Түркийәниң 2016-йиллиқ оқуш мукапати илтимаси рәсмий башланмақчи

Ихтиярий мухбиримиз әркин тарим
2016-02-25
Share
turkiyede-oqush-mukapat-puli.jpg Түркийә дөләтлик оқуш мукапатиға илтимас қилиш уқтуруши. 2016-Йили феврал.
turkiyeburslari.gov.tr

Түркийә баш министирлиқиға қарашлиқ муһаҗирәттики түркләр вә қериндаш милләтләр башқармисиниң тор бетидә билдүрүшичә, түркийә оқуш мукапати 2016-йиллиқ толуқ курс, магистир вә докторлуқ оқуш илтимаси 2-айниң 28-күни башлинип, 3-айниң 31-күни ахирлишидикән. Илтимас қилиш пәқәтла тор арқилиқ болидиған болуп, башқа йоллар билән қилинған илтимас қобул қилинмайдикән. Илтимас қилғучилар торда елан қилинған кәсипләрдин өзи халиған бирини таллиса болидикән. Түркийәдә оқуш мукапатиға еришкән оқуғучилар түркийәдә бир йил тәйярлиқ синипида түркчә өгәнгәндин кейин кәсип оқушини башлайдикән.

Бу һәқтики уқтурушниң тәпсилати берилгән www.turkiyeburslari.gov.tr Намлиқ тор бетидә көрситилгәнләргә асасланғанда, айда берилидиған оқуш мукапат пули толуқ курс оқуғучилири үчүн 600 түрк лираси, магистир оқуғучилар үчүн 850 түрк лираси, докторлуқ оқуғучилар үчүн 1200 түрк лираси икән. Оқуш һәқсиз болуп келиш-кетиш айропилан белити ятақ вә саламәтлик суғуртиси дөләт тәрипидин төлинидикән.

Уқтурушта йәнә түркийә дөләтлик толуқ курс, магистирлиқ вә докторлуқ оқуш мукапати илтимаси һәққидә диққәт қилишқа тегишлик муһим нуқтилар көрситилгән болуп, намзатлар чәтәллик болуши, түркийәдә бир университетта оқуватқан болмаслиқи, әң кәч 2016-йили 7-айниң30-күнидин бурун оқуш пүттүридиған болуши, магистирлиққа тизимлатмақчи болғанлар: 1986-йил 1-айниң 1-күнидин кейин туғулған болуши, докторлуққа тизимлатмақчи болғанлар: 1981-йили 1-айниң 1-күнидин кейин туғулған болуши, омумий дәрс нәтиҗиси 75% пирсәнт болуши тәләп қилинған.

Бу һәқтә зияритимизни қобул қилған түркийәниң әнқәрә шәһиридики оттура асия түркий җумһурийәтлиридин кәлгән оқуғучиларға түркчә өгитиватқан вә университетқа илтимас қилишиға мәслиһәтчилик қиливатқан мәңгүташ тил мәркизи мудири рәна қарахан ханим илтимас қилишниң шәртлири тоғрисида мәлумат бәрди. У, оқуғучилар кәсип таллиғанда мунасивәтлик кәсипләрни таллимиса шаллинип кетидиғанлиқини баян қилди.

Түркийәдики измир әгә университети оқутқучиси профессор алимҗан инайәтму түркийәдики алий мәктәпләрниң 250 дин ашидиғанлиқи, уйғур оқуғучиларниң мәктәп таллиғанда пәқәт истанбул вә әнқәрәдики мәктәпләрнила таллимай башқа шәһәрләрдики мәктәпләрниму таллиши керәкликини билдүрди.

2015-Йили түркийәдә бакалаврлиқ, магистирлиқ вә докторлуқта оқуш үчүн, 150 миң оқуғучи оқуш мукапат пули үчүн илтимас қилған болуп, буниң ичидин 5 миң оқуғучи таллинип түркийәдики университетларға орунлаштурулған. 2015-Йили уйғурлардин 50 оқуғучи түркийә университетлириға орунлаштурулған. Мәйли қайси дөләттин қанчә көп киши илтимас қилишидин қәтийнәзәр, һәрқайси қитәләрдики дөләтләр бойичә баһалаш елип берилидиған болғачқа, мәлум бир дөләткә муқим қилип айрип берилгән сан йоқ икән, кимниң оқуш нәтиҗиси яхши вә йүз туранә имтиһанда қайил қиларлиқ нәтиҗә алалиса, шу таллинидикән, риқабәт интайин кәскин, әмма таллаш адил икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.