Мамутҗан абдуреһим: хитай аилә әзалиримни екранда сөзлитиш арқилиқ өз җинайитини иқрар қилди

Мухбиримиз шөһрәт һошур
2021-04-14
Share
Мамутҗан абдуреһим: хитай аилә әзалиримни екранда сөзлитиш арқилиқ өз җинайитини иқрар қилди Австралийәдики муһаҗир мамутҗан абдуреһимниг ата-аниси хитай тәрәптин мамутҗанға сөзләшкә орунлаштурулған син көрүнүши. 2021-Йили апрел.
zj.zjol.com.cn

Хитай даирилири җүмә күни бейҗиңда "7 ‏-қетимлиқ шинҗаң мәсилиси бойичә ахбарат елан қилиш йиғини" өткүзди. Йиғинда даириләр зор бир түркүм мәнтиқсиз изаһат вә пакитларни оттуриға қоюп, йеқинқи йилларда уйғур вәзийитини хәлқара сәһнигә елип чиққан йәнә бир қисим мустәқил тәтқиқат орунлири вә гуваһчиларниң учур вә баянлирини инкар қилишқа урунди һәм уларниң шан-шәрипигә һуҗум қилди. Бу һуҗумға нишан болған бир қисим паалийәтчи вә гуваһчилар, бүгүн радийомиз зияритини қобул қилип, хитай тәрәпниң бу йиғин арқилиқ маһийәттә өзлириниң ирқий қирғинчилиқ җинайитини иқрар қилғанлиқини илгири сүрүшти.

Хитай даирилири бултур 12-айдин башлап, "шинҗаң мәсилиси" бойичә арқа-арқидин ахбарат елан қилиш йиғини өткүзүп, өзлири хәлқарада дуч кәлгән тәнқид вә бесимларға инкас қайтурмақта. Хитай бу қетимқи йиғинида, мустәқил тәтқиқатчи ген бонн тәрипидин қурулған "шаһит биз" учур амбири, австралийә сиясий истратегийә тәтқиқат орниниң "шинҗаң учур-мәлумат" хизмәт гурупписи вә "уйғур әдлийә архипи" қатарлиқ 3 тәтқиқат орниға шуниңдәк муһаҗирәттики бирқисим ғоллуқ гуваһчиларға қайтидин һуҗум қилған. Мәзкур үч орунниң архипида 12050 кишиниң тутқунда дәп тизими барлиқини тилға алған даириләр, өзлириниң бу тизимлик үстидә мәхсус тәкшүрүш елип бериш арқилиқ, булардин пәқәт 3244 кишиниңла түрмидә икәнлики, қалғанлириниң болса нормал яшаватқанлиқини ениқлиғанлиқини оттуриға қойған. Йиғинда "шаһит биз" учур амбириниң қурғучилиридин бири дәп тилға елинған австралийәдики муһаҗир патимә абдуғопур ханим, хитай тәрәпниң, мәзкур баяни арқилиқ, бу үч тәтқиқат орни елан қилған учурларниң бир қисмини йәни тизимликтики кишиләрдин төттин бир қисминиң тутқунда икәнликини етирап қилғанлиқини оттуриға қойди. У йәнә муһаҗирәттики уйғур паалийәтчилириниң 3 милйон билән бәш милйон арисида кишиниң тутқунда икәнликини оттуриға қоюватқанлиқини әскәртип, мәзкур етираптики нисбәт бойичә, уйғур илида аз дегәндә бир милйондин артуқ кишиниң тутқунда икәнликиниң вастилиқ һалда дәлилләнди дәп қарашқа болидиғанлиқини тәкитлиди. Патимә ханим илгири "шаһит биз" торида өзиниң дадисиниң тутқун қилинғандин кейин вапат болғанлиқи һәққидә гуваһлиқ бәргәниди. Шуңа патимә ханим мәзкур йиғинда өзи тәнқид обйекти болған болсиму, униң дадиси һәққидики учурға инкас қайтуралмиғанлиқидин әҗәбләнгәнликини билдүрди. У йәнә хитай тәрәпниң, бу җәһәттә еғиз ачмай турувелишиға асасән, дадисиниң лагерда өлгәнликиниң рәт қилғини болмайдиған вә ясап чиққини болмайдиған дәриҗидә бир реаллиқ икәнликини тилға алди.

