«Хәлқара уйғур тәтқиқати журнили» ниң 10-сани оқурмәнләр билән йүз көрүшти

Ихтиярий мухбиримиз әркин тарим
2018-01-01
Елхәт
Пикир
Share
Принт
«Хәлқара уйғур тәтқиқати журнили» ниң йеңидин нәшр қилинған 10-саниниң тордики муқависи.
«Хәлқара уйғур тәтқиқати журнили» ниң йеңидин нәшр қилинған 10-саниниң тордики муқависи.
uygurarastirmalari.com

Түркийәдә тор арқилиқ нәшр қилиниватқан «хәлқара уйғур тәтқиқати журнили» ниң 10-сани оқурмәнләр билән йүз көрүшти. Мәзкур тор журнили йерим йилда бир қетим нәшр қилинидиған болуп, уйғур тәтқиқатиниң һәрқайси саһәлиригә беғишланған илмий мақалиләр қобул қилинидикән.

Мәзкур тор журнилиниң 10-санида уйғур тили, әдәбияти, фолклори, тарихи вә мәдәнийити тоғрисида йезилған 11 парчә илмий мақалә, 2 парчә тәрҗимә мақалә вә 2 парчә китабларға баһа мақалисигә орун берилгән. Журналниң саһиби вә баш тәһрири измир әгә университети түрк дуняси тәтқиқат мәркизиниң профессори алимҗан инайәт болуп, у зияритимиз җәрянида алди билән журналниң 10-санини чиқиришқа әмгәк сиңдүргәнләргә рәһмәт ейтти. Андин бу санда елан қилинған мақалиләр тоғрисида мәлумат бәрди.

Мәлум болушичә, бу санда профессор алимҗан инайәтниң «"из" романида өрп-адәт билән мунасивәтлик амиллар», әнқәрәдики ғази университетиниң уйғур тили оқутқучиси, доктор айсун дәмирәз гүнәри ханимниң «һазирқи заман уйғур тилидики сөз ясиғучи қошумчилар тоғрисида», бурсадики улудағ университетиниң оқутқучиси минара алийева чинар ханимниң «уйғур тилшунас мирсултан османоф вә лопнур диалекти», өзбекистан пәнләр академийәси шәрқшунаслиқ институтиниң мутәхәссиси ширәли қолдашефниң «хоқанд ханлиқида уйғурлар», биләҗиктики шәйх әдәбали университети түрк тили вә әдәбияти факултетиниң оқутқучиси замирә ғулҗали ханимниң «һазирқи заман уйғур тилида пеилларниң заман райи категорийәси билән түрк тилидикини заман райи категорийәсиниң селиштурмиси» қатарлиқ 11 парчә илмий мақалигә орун берилгән.

Профессор алимҗан инайәт әпәндиниң билдүрүшичә, мәзкур журналниң йеңи саниниң бурунқи санлар билән охшимайдиған тәрипи мақалиләрниң юқири илмий қиммәткә игә болуши вә мәзмун җәһәттин кәң даирилик болушида икән. 

Түркийәдә докторлуқ илмий унвани үчүн оқуватқан уйғур зиялийси абдуваһит әпәнди, «хәлқара уйғур тәтқиқати журнили» ниң 10-саниниң мәзмун җәһәттин көп хиллиққа игә икәнликини, униңда муһит, сәнәт тарихи, бағчәвәнлик вә компютер кәспигә даир мақалиләргиму орун берилгәнликини, буниң уйғур тәтқиқатиниң кеңийишигә түрткә болидиғанлиқини баян қилди.

Игилинишичә, һазир түркийәдә 14 университетта уйғур тили дәрси өтүлмәктә. Уйғурларни тәтқиқ қилидиғанларниң саниму көпәймәктә. Профессор алимҗан инайәт әпәнди журналниң 5 йилдин бери изчил һалда торда чиқиватқанлиқи, журналниң тор нусхисини зиярәт қилғучилар саниниң күнсайин көпийиватқанлиқини, униңға түркийәдин сирт башқа нурғун дөләтләрдин кириватқанлиқини баян қилди. 

Уйғур академийисиниң рәиси абдулһәмид қарахан әпәндиму «хәлқара уйғур тәтқиқати журнили» һәққидә пикир баян қилип, йеқинда йоруқ көргән йеңи санидики мақалиләрниң юқири илмий қиммәткә игә икәнликини алаһидә тәкитлиди. 

«Хәлқара уйғур тәтқиқати журнили» да 5 йилдин бери елан қилиниватқан илмий мақалиләр дуняниң һәрқайси җайлиридики уйғур тәтқиқатчилири билән башқа милләт зиялийлириниң илмий әмгәклири болуп, бу мақалиләр уйғурларниң тарихи, тили, әдәбияти, фолклори, сәнәт тарихи, иҗтимаий әһвали вә сиясий вәзийитигә беғишланған тәтқиқат нәтиҗилири икән.

Пикирләр (0)
Share
Толуқ бәт