Ösmürler "Uyghurum-anam" namliq ana til musabiqisige aktip qatnashti

Ixtiyariy muxbirimiz erkin tarim
2017-12-27
Élxet
Pikir
Share
Print
"Uyghurum-anam" ana til köriki bahalash xulasisi. Uyghur yar tori (www.uyghuryar.org).
"Uyghurum-anam" ana til köriki bahalash xulasisi. Uyghur yar tori (www.uyghuryar.org).
RFA/Erkin Tarim

Xitay hökümiti Uyghur tilida ma'aripni emeldin qaldurup, xitay tilini mejburiy ögitishke tirishiwatqan bügünki künlerde chet'ellerdiki Uyghurlar perzentlirige ana tilini ögitish pa'aliyitini qanat yaydurmaqta. Bu meqset bilen "Uyghuryar fondi" bilen "Uyghur adashlar guruppisi" pütün dunyada "Uyghurum-anam" namliq ana til köriki ötküzüsh uqturushini tarqatqan idi. 2017-Yili 12-ayning 15-künigiche bu pa'aliyetke ishtirak qilghan Uyghur perzentliri 14 parche naxsha we déklamatsiye, 40 parche türlük resim we güzel sen'et esiri, 3 parche edebiy eser ewetken. "Uyghuryar" ning körekke ewetilgen eserlerni bahalash komitéti ezaliridin kündüzay hamut xanimning éytishiche, eser ewetken Uyghur yash-ösmürlirining kichiki üch yash, chongi 12 yash bolup, bular öz yéshigha nisbeten élip éytqanda bu ishqa bekmu tirishchanliq körsetken.

Shwétsiyede turuwatqan Uyghur ziyaliysi abdushükür memet ependi on nechche yildin béri chet'eldiki Uyghurlar ana til mekteplirini échip perzentlirige Uyghur tilini ögitishke tirishiwatqanliqini, bügünki künde bolsa bu balilarni ana tilini öginishke qiziqturush üchün "Uyghurum-anam" ana til körikini uyushturghanliqini, bularning Uyghur milliy kimlikini kücheytish roli barliqini bayan qildi. 

Abdushükür memet ependi bu körekke ewetilgen eserlerning témisining "Uyghur ikenlikini, pütün eserlerde Uyghurlar tonushturulghanliqi" ni bayan qildi. 

Uyghur ziyaliysi abdushükür memet ependi bu pa'aliyetning Uyghur yash-ösmürlerge ilham we medet bolidighanliqini tekitlidi.

"Uyghurum-anam" ana til körikige 57 parche her türlük eser ewetilgen bolup, bularning ichidin yérimige yéqini mukapatqa érishken bolup, mezkur mukapatlargha tagh-derya, haywanat we gül-chécheklerning namliri bérilgen. Abdushükür ependi bundaq namlarni bérishtiki sewebler toghrisida toxtaldi. 

"Uyghur adashlar guruppisi" namidiki watsap guruppisining qurghuchiliridin biri bolghan hazir shwétsiyede turushluq Uyghur ziyaliysi kündüzay xanim, "Uyghuryar fondi" bilen birlikte ötküzgen bu pa'aliyetning yaxshi ötkenlikini kütken ümidke yetkenlikini bayan qildi. 

"Uyghuryar fondi" ning istanbuldiki mes'ulliridin batur qaraxanli ependi bu pa'aliyetni ötküzüsh arqiliq özlirige bolghan ishenchning kücheygenlikini, 2018-yili Uyghur yash-ösmürlirini yighip lagér pa'aliyiti ötküzüshni pilanlawatqanliqini bayan qildi. 

"Uyghuryar fondi" 2016-yili 10-ayda meripetperwer 7 neper Uyghur teripidin qurulghan bolup, hazirghiche iqtisadiy jehettin qiynilip qalghan köp sandiki Uyghur oqughuchilargha yardem qilip kelmekte. Mexsus oqush mukapat puli tesis qilip, türkiyede oquwatqan oqughuchilargha yardem qolini sunmaqta.

Toluq bet