Türkiyening 2018-yilliq oqush mukapatigha iltimas qilish resmiy bashlandi

Ixtiyariy muxbirimiz erkin tarim
2018.04.16
Share on WhatsApp
Share on WhatsApp
turkiyede-oqush-2018-mukapat.jpg Türkiyening 2018-yilliq oqush mukapatigha iltimas qilish toghrisidiki uqturush.
turkiyeburslari.gov.tr

Türkiye bash ministirliqigha qarashliq chet'ellerdiki türkler we qérindash milletler bashqarmisining tor bétidiki élan'gha asaslan'ghanda, türkiyening 2018-yilliq toluq kurs boyiche oqush mukapatigha iltimas qilish 4-ayning 16-küni resmiy bashlandi.

Mezkur iltimas qilish 5-ayning 14-künigiche bir ay dawamlishidighan bolup, buninggha chet'eldiki xitay pasporti bar Uyghur oqughuchilarmu iltimas qilsa bolidiken. Iltimas qilghuchilardin kimlerning türkiye dölitining oqush mukapat puligha érishkenliki, 2018-yili 24-iyul küni élan qilinidiken.

Mezkur tor bétidiki élanda déyilishiche, bakalawrliq üchün iltimas qilidighanlarning yash cheklimisi 1997-yili 1-ayning 1-künidin kéyin tughulghan bolushi kérek iken. Buningdin bashqa yene néme shertlerni teyyarlishi kérek? merkizi istanbulda turushluq Uyghur akadémiyesi bash katipi dilnur qeshqiri xanim bu heqte melumat berdi.

Dilnur qeshqiri xanim türkiye döliti teripidin bériliwatqan bu oqush pulining némilerni öz ichige alidighanliqi toghrisida melumat berdi. Mezkur idarining bu heqtiki élani we dilnur qeshqirining éytishiche, oqughuchilarning ayliq oqush mukapati 700 türk lirasi, yeni texminen 180 amérika dolliri we bir yil türkche öginish heqsiz bolidiken.

Uyghur akadémiyesi mu'awin re'isi exmetjan polat ependi hazir misirdin we bashqa bezi döletlerdin kélip türkiyede oqush pursiti kütüwatqan köp sanda oqughuchi barliqini, bularning ichide sherti toshqanlarning buninggha iltimas qilsa bolidighanliqini bayan qildi.

Hazir kastamonu uniwérsitétida oquwatqan subinur ömer türkiye Uyghurlarning oqushi üchün yaxshi dölet ikenlikini, türkche Uyghurchigha yéqin bolghachqa til ötkilidin ötüshning asanliqini, 700 türk lirasi oqush mukapat pulining ayliq turmushqa yétidighanliqini bayan qildi.

2017-Yili türkiyede bakalawrliq, magistirliq we doktorluq unwanliri üchün oqushqa 192 dölettin 100 ming etrapida oqughuchi iltimas qilghan bolup, buning ichidin telepke layiq bolghan 7 ming etrapida oqughuchi qobul qilin'ghan.
Hazirqi weziyetke asaslan'ghanda bu yil Uyghur oqughuchilar Uyghur diyaridin biwasite kélelmeydiken.

Türkiyede bash ministirliq tarmiqidiki chet'ellerdiki türkler we qérindash milletler bashqarmisining oqush mukapat puli bérish siyasiti 2012-yili bashlan'ghan bolup hazirghiche buningdin behrimen bolghan Uyghur oqughuchilarning sani 500 etrapida iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.