Уйғуряр фонди “уйғурум анам” темисида балилар көрики өткүзмәкчи

Ихтиярий мухбиримиз әркин тарим
2017-10-20
Share
Uyghuryar-fondi-torbeti.jpg “уйғуряр фонди” торбетиниң башбети.
Photo: RFA

Күнимиздә учур-алақә васитилиридики тәрәққият муһаҗирәттә яшаватқан уйғурлар үчүн көп қолайлиқлар елип кәлди.

Йеқинда “уйғуряр фонди” башқуруш һәйитиниң қарари билән шиветсийәдә яшаватқан уйғур зиялийси күндүзай маһмут ханим, канада торонтода туруватқан адаләт ханим вә норвегийәдики гүлнар ханимларниң йетәкчиликидә “уйғур өсмүрләр ватсап топи” қурулди.

“уйғуряр фонди” ниң орунлаштуруши билән бу ишни елип бериватқан күндузай маһмут ханим уйғур тили паалийәтчиси абдувәли аюп қатарлиқларниң тәшәббуси билән мәзкур паалийәтни башлиғанлиқини, буниңдики асасий мәқсәтниң уйғур пәрзәнтлиригә ана тилини пишшиқ өгитиш икәнликини баян қилди. 

“уйғуряр фонди” йәни уйғур һәмкарлишиш фондиниң түркийәдики вәкили батур қараханли әпәнди бу һәқтики зияритимизни қобул қилип мунуларни билдүрди: “өсмүрлиримиз өзи сизған рәсим, ясиған әвришкә, ана тилда язған әсәрләр, яки язған шеир, һекайиләрни бу топқа әвәтип, тәңтушлири билән ортақлишиватиду, өзара тонушуватиду.”

Батур қараханли әпәнди бу паалийәтни қоллаш вә техиму җанлиқ һалға кәлтүрүш үчүн “уйғуряр фонди” ниң башқуруш һәйәт әзалири музакирә елип берип, “уйғурум анам” темисида балилар көрики өткүзүшни қарарлаштурғанлиқини, 3 яштин 13 яшқичә уйғур яшлириниң бу паалийәткә қатнашса болидиғанлиқини баян қилди. 

Батур қараханли әпәнди бу мусабиқигә қатнашқан балиларниң әсәрлирини 11 кишидин тәркиб тапқан бир һәйәт баһалап 12-айниң 10-күни мукапат тарқитидиғанлиқини баян қилди.

Күндузай маһмут ханим чәтәлдики уйғур балилар ичидә көп санда талантлиқ балиларниң барлиқини, мушундақ паалийәтләр арқилиқ уларниң ана тил сөйгүсини күчәйткили болидиғанлиқини, ата-аниларниң балилириға маслишип бериши керәкликини баян қилди. 

Түркийәдә докторлуқ илмий унвани үчүн оқуватқан уйғур зиялийси абдуваһит әпәнди чәтәлдә уйғурларниң көпийишигә әгишип уйғур пәрзәнтләрниңму көпийиватқанлиқини, ана тилни қоғдап қелиш үчүн бу хилдики паалийәтләрниң муһим икәнликини баян қилди. 

“уйғуряр фонди” 2016-йили 10-айда мәрипәтпәрвәр 7 уйғур зиялийси тәрипидин қурулған болуп, һазирғичә иқтисадий җәһәттин қийнилип қалған көп сандики уйғур оқуғучиға ярдәм қилған. Мисирдин түркийәгә келиши үчүн 62 оқуғучиға айропилан белити елип бәргән. Мәзкур ярдәм паалийитини системилаштуруш үчүн оқуш мукапат пули тәсис қилған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт