“Méhriban ana” Uyghur ana til mektipi amérikadiki Uyghur perzentlirining hayatida qandaq rollarni oynimaqta?

“Méhriban ana” (Ana Care) Uyghur ana til mektipide “Ana tilim-jan tilim” namliq pa'aliyettin körünüsh. 2024-Yili 25-féwral, feyrfaks

25-Féwral “Dunya ana til küni” ni xatirilesh munasiwiti bilen amérikaning wirjiniye ishtati feyrfaks shehirige jaylashqan “Méhriban ana” (Ana Care) Uyghur ana til mektipide “Ana tilim-jan tilim” namliq pa'aliyet ötküzüldi.

Süreyye ablimit

Pa'aliyet zali etles könglek we her xil Uyghur doppilirini kiygen qiz-oghullar bilen liq tolghan idi. Bu pa'aliyetni körgili kelgen Uyghur jama'itimu uchisigha etles we kanway köngleklirini, béshigha doppilirini kiyiwélishqanidi. Qatnashquchilarning arisida yene Uyghurlarning medeniyitige qiziqidighan yerlik bashqa millet kishilirimu bar idi.

Süreyye ablimit

Pa'aliyet bashtin-axiri nahayiti qizghin keypiyatta ötti. Ana til mektipining oqughuchiliri Uyghur tilida shé'ir déklamatsiye qildi, naxsha éytti. Pa'aliyet jeryanida balilarning “Uyghurlar qandaq bir millet?” dégen so'algha ayrim-ayrim halda “Uyghurlar kélishken, chirayliq, epuchan, méhmandost bir millet” dégendek jawabliri hemmeylenni söyündürdi.

Mezkur pa'aliyetke da'ir sin körünüshliri ijtima'iy taratqularda hembehirlen'gendin kéyin, nurghun bahalar yézilghan. Dunyaning herqaysi jaylirida yashawatqan Uyghurlar ijtima'iy taratqularda amérikadiki Uyghur balilirining Uyghur tilida körsetken nomurliridin nahayiti söyün'genlikini ipadiligen. Ular yazmilirida Uyghur tilini saqlap qilish we rawajlandurushta izchilliqning intayin muhimliqini tekitleshken.

Süreyye ablimit

 “Méhriban ana” Uyghur ana til mektipi “Éliy wéysél (Elie Wiesel) insaniy yardem fondi” ning bu yilliq yardimige érishken organlarning biri. Ularning Uyghur tili, tarixi we medeniyitini saqlash hem qoghdashta körsetken tirishchanliqliri üchün mezkur fond mexsus yardem meblighi ajratqan.

Süreyye ablimit

Biz bu munasiwet bilen “Méhriban ana” Uyghur ana til mektipining mudiri süreyye ablimit xanimni bügünki söhbet pirogrammimizgha teklip qilduq. Süreyye xanim, ana til mektipining qurulush jeryani, nöwettiki ehwali we buningdin kéyinki pilanlirini biz bilen ortaqlashti.

Söhbitimizning tepsilatini yuqiridiki awaz ulinishidin anglighaysiz.