Türk dunyasi medeniyet resim körgezmisige Uyghurlargha a'it süretlermu qoyuldi

Ixtiyariy muxbirimiz arslan
2020-07-23
Élxet
Pikir
Share
Print

Türkiyening yalowa shehirige jaylashqan yalowa folklor we telim - terbiye merkizi ( YAFEM) ning uyushturushi bilen 14 - nöwetlik türk dunyasi medeniyet paytextliri resim körgezmisi we türk dunyasi zhurnalistlar uchrishishi yighini oxshash waqitta yalowa shehiride ötküzüldi.

Bu pa'aliyette Uyghurlarmu özlirining nöwettiki éghiz weziyiti we medeniyitini namayan qilidighan herxil süretlerni körgezmige qoydi.

Türk dunyasi resim körgezmisige sherqiy türkistan ma'arip we hemkarliq jem'iyiti teripidin qoyulghan Uyghurlarning tarixi, medeniyiti, örp - adetliri , xitayning Uyghurlar üstidin élip bériwatqan bésim we zulumliri hem xitayning jaza lagérlirigha qamalghan Uyghurlarning körünüshlirige a'it bu süretler ziyaretchilerning alahide diqqitini tartti.

4 Kün dawam qilghan bu pa'aliyetke korona wirusi sewebidin cheklik miqdarda kishi teklip qilin'ghan bolup, köp sanda kishi yene programmigha intérnét télékamérasi arqiliq qatnashti.

Bu yighinni uyushturghan yalowa folklor we telim - terbiye merkizining re'isi özer quyunji ependi, "Uyghurlar mesilisige qandaq qaraysiz we qandaq pa'aliyetler élip bériwatisiler?"dégen so'alimizgha jawab bérip mundaq dédi: "sherqiy türkistan mesilisi türk jughrapiyesining hazir eng éghir qiyin ehwaldiki mesilisidur. Sherqiy türkistanda yüz bériwatqan paji'eler, qetli'amlar toxtitilishi kérek bolghan eng muhim mesilidur. Bizning 2005 - yilidin bashlap türkiyediki sherqiy türkistan xelqi bilen birlikte pa'aliyetler élip bériwatimiz. Hazirmu pa'aliyetlirimiz dawam qiliwatidu. Bizning élip bériwatqan xizmet pa'aliyetlirimiz sherqiy türkistan üchün azraq bolsimu paydisi bolsa bu biz üchün xushalliq ishtur. Sherqiy türkistan mesilisi her waqit bizning küntertipte tutuwatqan mesililerdin biridur. Pütkül pa'aliyetlirimizde, yighin - programmilirimizda bu mesile bizning asasiy mesilimiz bolup keldi. Bu qétimqi pa'aliyette sherqiy türkistan resim körgezmisi échildi. Türk dunyasi zhurnalistlar uchrishishi yighinida sherqiy türkistan mesilisi muzakire qilindi. Eng jiddiy hel qilinishi kérek bolghan mesililerdin biri sherqiy türkistan mesilisidur. Buning hel bolushi üchün bizmu qolimizdin kélishiche hesse qoshimiz. Eng qisqa waqitta xitayning bu zulumigha xatime bérilidu dep ümid qilimiz. Bu mesilisini dunya jama'itining küntertipige keltürelisek eng qisqa waqitta bu mesile hel bolidu dep qaraymiz we buning üchün tirishchanliq körsitimiz".
Biz yene Uyghurlar mesilisi toghrisida pikir qarashlirini élish üchün milletchi heriket partiyesi yalowa shöbe re'isi namik tam ependi bilen söhbet élip barduq.

Namik tam ependi Uyghurlar mesilisi toghrisidiki pikir - qarashlirini ipadilep mundaq dédi: "Sherqiy türkistanliq qérindashlirimiz özlirini hergiz yalghuz hés qilmisun, sherqiy türkistan bizning izzet - nomusimizdur, u yerdiki qiyinchiliqlarni bilimiz we közitip kéliwatimiz, ular sewrchan bolushi kérek. Aldimizdiki künlerde bu qérindashlirimizgha munasiwetlik hem türkiye jumhuriyiti teripidin hem milletchi heriket partiyesi teripidin jiddiy xizmetler élip bérilidu, qérindashlirimiz özlirini hergiz yalghuz hés qilmisun. Ular bizning izzet - abroyimizdur, sheripimizdur. Uyghurlar türk dunyasining asasiy menbesidur, Uyghurlarning alahidiliki bolsa, türk dunyasining qedimi medeniyiti, ilim - meripiti, sen'et we soda - tijaritide asasiy menbe bolushidur, sherqiy türkistanliq qérindashlirimizgha hörmet bildürimen, salam yollaymen, pat - pursette biz u yerge barimiz ularmu kélidu, arimizdiki tosuq yoqaydu".

Pa'aliyet 18- iyuldin 23 - iyulghiche 6 kün dawam qilidu. Resim körgezmisige Uyghurlardin bashqa yene türk, qazaq, qirghiz, özbék, türkmen, ezerbeyjan, tatar qatarliq xelqlirimu qatniship, özlirining güzel medeniyiti we örp - adetlirini namayan qildi.

Toluq bet