Ata - anilarning inkasi :“Uyghurlarning balilirini mektepke tizimlitishi tes bolmaqta”

Muxbirimiz gülchéhre
2014.08.19
Share on WhatsApp
Share on WhatsApp
uyghur-yeza-namrat-mektep-1.jpg Uyghur yéziliridiki namrat mektep.
weibo.com


Oqughuchilarning yazliq tetili ayaghliship, - 12014 yilliq küzlük yéngi oqush mewsumi bashlinish aldida turidu, nöwette Uyghur élining her qaysi jayliridiki bashlan'ghuch, ottura mekteplirige tizimlitish bashlandi. Bezi ata - anilarning inkasigha qarighanda, bu yildin bashlap mekteplerge tizimlitishta telep qilinidighan höjjetler köpeytilip, ata - anilarning balilirini mektepke aldurush resmiyitini béjirishi téximu müshkülleshken.

Buning eksiche, da'iriler xitay köchmenlerning perzentlirini Uyghur élidiki mekteplerge aldurush üchün bolsa “Yéshil karidor” namida resmiyetni asanlashturush siyasetliri yürgüziwatqan bolup, bu xil oxshimaydighan mu'amile Uyghur ata - anilarni narazi qilmaqta iken.

Uyghur élidiki her qaysi bashlan'ghuch we ottura mekteplerge oqughuchi tizimlash ishliri asasen 20 - awghusttin 25 - awghustqiche dawamlishidighan bolup, mekteplerge oqughuchi tizimlash heqqide aptonom rayonluq ma'arip tarmaqlirining tarqatqan omumiy uqturushi bolmisimu, emma her qaysi derijilik jaylarda mekteplerning oqughuchi tizimlash shertliride özgirish bolghan yeni oqughuchini mektepke aldurushta ata - anilardin telep qilinidighan ispat we höjjetlerning türi besh, alte xilgha yetken.

Yeni ilgiri bir balini bashlan'ghuch mektepke aldurush üchün ata - ana yaki balining qanunluq qoghdighuchisi peqet balining tughulush ispati yaki nopus deptirini élip, özi turushluq rayon tewelikidiki mektepke béripla tizimgha aldursa bolatti, bu yil mektepke tizimlitish üchün az dégende besh höjjetni teq qilishi shert iken. Uyghurlarning balilirini mektepke tizimlitishi üchün asasen :

- 1 Nopus

- 2 Olturushluq adrisning öy xéti yaki ikki yildin artuq ijare höjjiti.

- 3 Az dégende ikki yilliq qosh til yeslisini tamamlighanliq guwahnamisi.

- 4Pilanliq tughut guwahnamisi

- 5Ata - anisining kimlik yaki bala bilen bolghan munasiwet pakiti qatarliqlar telep qilinidiken.

Egerde rayon atlap yaki sheher atlap kelgenler bolsa béjiridighan resmiyetlirining sani téximu köp iken.

Uningdin bashqa, ata - anilar balilirini mektepke bérishning aldida xitay tilliq sinipqa yaki qosh tilliq sinipqa bérishni éniq tallap békitishi shert bolup, buningdin kéyin bashlan'ghuch mektepning 6 yilliq oqushini tamamlashtin burun sinip almashturushqa yol qoymaydiken.

Eger nopus bilen öy resmiyitidiki adrés yaki bashqa türlerde oxshimasliq bolsa, munasiwetlik orunlardin ispat ekelmigiche tizimlitilmaydiken. Mushuninggha oxshash balilarni mektepke kirgüzüshte shert qilin'ghan resmiyetlerni béjirishmu asan emes bolup, bolupmu ürümchige bashqa sheherlerdin kélip orunlashqan Uyghurlarning balilirini mektepke aldurush téximu müshkül bolmaqta iken. Bu heqte xotendin xizmiti ürümchige yötkilip balisini ürümchidiki bashlan'ghuch mektepke orunlashturush üchün resmiyetlirini béjiriwatqan bir ana özining qedemmu qedem tosqunluqqa uchrap kéliwatqanliqini shikayet qildi.

Buningdin ilgiri Uyghurlarning balilirini mektepke tizimlitish resmiyiti intayin addi bolup, qeshqerdiki melum bashlan'ghuch mektep mudiri ziyaritimizni qobul qilghanda, ata - anilarning peqet nopusini kötürüp teweliktiki mektepke kélipla tizimlatsa bolidighanliqini éytqan idi.

Balisini ürümchidiki bashlan'ghuch mektepte oqutush üchün resmiyet béjiriwatqan ismini ashkarilashni xalimighan yash anining közitishiche, Uyghurlargha bu xil resmiyetlerni béjirish qiyinlashqan bir peytte eksinche xitay déhqan ishlemchilerning balilirini mektepke tizimlitishini asanlashturush üchün mektepler we da'iriler“Yéshil karidor” "namida mexsus étibar bérish siyasetliridin bashqa, resmiyet béjirish közniki yaki ishxanilarni, xadimlarni tesis qilghan we ürümchi noposining barghanche küpiyishige egiship bashlan'ghuch, ottura mekteplerde oqughuchilar sani éship kétishtek ehwallar küörülüwatqan bolup, egerde resmiyetlirini waqtida béjirelmigende, sandin ashqan oqughuchilarni yiraqraq bashqa mekteplerge tizimlitishqa hemde ata - anilar resmiyetlerni yene qaytidin toluqlashqa mejbur bolidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.