Или педагогика институти: «доктор ниҗат сопи мәктәптин қоғланди»

Мухбиримиз меһрибан
2018-10-08
Елхәт
Пикир
Share
Принт
Или педагогика институти мәктәп дәрвазисида көзәтчилик қиливатқанлар.
Или педагогика институти мәктәп дәрвазисида көзәтчилик қиливатқанлар.
Ili pédagogika instituti amanliq bölümining tor bétidin élin’ghan bwc.ylsy.edu.cn

Или педагогика институти Филологийә факултетиниң дотсенти, доктор ниҗат сопиниң бу йилниң башлирида аталмиш «тәрбийәләш мәркизи» намидики хитайниң җаз лагериға елип кетилгәнлики һәққидә хәвәрләр тарқалди.

Доктор ниҗат сопини йеқиндин билидиған бирәйләнниң өз кимликини ашкарилимаслиқ шәрти билән радийомизға билдүрүшичә, 2017-йилиниң ахириға кәлгәндә или педагогика институтиниң ниҗат сопи қатарлиқ бир түркүм уйғур оқутқучилириниң тәкшүрүлүватқанлиқи һәққидә хәвәр тарқалған икән. Униң билдүрүшичә, 2018-йили йеңи йилдин кейин, йәни қишлиқ тәтил мәзгилидә или педагогика институтидин бир түркүм уйғур оқутқучиларниң ғулҗидики өгиниш мәркәзлиригә елип кетилгәнлики ашкарилинишқа башлиған.

У зияритимизни қобул қилип, мундақ деди: «биз бултур йил ахири мәктәптики ниҗат сопи қатарлиқ бир түркүм уйғур оқутқучиларниң тәкшүрүлүватқанлиқи һәққидә хәвәр аңлиған идуқ. Бу йил йеңи йилдин кейин или педагогика институтиниң уйғур оқутқучилириниң бир қисминиң өгинишкә елип кетилгәнликини аңлидуқ. Билишимчә, уларниң арисида уйғур тили тәтқиқати билән тонулған доктор ниҗат сопиму бар икән. Әмма униң кейинки тәқдири қандақ болди, буни билмәйдикәнмән. »

Или педагогика институтидин бу һәқтә әһвал игилигинимиздә доктор ниҗат сопиниң исминиң мәзкур мәктәптики оқутқучилар тизимликидин чиқириветилгәнлики мәлум болди.

Или педагогика институти мәктәп қоғдаш башқармисиниң бир хитай хадими соаллиримизға җаваб қайтуруп, доктор ниҗат сопиниң 2018-йилиниң бешида мәктәптин қоғланғанлиқи һәққидә уқтуруш чиққанлиқини билдүрди.

Әмма бу хадим телефонниң америкидин урулуватқанлиқини билгәндин кейин доктор ниҗат сопиниң немә сәвәбтин мәктәптин қоғланғанлиқи, униң қачан вә қәйәрдики җаза лагериға елип кетилгәнлики һәққидә сориған соаллиримизға җаваб бәрмәйла телефонни үзүвәтти.

Доктор ниҗат сопи һәққидә гогул амбиридин игилигән учурлардин мәлум болушичә, ниҗат сопи йеқинқи йилларда уйғурларниң фолклор мәдәнийити вә таранчи шевисигә даир чәтәлләрдә елан қилинған муһим илмий әмгәкләрни уйғурчиға тәрҗимә қилип вә изаһлап нәшр қилдурған икән.

Ниҗат сопиниң университет мәзгилидики савақдашлиридин һазир түркийәдә яшаватқан зәйнурә ханимниң билдүрүшичә, доктор ниҗат сопи 2012-йили истанбул университетиға зиярәтчи тәтқиқатчи болуп кәлгән икән.

Мәлум болушичә доктор ниҗат сопиниң түркчигә тәрҗимә қилинған бу икки әсириму униң 2011-йилдин 2012-йили арилиқида истанбул университетида зиярәтчи тәтқиқатчи болуп 6 ай турған мәзгилидә тәрҗимә қилинған икән.

Өз кимликини ашкарилимаслиқ шәрти билән зияритимизни қобул қилған, ниҗат сопини йеқиндин билидиған бир достиниң билдүрүшичә, илгири ниҗат сопиниң бир шеирлар топлими шинҗаң хәлқ нәшрияти тәрипидин нәшр қилинған икән.

Униң билдүрүшичә, доктор ниҗат сопи ғулҗиниң текәс наһийәсидин болуп, 1985-йили 9-айдин 1990-йили 7-айғичә шинҗаң университетиниң әдәбият факултетида оқуған. 1990-Йилдин башлап дәсләп текәс наһийәлик оттура мәктәптә оқутқучилиқ қилған. Кейин или педагогика институтиниң әдәбият факултетиға оқутқучи болуп йөткәлгән. 2002-Йили 9-айдин 2004-йилиғичә шинҗаң университетиниң филологийә институтида профессор арслан абдулланиң йетәкчиликидә уйғур тили бойичә магистир аспирантлиқ оқушини тамамлиған. 2004-Йили или педагогика университетниң тәлипи билән мәктәпкә қайтип бир мәзгил ишлигән. Кейинчә доктор аспирантлиқта оқуш үчүн шинҗаң университетиниң филологийә институтиға келип, устази арслан абдулланиң йетәкчиликидә докторлуқ илмий унвани үчүн оқуған.

Ниҗат сопиниң устази профессор арслан абдулламу дәл ниҗат сопи или педагогика институтидин қоғланған мәзгилләрдә, йәни 2018-йилиниң бешида тутқун қилинған. Профессор арслан абдулланиң бу йилниң башлирида профессор абдукерим раһман, профессор раһилә давут вә шинҗаң университетиниң сабиқ муавин мәктәп мудири профессор азад султан қатарлиқлар билән бир қатарда лагерға елип кетилгәнлик хәвири радийомиз тәрипидин дәлилләнгән иди. Һалбуки, хитай һөкүмити һазирға қәдәр юқирида исми тилға елинған уйғур билим игилириниң немә сәвәбтин тутулғанлиқи һәққидә ениқ бир чүшәнчә бәрмиди.

Пикирләр (0)
Share
Толуқ бәт