Уйғур академийәси йеңи нөвәтлик идарә һәйитини сайлап чиқти

Ихтиярий мухбиримиз арслан
2018-08-29
Елхәт
Пикир
Share
Принт
Истанбулда өткүзүлгән уйғур академийисиниң сайлам йиғинидин бир көрүнүш. 2018-Йили 24-авғуст. Истанбул, түркийә.
Истанбулда өткүзүлгән уйғур академийисиниң сайлам йиғинидин бир көрүнүш. 2018-Йили 24-авғуст. Истанбул, түркийә.
RFA/Arslan

Мәркизи истанбулға җайлашқан уйғур академийәси 23-24-авғуст күнлири кеңәш өткүзүп, йеңи нөвәтлик идарә һәйәтлирини сайлап чиқти.

Сайлам демократик шәкилдә беләт ташлаш усули билән өткүзүлгән болуп, йеңидин сайлап чиқилған намзатлар уйғур академийисиниң идарә һәйәтлири тәркибидин орун алди.

Уйғур академийисиниң йеңи нөвәтлик рәисликигә түркийәниң измир шәһиридики әгә университети түрк дуняси тәтқиқат институтиниң профессори, доктор алимҗан инайәт әпәнди сайланди. Уйғур академийисиниң йеңи нөвәтлик идарә һәйитиниң даимий әзалиқиға профессор алимҗан инайәт, доктор пәрһат қурбан тәңритағли, доктор шәвкәт насир, доктор мәғпирәт камал вә абдулһәмит қарахан қатарлиқ кишиләр сайланди.

Бу қетимлиқ сайламда уйғур академийисиниң сабиқ рәиси абдулһәмит қарахан әпәнди академийәниң йеңи нөвәтлик иҗраийә рәисликигә, пәрһат қурбан тәңритағли баш катиплиққа сайланди.

Уйғур академийисиниң бу қетимлиқ сайлам нәтиҗиси 25-26-авғуст күнлири елан қилинған болуп, уйғур академийисиниң йеңи нөвәтлик рәиси алимҗан инайәт билән иҗраийә рәиси абдулһәмит қарахан сайлам нәтиҗисини оқуп өтти. 

Уйғур академийисиниң иҗраийә рәиси абдулһәмит қарахан зияритимизни қобул қилип, уйғур академийисиниң хизмәт паалийәтлири тоғрисида қисқичә мәлумат бәрди. У уйғур академийисиниң бу йил 5-айда америкида шөбиси қурулғанлиқини, буниңдин кейин явропа әллири, японийә вә оттура асия дөләтлиридиму уйғур академийисиниң шөбилирини ечиш пилани барлиқини тәкитләп өтти. 

Абдулһәмит қараханниң билдүрүшичә, уйғур академийәси 2009-йили 9-айниң 9-күни муһаҗирәттики бир қисим зиялийлар, билим игилири вә оқуғучиларниң бирликтә уюшуши билән истанбулда қурулған икән. Һазир дуняниң һәрқайси җайлирида уйғур академийисиниң 80 нәпәрдин көпрәк әзаси бар болуп, әзалар санини 300 гә йәткүзүш пилани бар икән. 

Уйғур академийисиниң йеңидин сайланған рәиси алимҗан инайәт әпәнди зияритимизни қобул қилип, уйғур академийисиниң бу қетимлиқ сайлам кеңиши вә сайлам елип бериштики конкрет сәвәбләр тоғрисида тохталди. У уйғур хәлқи тарихниң әң қийин мәзгиллиридә туруватқан бүгүнкидәк бир қийин мәзгилдә уйғур билим игилириниң чоқум ойғиниши керәкликини, буниңда уйғур академийисиниң өз ролини толуқ җари қилдуруп, муһаҗирәттики уйғур зиялийлириниң билим вә әқил күчидин пайдилиниш һәмдә уни уйғур хәлқиниң нөвәттики қийин әһвалидин қутулуши үчүн хизмәт қилдурушқа йетәклишиниң зөрүрлүкини алаһидә тәкитләп өтти. 

Тәпсилатини юқириқи аваз улиништин аңлиғайсиләр.

Пикирләр (0)
Share
Толуқ бәт