Түркийәниң магистир вә докторлуқ оқуш мукапати илтимаси башлиниду

Ихтиярий мухбиримиз әркин тарим
2017-01-04
Елхәт
Пикир
Share
Принт
Түркийә баш министирлиқиға қарашлиқ ташқи түркләр вә қериндаш милләтләр башқармисиниң торбетидики оқуш мукапати тоғрисидики чүшәндүрүшниң баш бети.
Түркийә баш министирлиқиға қарашлиқ ташқи түркләр вә қериндаш милләтләр башқармисиниң торбетидики оқуш мукапати тоғрисидики чүшәндүрүшниң баш бети.
turkiyeburslari.gov.tr

Түркийә баш министирлиқиға қарашлиқ ташқи түркләр вә қериндаш милләтләр башқармисиниң тор бетидики еланға асасланғанда, түркийә оқуш мукапати 2017-йиллиқ магистир вә докторлуқ оқуш илтимаси 1-айниң 16-күни башлинип, 2-айниң 17-күни түркийә вақти кечә саәт 24:00 кечә давамлишидикән. Илтимас қилғучи оқуғучилар бу 30 күн ичидә илтимас қилса болидикән.

https://www.turkiyeburslari.gov.tr/ Тор бетидики еланда дейилишичә, магистирлиқ үчүн илтимас қилиш яш чәклимиси 1987-йили 1-айниң 1-күнидин кейин туғулған болуши, докторлуққа илтимас қилиш яш чәклимиси 1982-йили 1-айниң 1-күнидин кейин туғулған болуши шәрт икән.

Мәркизи истанбулда турушлуқ уйғур академийәси башқуруш һәйити әзаси мәмәт онсу әпәнди түркийә дөлити тәрипидин бериливатқан бу оқуш пулиниң немиләрни өз ичигә алидиғанлиқи тоғрисида мәлумат бәрди.

Қиммәтлик радийо аңлиғучилар, түркийә дөлити тәрипидин берилидиған оқуш мукапат пулиға еришкән оқуғучилар магистирлиқни пүттүргәндин кейин,докторлуқ оқушни давамлаштуримән десә, юртиға қайтип берип икки йил ишлигәндин кейин, докторлуқ оқуш мукапат пули үчүн илтимас қилалайду. Түркийә дөләт оқуш мукапати пули билән магистирлиқ оқуған мәмәт онсу әпәнди бу һәқтә мәлумат бәрди.

У, түркийә дөлити оқуш мукапат пулини оқуғучилар оқуш пүттүргәндин кейин өз дөлитигә қайтиш шәрқи билән бериливатқанлиқини, әмма уйғур оқуғучиларниң көпиниң юртиға қайтмай өз имканлири билән докторлуқ оқуватқанлиқини баян қилди.

Түркийә дөлитиниң оқуш мукапат пулидин башқа, түркийәдики бәзи университетлар, вәқип вә җәмийәтләрму оқуш мукапат пули бериду. Истанбулда паалийәт елип бериватқан уйғур академийәси рәиси аблимит қарахан әпәнди бу һәқтә мәлумат бәрди.

У, уйғур академийәси қурулғандин бери, оқуғучиларға оқуш пули бериватқан түркийә сиртидики түркләр вә қериндаш милләтләр идариси билән һәмкарлашқандин сирт, өзлириму мәмәтәли тәвпиқ оқуш мукапати тәсис қилип уйғур оқуғучиларни оқутуватқанлиқини баян қилди.

2016-Йили түркийәдә бакалаврлиқ, магистирлиқ вә докторлуқта оқуш үчүн, 185 дөләттин 95 миң оқуғучи илтимас қилған болуп, буниң ичидин тәләпкә лайиқ болған 5 миң әтрапида оқуғучи қобул қилинған. 2017-Йили һәрқайси дөләтләрдин түркийәдә оқушқа илтимас қилидиғанларниң сани техиму көп болуши мумкин. Әмма, қобул қилинидиған оқуғучи сани 6000-6500 әтрапида болидиғанлиқи тәхмин қилинмақта. Мәйли қайси дөләттин қанчә көп киши илтимас қилишидин қәтийнәзәр, һәрқайси қитәләрдики дөләтләр бойичә баһалаш елип баридиған болғачқа, мәлум бир дөләткә муқим қилип айрип берилгән сан йоқ. Ким оқуш нәтиҗиси яхши вә йүз туранә имтиһанда қайил қиларлиқ нәтиҗә алалиса, бу оқушни шу қолға кәлтүрәләйду. Буниңдин көрүвелишқа болидуки, риқабәт интайин күчлүк, таллаш адил болидикән.

Түркийә баш министирлиқиға қарашлиқ ташқи түркләр вә қериндаш милләтләр башқармисиниң тор бәтлиридә түркийә дөләтлик магистирлиқ вә докторлуқ оқуш мукапати илтимаси һәққидә диққәт қилишқа тегишлик муһим нуқтилар тоғрисида мәлумат игиләшни халисиңиз https://www.turkiyeburslari.gov.tr/ Тор бети билән http://www.akademiye.org Тор бетини зиярәт қилсиңиз болиду.

Пикирләр (0)
Share
Толуқ бәт