Türkiyediki muhajir Uyghurlar ana til we diniy terbiye dersi élishqa bashlidi

Bundin ikki ay burun türkiyening qeyseri wilayitidiki döletning a'ililik qorosigha waqitliq orunlashturulghan Uyghurlarning perzentliri Uyghur tili bilen dinini öginishke bashlidi. Qeyserige jaylashturulghan Uyghurlarning sani 800 ge yetken bolup, 150 etrapida ösmürge 3 sinipliq mektep échildi. Bu mektepte hazirche Uyghur tili, qur'ani kerim we din dersliri tesis qilin'ghan bolup, aldimizdiki künlerde türk tili dersi bilen Uyghur tarixi dersimu tesis qilinidiken.

Uyghurlar orunlashturulghan a'ile qorosining ichige qurulghan bu 3 sinipliq mektep qeyseri sheherlik hökümet bilen bezi xeyir saxawetchi türkler teripidin qurulghan bolup, mektepte 3 Uyghur oqutquchi ders bermekte. Biz bu mektep toghrisida melumat igilesh üchün bu Uyghurlarni orunlashturush ishlirigha mes'ul séyit tümtürk ependi bilen söhbet élip barduq.

Séyit tümtürk ependi, xitay hökümitining assimiliyatsiye siyasitining ziyinigha uchrighan bu Uyghurlarning perzentlirining ana wetinidin uzaqta ana tilini we öz dinini öginishke bashlighanliqini, chet'elde échiliwatqan bu mekteplerning Uyghur tilini qoghdap qélish üchün zor töhpe qoshidighanliqini éyitti.

Bu mektepte oqutquchiliq qiliwatqan eli bekir ependi Uyghur yash - ösmürlerning ana tilini, dinini öginish qizghinliqining intayin yuqiri ikenlikini, etigendin aqshamghiche ders ötüwatqanliqini, hazirche Uyghur tili bilen din dersi ögitiliwatqanliqini, yéqinda türkche, Uyghur tarixi we bashqa chet'el tilliri dersiliriningmu tesis qilinidighanliqini bayan qildi.