Гумида “қош тил” оқутушида үнүм яриталмиған оқутқучилар “коллектип күрәш” кә тартилидикән

Мухбиримиз қутлан
2016.01.14
qosh-til-oqughuchilar-305.jpg Хотән қош тил мәктипидики оқуғучилар. 2006-Йили 13-өктәбир.
AFP

Әң йеңи учурлардин мәлум болушичә, даириләр уйғур елиниң җәнуб вә шималида “қош тиллиқ маарип” намини суйиистемал қилған, әмәлийәттә хитай тилидин ибарәт йәккә тиллиқ оқутушқа мәркәзләшкән маарип системисини тез сүрәт билән омумлаштуруватқанлиқи мәлум.

Бүгүн хотәнниң гума наһийәсигә қарашлиқ “қош тиллиқ маарип” бойичә мәлум үлгилик башланғуч мәктәпниң исмини ашкарилашни халимайдиған хитай тили оқутқучиси радиомиз зияритини қобул қилди.

Униң билдүрүшичә, 640 нәпәр уйғур оқуғучи оқуйдиған бу башланғуч мәктәптә синиплар йиллиқлар бойичә “күчәйтиш синипи”, “қош тиллиқ синип” вә “адәттики синип” дәп үч түркүмгә бөлинидикән.

“күчәйтиш синипи” да оқуйдиған уйғур оқуғучилар пүтүнләй хитай тилида оқутулидикән. Уларниң дәрс арилиқида бир еғизму уйғурчә гәп-сөз қилишиға йол қоюлмайдикән. Бу синипқа дәрскә киридиған оқутқучиларниң һәммиси дегүдәк “қош тиллиқ оқутуш” бойичә тәрбийәләнгән яш оқутқучилар икән. Әгәр улар оқуғучиларниң нәтиҗисини мәктәп бәлгилигән өлчәмгә (пирсәнт бойичә) йәткүзәлмисә мәвсум ахирида “коллектип пипән (күрәш қилиш) йиғини” ечилип, қаттиқ тәнқид вә җәриманигә учрайдикән.

Биз хотәндики миллий маарип саһәсидә көрүлүватқан бу паҗиәниң уйғур елиниң башқа җайлиридиму бар ‏- йоқлуқини билип беқиш үчүн хотәндин икки миң нәччә километир йирақлиқтики аратүрк наһийәсигә телефон қилдуқ.

Аратүрк наһийәсиниң мәлум йезисидики маарипқа мәсул бир муавин йеза башлиқи зияритимизни қобул қилип, аратүрк наһийәси тәвәсидә “қош тиллиқ маарип” ниң толуқ омумлишип болғанлиқини, ноқул уйғур тилида дәрс өтүлидиған бирму мәктәпниң қалмиғанлиқини билдүрди.

Тәпсилатини аваз улиништин аңлиғайсиз.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.