"Yettisu Uyghur muzika mektipi" Uyghur ewladlirining öz muzika medeniyiti bilen terbiyilinishige asas salmaqta

Muxbirimiz gülchéhre
2017-11-20
Share
yettesu-uyghur-muzika-mektipi-1.jpg Qazaqistandiki "Yettesu Uyghur muzika mektipi" ning oqutquchi-oqughuchiliri. Almuta, qazaqistan.
RFA/Gulchehre

Qazaqistanning Uyghurlar eng zich olturaqlashqan almuta wilayitining bayséyit yézisida qurulup, ikkinchi oqush yilini bu yil séntebir muweppeqiyetlik bashlighan "Yettisu Uyghur muzika mektipi" ning 50 ke yéqin ustaz we oqughuchiliri nöwette, 21-noyabir ötküzülidighan yilliq konsértigha jiddiy teyyarliq körmekte iken.

Agaxan fondining hawalisi bilen "Yettisu muzika mektipi" ning xizmetlirini közdin kechürüsh üchün londondin kelgen musteqil tetqiqatchi eziz eysa ependi we uning xanimi Uyghur muzika tetqiqati bilen shughulliniwatqan doktor réchal xanim mezkur muzika mektipining qurulushida asasliq xizmetlerni qilghuchilar bolup, eziz ependi mexsus bu mektepte ikki künlük ziyarette bolidiken.

Uning tonushturushiche, gheyret yézisi bir qeder chet yéza bolup, asasliq nopusini Uyghurlar teshkil qilidu. Agaxan fondining bayséyt yézisida qurghan muzika mektipining ikkinchi oqush yilini gheyret yézisida dawamlashturidighan bolup, mezkur mektepning ikkinchi oqush yilini mezkur gheyret yézisida dawam etküzüshni qarar qilishtimu, bu yézining ré'al qiyinchiliqliri közde tutulghan iken. 

Eziz ependining éytishiche, agaxan fondining yardimi bilen "Gheyret ottura mektipi" de bu yil séntebirdin bashlap dawam qiliwatqan bu muzikiliq oqutush programmisining ikkinchi yilliq oqutushi, intayin janliq we tertiplik, qizghin dawam qiliwatqan bolup, péshqedem tejribilik kespiy sen'et oqutquchiliri programma boyiche, mehellidiki Uyghur yash ösmürlirige Uyghur chalghu eswabliri, muqam we naxsha, usulliri terbiyisi élip barmaqta.

Gheyret Uyghur ottura mektipining mudiri merif ezimjan gheyret ottura mektipini qisqiche tonushturup, yüz yilliq tarixqa ige bu mektepning, hazirning özide 320 din artuq Uyghur we qazaq oqughuchini ana tilda terbiyilewatqanliqini, mektepning muzika oqutush programmisining bu mektepte dawamlishishini qollap Uyghur naxsha, muzika sen'itige ishtiyaq baghlighan talantliq balilarni terbiyileshte muntizim bir sen'et kurzhukini qurush bilen, balilarning Uyghur muzika sen'itige bolghan méhri-muhebbitining éship bériwatqanliqini, buningdin oqutquchi we ata-anilarningmu intayin xushal ikenlikini bildürdi.

Gheyret ottura mektipide tesis qilin'ghan "Yettisu muzika mektipi" namidiki sen'et terbiye programmisi üchün tallan'ghan 30 oqughuchining biri intizar, 6-sinip oqughuchisi bolup, qiziqishi boyiche dutar öginiwatqan iken, ikki ay ichide mushawirek muqamlirigha bimalal chalalaydighan bolghan.

Sattar chélishni öginiwatqan, élwira Uyghur muqamlirigha qoli xéli kélip qalghan bolup, kélechekte, muzikant bolush arzusi bar iken. 

Péshqedem muzika ustazi, mektepning asasliq muzika oqutquchisi, eziz turdiyéf ependi agaxan fondining bayséytta qurghan bu muzika oqutush programmisi tunji bashlan'ghandin buyan, muzika oqutushigha bash yétekchi bolup kelmekte. U yette su muzika mektipining gheyret mektipidiki muzika sinipigha bir qisim balilarning tallan'ghanliqi, agaxan fondining Uyghur ewladlirining özining muzika medeniyiti bilen terbiyilinishige asas salghanliqi we zor purset yaritip bergenlikige semimiy teshekkürini bildürdi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet