2015-Йиллиқ түркийә дөләтлик магистир вә докторлуқ оқуш мукапати илтимаси 2-айда башлиниду

Ихтиярий мухбиримиз әркин тарим
2015.01.29
turkiye-oqush-torbet.jpg http://www.turkiyeburslari.gov.tr/ Ниң торбәт көрүнүши.
turkiyeburslari.gov.tr

Түркийә баш министирлиқиға қарашлиқ ташқи түркләр вә қериндаш милләтләр башқармисиниң тор бетидә билдүрүшичә, түркийә оқуш мукапати 2015-йиллиқ магистир вә докторлуқ оқуш илтимаси феврал ейида башлинип, илтимас вақти 30 күн давамлишидикән.

2014-Йили түркийәдә бакалаврлиқ, магистирлиқ вә докторлуқта оқуш үчүн, 176 дөләттин 82 миң оқуғучи илтимас қилған болуп, буниң ичидин тәләпкә лайиқ болған 4 миң әтрапида оқуғучи қобул қилинған. 2015-Йили һәрқайси дөләтләрдин түркийәдә оқушқа илтимас қилидиғанларниң сани техиму көп бөлиши мумкин. Әмма қобул қилинидиған оқуғучи сани 4000-4500 әтрапида болидиғанлиқи тәхмин қилинмақта. Мәйли қайси дөләттин қанчә көп киши илтимас қилишидин қәтий нәзәр, һәрқайси қитәләрдики дөләтләр бойичә баһалаш елип баридиған болғачқа, мәлум бир дөләткә муқим қилип айрип берилгән сан йоқ. Кимниң оқуш нәтиҗиси яхши вә йүз туранә имтиһанда қайил қиларлиқ нәтиҗә алалиса, бу оқушни шу қолға кәлтүрәләйду. Буниңдин көрүвелишқа болидуки, риқабәт интайин күчлүк, таллаш адил болидикән.

Түркийә баш министирлиқиға қарашлиқ ташқи түркләр вә қериндаш милләтләр башқармисиниң тор бәтлиридә түркийә дөләтлик магистирлиқ вә докторлуқ оқуш мукапати илтимаси һәққидә диққәт қилишқа тегишлик муһим нуқтилар

2015-Йили магистирлиқ вә докторлуқ оқуши үчүн түркийә дөләтлик оқуш мукапатиға илтимас қилғучи намзатларға қоюлидиған шәртләр елан қилинди.
http://www.turkiyeburslari.gov.tr/ Да мундақ баян қилинди:

2015-Йили түркийә магистирлиқ, докторлуқ вә тәтқиқат оқуш мукапати программисиға илтимас қилғучи намзатларға қоюлидиған шәртләр төвәндикичә:
1. Чәтәллик болуши (түркийә җумһурийити пуқралири вә һәрқандақ сәвәб түпәйлидин түркийә пуқралиқидин чиқип кәткәнләр тизимлиталмайду);
2. Түркийәдә оқушиға тосалғулуқ қилидиған әһвалниң болмаслиқи;
3. Магистирлиқ вә докторлуққа тизимлитиш үчүн толуқ курсни пүттүргән болуши яки тизимлитидиған йили оқуш пүттүридиған болуши; тәтқиқат үчүн тизимлатмақчи болғанлар докторлуқтин лаяқәтлик имтиһанини берип болған болуши яки докторлуқни пүттүрүп болған болуши;
4. Магистирлиққа тизимлатмақчи болғанлар: 1985-йил 1-айниң 1-күнидин кейин туғулған болуши;
Докторлуққа тизимлатмақчи болғанлар: 1980-йил 1-айниң 1-күнидин кейин туғулған болуши;
Тәтқиқат үчүн тизимлатмақчи болғанлар: 1970-йил 1-айниң 1-күнидин кейин туғулған болуши;
5. Униңдин бурун түркийә җумһурийитиниң һәрқандақ бир дөләт оргинидин аспирантлиқ, докторлуқ яки тәтқиқат үчүн оқуш мукапати алмиған болуши;
6. Түркийәдики университетларда аспирантлиққа тәң дәриҗидики оқушта тизимлики болмаслиқи;
7. Толуқ курс вә яки аспирантлиқни түркийәдә түгәткәндин кейин, техиму юқири өрләп оқумақчи болғанлар “оқуғучи таллаш вә орунлаштуруш мәркизи-ÖSYM” тәрипидин елинидиған “тәтқиқатчи вә аспирантлиққа кириш имтиһани-(ALES)” дин 45 тин юқири алған болуши яки мунасивәтлик университет рәһбәрлири бәлгилигән хәлқарада етирап қилинидиған GRE яки GMAT қа охшаш бир имтиһанниң нәтиҗиси болуши керәк.
Илтимас қилиш үчүн керәклик материяллар:

