21-Nöwetlik türk dunyasi ösmürler pa'aliyitide Uyghur ösmürlermu nomur körsetti

Ixtiyariy muxbirimiz arslan
2015-05-28
Share

Merkizi istanbulgha jaylashqan türk dunyasi tetqiqatliri fondining uyushturushi bilen 21-nöwetlik türk dunyasi ösmürler pa'aliyiti ötküzüldi.

Bu pa'aliyet 23-maydin 27-mayghiche 5 kün dawam qilghan pa'aliyette istanbulning kadiköy, bakirköy qatarliq bir qanche rayonda ayrim-ayrim halda yürüsh pa'aliyiti élip bardi. Pa'aliyetke türk dunyasining oxshimighan jayliridin kelgen 500 ge yéqin ösmür öz xelqining bayraqliri we milliy kiyimliri bilen yürüsh qildi. Bu pa'aliyetke Uyghur ösmürlerge wakaliten istanbulda yashawatqan Uyghur perzentliridin 20 ösmür teklip bilen qatnashti.

Sughutlu cheshmediki éhsan sun'gu bashlan'ghuch mektep aldidin bashlap kadiköy port meydanighiche yürüsh qilghan türk dunyasi ösmürlirige istanbul waliy yardemchisi yüsüp ziya qaraja'ew, türk dunyasi tetqiqatliri fondining re'isi közxan yazgan, kadiköy nahiye hakimi bérol kurubal qatarliq rehberlermu hemrah boldi.

Yürüsh axirlashqandin kéyin "Istiqlal marshi" oquldi kéyin istanbul waliy yardemchisi yüsüp ziya qaraja'ew söz qilip türk dunyasi dostluqning ortaq mewjudiyetliki we ortaq qimmet qarashlar üstige qurulghanliqini bildürdi.

Istanbul waliy yardemchisi yüsüp ziya qaraja'ew bu pa'aliyetning ehmiyiti toghrisida toxtilip mundaq dédi: bizlerni bir-birimizge yéqinlashturghan amil tarixi we medeniyet munasiwetlirimizdur. Oxshash waqitta bu yerge jem bolghan birlikimizni körüshke shahit bolushtur. Silerning bu tentene pa'aliyet bilen bir yerge jem bolushunglar, birlikimizning, muhebbet rishtimizning, qérindashliq, dostluq munasiwetlirimizning küchlinishini qolgha keltüridu. Silerning öz ara hemkarlishish we qérindashliq rohi hayat boyiche barawerlik we öz-ara bir-birige hörmet qilishni asas qilghan halda algha ilgirileshke dawam qilidu.

Bu pa'aliyetni uyushturghan türk dunyasi tetqiqatliri fondining re'isi közxan yazghan pa'aliyetke qatnashqan ösmürlerge xitab qilip, ösmürlerning bu pa'aliyet jeryanida öz-ara ornatqan dostluqning dawamlishishigha tilekdashliq bildürdi we mundaq dédi: türk dunyasining ösmürliri! siler türk dunyasining kélechiki, mushundaq qaraydighanliqinglargha we mushundaq yétiship chiqidighanliqinglargha ishenchimiz kamildur. Qérindashlar ara quchaqlishinglar, bu yerning silerning wetininglar ikenlikini oxshash milletning ewladliri ikenlikinglarni oxshash tilda sözlishidighanliqinglargha shahit bolunglar. Bu qérindashliq munasiwet téximu küchlensun. Tilda, pikirde, ish- herikette birlik bolush qérindashliq munasiwet bilen emeliylishidu. Türk milliti mushundaq qilish arqiliq tarixtiki yuqiri ornigha yéngidin ige bolidu.

Bu pa'aliyet jeryanida türk dunyasining her qaysi jayliridin kelgen ösmürler öz xelqining milliy en'eniwi oyunlirini teqdim qildi.

Türk dunyasi ösmürler tentenisi pa'aliyetlirining nomur körsitish programmisi 27- may charshenbe küni istanbul baghchilardiki olimpik tenterbiye meydanida ötküzüldi. Türk dunyasining her qaysi jughrapiyilerdin kelgen ösmürler öz xelqining her xil milliy xelq sen'etlirini teqdim qildi. Uyghur ösmürlermu sen'et nomur körsitip qizghin alqishqa érishti. Bu pa'aliyet t r t awazi téléwiziye qanili arqiliq neq meydandin biwasite tarqitildi.

Biz bu pa'aliyet toghrisida téximu köp melumatqa ige bolush Uyghur ösmürlerni pa'aliyetke teripligen sherqiy türkistan ma'arip we hemkarliq jem'iyitining ayallar bölümi bashliqi munewwer özUyghur xanim bilen söhbet élip barduq.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet