Abdulhakim idris malaysiya bash ministéridin Uyghurlargha yardem qilishni telep qilghan

Ixtiyariy muxbirimiz ekrem
2023.04.19
abdulhekim-idris-malaysiya-1.jpg Malaysiyada Uyghurlar mesilisini tonushturup kéliwatqan Uyghur tetqiqat merkizining diréktori abdulhakim idris ependi malayshiya bash ministiri enwer ibrahim ependi bilen körüshti. 2023-Yili 19-aprél.
RFA/Ekrem

Merkizi washin'gtondiki Uyghur tetqiqat merkizining diréktori abdulhakim idris malaysiyaning hazirqi bash ministéri enwer ibrahim bilen körüshüp, Uyghurlargha yardem qilishni telep qilghan.

Heptilerdin buyan hindonéziyede türlük pa'aliyetlerni élip bériwatqan Uyghur tetqiqat merkizining diréktori abdulhakim idris ependi, 13-aprildin bashlap malaysiyada Uyghurlar mesilisini tonushturup kéliwatqan idi. U bügün, yeni 19-april küni malaysiya paytexti ku'ala-lampurdiki darul islam merkizide ötküzülgen iptar sorunida malaysiya bash ministéri enwer ibrahim ependi bilen uchriship, uningdin Uyghurlargha yardem qilishni telep qilghan.

Iptar soruni axirlashqanda, abdulhakim idris ependi bash ministér enwer ibrahim bilen qayta körüshüp xoshlashqan. Xoshlishishtin ilgiri, u enwer ibrahim ependige Uyghur doppisidin birni, Uyghurlarning nöwettiki weziyitige we arzu-tileklirige a'it bir mektupni hemde özining “Qizil qiyamet” namliq kitabini teqdim qilghan. U, sherqiy türkistan xelqining nöwettiki weziyitining éghirliqini tekitlep, uningdin yene bir qétim Uyghurlar üchün yardem sorighan.

Malaysiyada Uyghurlar mesilisini tonushturup kéliwatqan Uyghur tetqiqat merkizining diréktori abdulhakim idris ependi malayshiya bash ministiri enwer ibrahim ependige Uyghur doppisi sogha qildi. 2023-Yili 19-aprél.
Malaysiyada Uyghurlar mesilisini tonushturup kéliwatqan Uyghur tetqiqat merkizining diréktori abdulhakim idris ependi malayshiya bash ministiri enwer ibrahim ependige Uyghur doppisi sogha qildi. 2023-Yili 19-aprél.
RFA/Ekrem

Enwer ibrahim ependi gerche ikki heptining aldida élip barghan xitay ziyariti mezgilide Uyghurlar mesilisi toghruluq bashqiche ipade bildürgen bolsimu, emma musulman dölitining bir rehbiri bolush süpiti bilen özining yenila Uyghurlargha hésdashliq qilidighanliqini bildürgen.

Melum bolushiche, 2018-yili xitaydin Uyghurlarning diniy étiqad we heriket erkinlikini telep qilghan enwer ibrahim ependi, malaysiya bash ministéri bolghandin kéyin, yeni 2023-yili 29-marttin 1-aprilghiche xitayda élip barghan ziyariti mezgilide, Uyghur mesilisini “Xitayning ichkiy ishi” dep atighan idi.

Türkiye hajitepe uniwérsitétining oqutquchisi, istratégiye mutexessisi doktur erkin ekrem ependi bu heqte ziyaritimizni qobul qilip, öz qarashlirini anglarmenler bilen ortaqlashti. U, malaysiya bash ministéri enwer ibrahimning usta bir siyasetchi ikenlikini, uning xitay ziyariti mezgilide gerche Uyghurlar mesilisini ‛xitayning ichkiy ishi‚ dégen bolsimu, bu qétim Uyghur pa'aliyetchisi bilen körüshkende Uyghurlargha hésdashliq qilidighanliqini bildürüshining bir xil siyaset bolushi mumkinlikini ilgiri sürdi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.