1. Зөрүр керәклик материяллар:
Паспорт вә сикән нусхиси
Икки суңлуқ рәсим вә сикән нусхиси
Алақә телефон номури вә почта адреси
Алий мәктәп бакалаврлиқ дипломи вә сикән нусхиси
Алий мәктәп бакалаврлиқ яки магистирлиқ дәрс нәтиҗилири вә сикән нусхилири
Алий мәктәп баклавурлуқ яки магистирлиқ дәрс нәтиҗилири инглизчә нусхилири
2. Ихтиярий, әмма таллиништа һәл қилғуч муһим әһмийити болған материяллар:
Тил кинишкилири вә сикән нусхилири: хәнзучә сәвийә синаш кинишкиси (HSK), инглизчә кинишкилар (CET-4, 6, TOEFL, IELTS)
Мукапатлар: оқуш җәрянида алған һәрхил мукапат кинишкилири (оқуш мукапати, тәнтәрбийә, сәнәт вә кәшпият қатарлиқ саһәләрдә еришкән мукапатлар)
Түркчә тил кинишкиси: түркчә курс дипломлири яки түркчә сәвийә синаш кинишкиси (TYS)
Икки парчә тәвсийә хети: алий мәктәп оқутқучиси вә өзиңиз оқумақчи болған саһәдики кәсип игисиниң тәвсийә хәтлири

Түркийәдә магистирлиқ вә докторлуқ оқушиға тордин илтимас қилған уйғур оқуғучиларниң диққәт қилишиға тегишлик муһим нуқтилар

