilghan "Tewpiq mukapati" gha iltimas qilish uqturushi.
RFA/Erkin Tarim

Yéqinqi yillardin béri, türkiyege öz xirajiti bilen kélip oquydighan Uyghur oqughuchilarning sani köpiyip barmaqta. Axirqi 10 aydin béri türkiyede öz xirajiti bilen oquwatqan Uyghur oqughuchilarning a'ilisi bilen bolghan alaqisi üzülüp qalghanliqtin, ular a'ilisidin iqtisadiy yardem alalmighan. Bu sewebtin öz xirajiti bilen oquwatqan xéli köp Uyghur oqughuchilar iqtisadiy qiyinchiliq sewebidin türkiyediki oqushini dawamlashturushta qiynalmaqta. Istanbuldiki Uyghur akadémiyesi bularni nezerde tutqan halda 2017 we 2018-oqush yillirida tewpiq oqush mukapatining sommisini we sanini köpeytip, téximu köp Uyghur oqughuchilargha tewpiq oqush mukapati hel qilishni qarar qilghan.

Biz "Tewpiq oqush mukapati" toghrisida téximu tepsiliy melumat igilesh üchün, aldi bilen mezkur mukapatni tesis qilghan Uyghur akadémiyesi mudiri ablimit qaraxan ependi, proféssor doktor alimjan inayet, mezkur oqush mukapat pulini alghan edirnediki tirakya uniwérsitétida tarix kespide doktorluq oquwatqan ömer jamal, newshéhir uniwérsitétida doktorluq oquwatqan abduweli ependiler bilen téléfon söhbiti élip barduq.

Ablimit qaraxan ependi "Tewpiq oqush mukapati" ning bir meripetperwer Uyghurning pul i'ane qilishi bilen qurulghanliqini, emma hazir Uyghur oqughuchilarning telipini qanduralmaywatqanliqini, shunga 2017 we 2018-yilliri oqush mewsumida buning sommisini we oqughuchi sanini köpeytishni qarar qilghanliqini bayan qildi.

Uyghur akadémiyisi mudiri ablimit qaraxan ependi, mezkur akadémiyining 2009-yili qurulghandin béri Uyghur oqughuchilargha türkche kurs bergenlikini, hazir misirdin kelgen 75 oqughuchigha türk tili ögitiliwatqanliqini bayan qildi.

Uyghur akadémiyisidin "Tewpiq oqush mukapati" Ni Alghan edirnediki tirakya uniwérsitétida tarix kespi boyiche doktorluq oquwatqan ömer jamal ependi özining "Tewpiq oqush mukapat" pulini alghanliqini, buning özige paydiliq bolghanliqini bayan qildi.

Abduwahit ependi "Tewpiq oqush mukapati" ning sommisini köpeytish pikrining nahayiti yaxshi bolghanliqini, bu halda mezkur mukapatni alghan kishining oqushining iqtisadiy jehettin kapaletke ige bolidighanliqini otturigha qoydi.

Izmirdiki ege uniwérsitéti türk dunyasi tetqiqat merkizi oqutquchisi proféssor doktor alimjan inayet ependi türkiyede "Tewpiq oqush mukapati" ni téximu kéngeytishning shert ikenlikini, chünki türkiyede Uyghur oqughuchilarning sanining köpeygenlikini bayan qildi.

Ablimit qaraxan ependi Uyghur akadémiyisi 2009-yili qurulghandin béri nurghun konkrét xizmetlerni qilghanliqini misallar bilen bayan qilip ötti.

Memet'eli tewpiqning ma'arip mesh'ilini türkiyede yandurush meqsiti bilen muhajirettiki birqanche meripetperwer Uyghurning yardimi bilen 2014-yilidin bashlap türkiyediki oqushta ela we milliy rohi küchlük bolghan, öz xirajiti bilen oquwatqan oqughuchilar üchün "Tewpiq oqush mukapati" tesis qilin'ghanliqini otturigha qoyghan ablimit qaraxan ependi, bu munasiwet bilen 2014, 2015 we 2016-oqush yillirida oqush netijisi alahide yaxshi, emma oqush yardem puligha éhtiyajliq, öz xirajiti bilen türkiyede oquwatqan üch bakalawr, 17 magistir we 9 doktor oqughuchisi bolup jem'iy 29 Uyghur oqughuchigha oqush mukapat puli bérilgenlikini ilgiri sürdi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.