Doktor meghpiret kamal xanim Uyghur akadémiyesi wexpining yéngi nöwetlik re'isi bolup saylandi

Uyghur akadémiyesi wexpining nizamnamisige asasen, Uyghur akadémiyesi wexpining hey'et we ezaliri sin yighini ötküzüp, yéngi nöwetlik re'islikke doktor meghpiret kamal saylandi. 2023-Yili 29-iyul, istanbul

29-Iyul küni merkizi istanbuldiki Uyghur akadémiyesi wexpining idare hey'et saylimi élip bérildi. Istanbul beykent uniwérsitétining oqutquchisi, doktor meghpiret kamal xanim Uyghur akadémiyesi wexpining re'isi bolup saylandi.

Doktor meghpiret kamal xanim bu munasiwet bilen radiyomizning mexsus ziyaritini qobul qildi. U mundaq dédi: “Xelqimiz manga ishench qilghanliqi üchün, bu qiyin we shereplik wezipini manga tapshurdi, dep oylaymen. Halbuki, bu wezipe heqiqetenmu asan bir xizmet emes, emma men yillardin buyan Uyghur akadémiyesining türlük xizmetlirige ariliship kéliwatimen. Shunga Uyghur akadémiyesining xizmetliri we sistémisini yaxshi chüshinimen.”

Doktor meghpiret xanim sözide yene Uyghur akadémiyesi wexpini özining a'ilisi dep qaraydighanliqini, uning rawajlinishi, muweppeqiyetliri we qolgha keltürgen netijiliridin pexirlinidighanliqini, buningdin kéyin téximu tiriship ishleydighanliqini bildürdi.

Doktor meghpiret kamal xanim Uyghur akadémiyesi teshkilatlirining 14 yilliq musapisidiki tunji ayal re'is bolup hésablinidiken.

Doktor meghpiret kamal xanim özining Uyghur akadémiyesining re'isi bolush süpiti bilen buningdin kéyin élip barmaqchi bolghan xizmet pilanliri toghrisida toxtilip mundaq dédi: “Uyghur akadémiyisi wexpi qurulghandin buyan yashlarni terbiyeleshke alahide ehmiyet bérip keldi. Bolupmu Uyghur ziyaliylirini bir yerge jem qilip, Uyghur tili, tarixi we medeniyiti saheside ilmiy töhpilirini qoshushqa, wetini üchün xizmet qilishqa yéteklep keldi. Biz buningdin kéyinmu uniwérsitétlarda oquwatqan Uyghur oqughuchilargha oqush rasxoti we mukapat sommisi bérishni dawamlashturimiz, her sahediki xizmetlerni téximu yaxshi ishleshni dawamlashturimiz”.

Doktor meghpiret xanim sözide yene Uyghur perzentlirige ana tilini oqutush, uniwéristétlargha ötüsh üchün teyyarliq kursliri échish, chet ellerdiki Uyghur yashliri üchün derslik matériyallarni tüzüsh qatarliq ish pilanliri heqqidimu toxtilip ötti.

Biz Uyghur akadémiyesi wexpining bu qétimliq saylimi toghrisida téximu köp melumatqa érishish üchün, Uyghur akadémiyesining bash katipi abdulhemid qaraxan bilen söhbet élip barduq.

Abdulhemid qaraxanning bildürüshiche, Uyghur akadémiyesi wexpining nizamnamisige asasen, 29-iyul küni Uyghur akadémiyesi wexpining idare hey'iti we ezaliri tor arqiliq saylam élip barghan. Saylamda doktor meghpiret kamal xanim köp sanliq awaz bilen Uyghur akadémiyesi wexpining bu nöwetlik re'islikige saylan'ghan.

Abdulhemid qaraxanning bildürüshiche, Uyghur akadémiyesi wexpining sabiq re'isi doktor perhat qurban tengritaghli salametlik sewebidin re'islik wezipisidin muddettin burun istépa bergen iken.

Uyghur akadémiyisi wexpining hazir 7 kishilik da'imiy hey'et ezasi, 7 kishilik zapas idare hey'et azasi, shundaqla 6 kishilik nazaret hey'iti bolup, jem'iy 20 kishi wezipe ötimekte iken.

Uyghur akadémiyesining bash katipi abdulhemid qaraxanning bildürüshiche, istanbuldiki Uyghur akadémiyesi wexpi, merkizi amérikagha yötkelgen xelq'ara Uyghur akadémiyesining türkiyediki tarmiqi hésablinidiken.

Uyghur akadémiyesi 2009-yili istanbulda qurulghan bolup, hazir bu akadémiyening amérika, kanada, yawropa, awstraliye, yaponiye we ottura asiya döletliride 7 tarmaq shöbisi bar iken.