Түркийәдә оқуш мукапатиға илтимас қилған уйғур оқуғучи намзатлириниң төвәндики бир қанчә нуқтиларға әһмийәт бәргәндә, таллашта ғәлибә қилиш пурсити техиму чоң бөлиши мумкин.
1) Түркийә оқуш мукапати түрини вә түркийә оқуш мукапати бәлгилимисини тәпсилий көрүп оқуп чиқиң.
Түркийәдә оқуш илтимас тор бети http://www.trscholarships.org/ Түркчә вә инглизчә болғачқа, илтимас җәдвилини тоғра вә толуқ толдуруш үчүн, бу икки тилдин бирини яхши билишиңиз керәк. Әгәр инглизчә яки түркчә билмисиңиз, бу тиллардин бирини яхши билидиған вә алий мәктәпни пүттүргән биридин (магистирлиқ яки униңдин юқири оқуш тарихиға игә болған кишидин) ярдәм тәләп қилсиңиз болиду.
2) Илтимаста тәләп қилған пүтүн материялларни рәңлик сикән(савмияв) қиливелип, бармақ дискиңизға рәсим (JPEG) шәклидә қачиливелиң.
http://www.trscholarships.org/ Торидики илтимас қәдәм басқучлирини әстайидил толдуруң. Тәләп қилған пүтүн материялларни торға йүкләп, пүтүн басқучларни бесип болғандин кейин, баштин ахири тәпсилий тәкшүрүп, кәм яки хаталиқларни түзитип, әмди болди дегәндә, андин әң ахирқи тәстиқлашни тамамлисиңиз болиду.
3) Мәктәп таллашта, оқуш әһвалиңиз алаһидә яхши болған тәқдирдиму, пүтүн мәктәпләрни истанбул, әнқәрә вә измир қатарлиқ чоң шәһәрләрдин таллимаң.
Сиз таллайдиған 12 мәктәпни таллиғанда, истанбулдин 1 яки 2 ни, әнқәрәдин 1 яки 2 ни вә измирдин 1 яки 2 мәктәп таллап, қалған 6 яки 6 дин көп мәктәпни чоқум бу үч чоң шәһәрдин башқа шәһәрләрдин таллаң. Есиңиздә болсунки, сиз 12 арзуға 12 мәктәпни толуқ толдурушиңиз керәк.
4) Кәсип таллашта: аспирантлиқ вә докторлуқ оқуши үчүн, әң яхшиси толуқ куруста оқуған кәсипни яки йеқинрақ кәсипни таллаң.
Толуқ курусқа кәсип таллиғанда яхши ойлинип өзиңиз әң яхши көридиған, өзиңизниң қабилийитини әң яхши җари қилдуралайдиған кәсипни вә шуниңға йеқин келидиған кәсипләрнила таллаң. Мәсилән: иҗтимаий пәндә оқуймән дәп, бир мәктәптин әдәбият, бир мәктәптин тарих, бир мәктәптин иқтисад, бир мәктәптин хәлқара мунасивәт, бир мәктәптин хәлқара сода вә йәнә бир мәктәптин иқтисад дегәндәк кәсипләрниң һәммисини талливалмаң. Тәбиий пәндә оқуймән дәп, бир мәктәптин физика, бир мәктәптин химийә, бир мәктәптин математика, бир мәктәптин компютер, бир мәктәптин машинисазлиқ вә йәнә бир мәктәптин биологийә дегәндәк кәсипләрниң һәммисини талливалмаң. Материялиңизни көрүп сизни таллайдиған киши сизни ениқ бир нишани йоқ, кәсип әһли болушқа лаяқәтсиз бир оқуғучи икән дәп шалливетиш еһтимали юқири болуп, риқабәттә уттуруп қойисиз. Шуңа сиз таллимақчи болған 12 мәктәптин өзиңиз әң яхши көридиған вә өзиңизниң қабилийитини әң яхши җари қилдуралайдиған кәсипни вә шуниңға йеқин келидиған кәсипләрнила таллаң.
5) Мәктәп таллашта, 12 мәктәп тәртипини һәргизму даңлиқлиқ дәриҗиси билән тизмаң, бәлки сизгә мас келидиған тәртиптә болсун.
Һечқандақ инглизчә нәтиҗиңиз юқ вә оттуричә нәтиҗиңиз 60 әтрапида туруп, оттура шәрқ техника университети, боғазичи университети вә истанбул техника университети дегәндәк инглиз тилида оқутуш елип баридиған мәктәпләрни талливалмаң. Сиз бу хилдики мәктәпләрни таллимақчи болғанда, екранда сизгә агаһландуруш берилиду.
6) Кәсип таллашта, толуқ курс вә магистирлиқ оқушида қайси кәсипни оқуған болсиңиз, өрләп оқуштиму шу кәспини вә йеқин келидиған кәсипни таллаң.
Әгәр сизниң бурунқи кәспиңиз билән өрләп оқумақчи болған кәспиңиз бир бири билән пәқәтла мунасивити болмиса, таллиниш пурситиңиз йәнә төвән болуп қалиду. Таллаштин ғәлибилик өтсиңизму, түркийәгә оқушқа барғандин кейин, мәктәпләр сиздин кәспи тәйярлиқ елишиңизни тәләп қилип, толуқ курстики кәспи дәрсләрдин 8 дин 10 ғичә дәрсни бир йилда толуқ ғәлибилик пүттүрүшиңизни тәләп қилиду. Әгәр кәспи тәйярлиқта бир пәндин өтәлмисиңиз, сизгә уйғуркән дәп етибар бериштә йоқ, әксичә, түркийә алий маарип комитетиниң бәлгилимисигә асасән, қилчә рәһим қилинмай мәктәптин һәйдилисиз, оқуш мукапати вә мәктәпму йоқ болиду. Түркийәдин қайтип кетишкә мәҗбур болисиз.
7) Кәсип таллашта, инглизчә оқутуш елип берилидиған кәсипләрни таллаш үчүн, әгәр сизниң инглизчә TOEFL / IELTS вә GRE қатарлиқ имтиһанлардин омуми номур вә йәккә түрләрдики номуриңиз мәктәпләрниң сиз таллимақчи болған кәсипкә қойған өлчимигә чүшсә, андин инглизчә оқутуш елип баридиған охшаш кәсип үчүн 2 яки 3 мәктәпни таллисиңиз болиду. Қалғанлирини түркчә оқутуш елип баридиған кәсип вә мәктәпләрни таллисиңиз таллиниш пурситиңиз юқири болиду.
8) Җәдвәл толдурғанда юлтуз бәлгиси(*) қуюлғанларниң һәммисини толдурғандин сирт, бәлгә қоюлмиғанларниму чоқум толдуруң вә тәләп қилинған материялларниңму бәлгә қоюлсун яки қоюлмисун һәммини йоллаң, амал бар бош йәр қалмисун.
9) Қизиқимән дәпла кәспиңиз билән қилчә мунасивити болмиған кәсипни талливалмаң, пәвқуладдә қабилийитиңиз болуп, таллиғучини қайил қилалмисиңиз таллиниш еһтималиңиз төвән болуп қалиду.
10) Тордин илитимас җәдивелини толдурғанда, өзиңизниң немә үчүн түркийәдә оқуш арзуйиңиз барлиқини язидиған қисмиға алаһидә әһмийәт бериң вә йүз туранә имтиһандиму мушу қисимға язған мәзмунни чөридигән асаста баян қилиң.
11) Оқуш мукапат түридин қанчә түрни таллаш имканиңиз болса вә оқуш әһвалиңиз мас кәлсила һәммини таллаң. Амма таллиған кәсипләр бир-биргә мунасивәтлик болсун. Болмиса бу оқуғучи немә оқушини билмәйдикән дәп илғинип кәтмәң.
12) Есиңиздә болсунки, бу оқушқа қобул қилишта, түркийә тәрәп илтимас қилғучиларниң оқуш нәтиҗисиниң юқири болушини тәләп қилиш билән биргә, ғайилик, аң сәвийилик болушиғиму алаһидә әһмийәт бәрмәктә, болупму оқуғучида тиришип оқуйдиған бир ирадиниң болушиға қаралмақта.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.