Австралийәдики муһаҗир мамутҗан абдуреһим вә униң хотун-балилири. (Вақти вә орни ениқ әмәс)

Бу йиғинидикиси билән иккинчи қетим тилға елинған норвегийәдики "уйғур әдлийә архипи" ниң мәсули бәхтияр өмәр әпәнди, өзлириниң һазирға қәдәр архиптики санлиқ мәлуматларни хәлқарадики алақидар дөләт вә органлардин башқиларға техи ашкарилимиғанлиқини әскәртиш билән бирликтә, уму хитай тәрәпниң өзлири тарқатқан учурларни биваситә болмисиму васитилик һалда вә қәдәмму-қәдәм етирап қиливатқанлиқини баян қилди. Йиғинда тутқунлар тизимлидики 12050 киши ичидин 238 кишиниң, кесәллик қатарлиқ һәр хил сәвәбләр билән өлүп кәткәнлики баян қилинғаниди. Бәхтияр әпәнди өз тизимликидики кишиләрниң пәқәт чәклик имканларда еришилгән учурлар икәнликини тәкитләп, әгәр шу етирап қилинған 238 киши нисбәтләштүрлсә, тутқунларниң ичидики өлүм-йетим санида қорқунчлуқ бир вәзийәтни тәхмин қилишқа болидиғанлиқини оттуриға қойди.

Лагер шаһити зумрәт давут, йиғинда көрситилгән пакитларниң пүтүнләй тоқулма икәнликини, җүмлидин йолдишиға аит дейилгән имзаниңму ясалма икәнликини баян қилиш билән бирликтә, өзиниң ялған сөзләшкә еһтияҗи йоқлуқини, әмма ирқий қирғинчилиқ җинайити садир қиливатқан хитай тәрәпниң өзини ақлаш үчүн ялған пакитларға моһтаҗ икәнликини илгири сүрди.

Йиғинда әң диққәт тартқан гуваһлиқ, австралийәдики муһаҗир мамутҗан абдуреһимниң ата-аниси, қизи вә қошнисиниң баянлири болуп, мамутҗанниң баян қилишичә, униң аилисиниң һәқиқий әһвали, йәни аялиниң кесиветилгәнлики, икки балисиниң гөрүгә елинғанлиқи илгири чнн мухбири тәрипидин әйнән ашкарилинип болған. У екранда өзини қопаллиқ билән тәнқидлигән қошнисиму әйибкә буйрумайдиғанлиқини билдүрүш билән бирликтә, хитай тәрәп йошурушқа амалсиз қалғандила аялиниң 9 йиллиқ кесилгәнлики ашкарилиғанлиқини баян қилди. Йиғинда мамутҗанниң аяли муһәррәмниң аталмиш террорчилар билән алақиси болғанлиқи, террорлуқ паалийәтлири сәвәблик тутулғанлиқи илгири сүрүлгән. Мамутҗан аялиға артилған бу аталмиш җинайәт вә берилгән җазаларға асасән, уйғур илида террорлуқ гумани вә әйибләш билән соланған милйончә кишиниң әслидә аялиға охшашла, әқәллий диний ибадәтлирини ада қилип келиватқан нормал пуқралар икәнлики, улар ирқий қирғинчилиқиниң нишани болғанлиқи үчүн, җазалиниватқанлиқини баян қилди. Әслидә өзи вә аялиниң бир илмий хадим болушнила арзу қилип кәлгәнликини баян қилған мамутҗан абдуреһим, аяли вә балилирини әркинликкә ериштүрүш үчүн һәрикәт қилишниң, буниңдин кейин, униң илмий тәтқиқат паалийитидинму муһим орунда туридиғанлиқини әскәртти.

Юқирида хитайниң "7-қетимлиқ шинҗаң мәсилиси ахбарат йиғини" да һуҗум нишани болған бир қисим паалийәтчи вә гуваһчиларниң бу йиғинға қарита инкаслирини диққитиңларға сундуқ.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт