"Xelq'ara Uyghur tetqiqati zhurnili" ning 10-sani oqurmenler bilen yüz körüshti

Ixtiyariy muxbirimiz erkin tarim
2018-01-01
Élxet
Pikir
Share
Print
"Xelq'ara Uyghur tetqiqati zhurnili" ning yéngidin neshr qilin'ghan 10-sanining tordiki muqawisi.
"Xelq'ara Uyghur tetqiqati zhurnili" ning yéngidin neshr qilin'ghan 10-sanining tordiki muqawisi.
uygurarastirmalari.com

Türkiyede tor arqiliq neshr qiliniwatqan "Xelq'ara Uyghur tetqiqati zhurnili" ning 10-sani oqurmenler bilen yüz körüshti. Mezkur tor zhurnili yérim yilda bir qétim neshr qilinidighan bolup, Uyghur tetqiqatining herqaysi sahelirige béghishlan'ghan ilmiy maqaliler qobul qilinidiken.

Mezkur tor zhurnilining 10-sanida Uyghur tili, edebiyati, folklori, tarixi we medeniyiti toghrisida yézilghan 11 parche ilmiy maqale, 2 parche terjime maqale we 2 parche kitablargha baha maqalisige orun bérilgen. Zhurnalning sahibi we bash tehriri izmir ege uniwérsitéti türk dunyasi tetqiqat merkizining proféssori alimjan inayet bolup, u ziyaritimiz jeryanida aldi bilen zhurnalning 10-sanini chiqirishqa emgek singdürgenlerge rehmet éytti. Andin bu sanda élan qilin'ghan maqaliler toghrisida melumat berdi.

Melum bolushiche, bu sanda proféssor alimjan inayetning ""Iz" romanida örp-adet bilen munasiwetlik amillar", enqerediki ghazi uniwérsitétining Uyghur tili oqutquchisi, doktor aysun demirez güneri xanimning "Hazirqi zaman Uyghur tilidiki söz yasighuchi qoshumchilar toghrisida", bursadiki uludagh uniwérsitétining oqutquchisi minara aliyéwa chinar xanimning "Uyghur tilshunas mirsultan osmanof we lopnur di'alékti", özbékistan penler akadémiyesi sherqshunasliq institutining mutexessisi shir'eli qoldashéfning "Xoqand xanliqida Uyghurlar", bilejiktiki sheyx edebali uniwérsitéti türk tili we edebiyati fakultétining oqutquchisi zamire ghuljali xanimning "Hazirqi zaman Uyghur tilida pé'illarning zaman rayi katégoriyesi bilen türk tilidikini zaman rayi katégoriyesining sélishturmisi" qatarliq 11 parche ilmiy maqalige orun bérilgen.

Proféssor alimjan inayet ependining bildürüshiche, mezkur zhurnalning yéngi sanining burunqi sanlar bilen oxshimaydighan teripi maqalilerning yuqiri ilmiy qimmetke ige bolushi we mezmun jehettin keng da'irilik bolushida iken. 

Türkiyede doktorluq ilmiy unwani üchün oquwatqan Uyghur ziyaliysi abduwahit ependi, "Xelq'ara Uyghur tetqiqati zhurnili" ning 10-sanining mezmun jehettin köp xilliqqa ige ikenlikini, uningda muhit, sen'et tarixi, baghchewenlik we kompyutér kespige da'ir maqalilergimu orun bérilgenlikini, buning Uyghur tetqiqatining kéngiyishige türtke bolidighanliqini bayan qildi.

Igilinishiche, hazir türkiyede 14 uniwérsitétta Uyghur tili dersi ötülmekte. Uyghurlarni tetqiq qilidighanlarning sanimu köpeymekte. Proféssor alimjan inayet ependi zhurnalning 5 yildin béri izchil halda torda chiqiwatqanliqi, zhurnalning tor nusxisini ziyaret qilghuchilar sanining künsayin köpiyiwatqanliqini, uninggha türkiyedin sirt bashqa nurghun döletlerdin kiriwatqanliqini bayan qildi. 

Uyghur akadémiyisining re'isi abdulhemid qaraxan ependimu "Xelq'ara Uyghur tetqiqati zhurnili" heqqide pikir bayan qilip, yéqinda yoruq körgen yéngi sanidiki maqalilerning yuqiri ilmiy qimmetke ige ikenlikini alahide tekitlidi. 

"Xelq'ara Uyghur tetqiqati zhurnili" da 5 yildin béri élan qiliniwatqan ilmiy maqaliler dunyaning herqaysi jayliridiki Uyghur tetqiqatchiliri bilen bashqa millet ziyaliylirining ilmiy emgekliri bolup, bu maqaliler Uyghurlarning tarixi, tili, edebiyati, folklori, sen'et tarixi, ijtima'iy ehwali we siyasiy weziyitige béghishlan'ghan tetqiqat netijiliri iken.

Toluq bet