Хитай завутлириға мәҗбурий ишләмчиликкә йөткиливатқан уйғур қиз-оғуллириниң барғанчә яшлишиватқанлиқи мәлум болмақта

Мухбиримиз меһрибан
2022.03.25
Share on WhatsApp
Share on WhatsApp
Хитай завутлириға мәҗбурий ишләмчиликкә йөткиливатқан уйғур қиз-оғуллириниң барғанчә яшлишиватқанлиқи мәлум болмақта Хитай хоҗайинлар тәрипидин хитай өлкилиридики завут-фабрикиларға ишләмчиликкә йөткиливатқан уйғур әмгәк күчлири. 2021-Йили июн.
Zumret Dawut teminligen

Йеқиндин буян иҗтимаий таратқуларда хитай хоҗайинлар тәрипидин хитай өлкилиридики зувут-фабрикиларға ишләмчиликкә йөткиливатқан уйғур әмгәк күчлири һәққидики еланлар вә син филимлири давамлиқ көпәймәктә.

Мәзкур син филимлиридә хитай өлкилиригә коллектип елип меңилған уйғур әмгәк күчлириниң зор көпчиликиниң яшлар икәнлики, шуниң билән бир вақитта хитай завутлирида ишләватқан уйғур ишләмчилириниң зор қисминиңму һәтта әмдила оттура мәктәптин айрилған уйғур қиз-оғуллири икәнлики ашкара болмақта.

Лагер шаһити зумрәт давут ханим, бу хилдики син филимлирини издәп тепип, иҗтимаий таратқуларға үзлүксиз йоллап келиватқан уйғур паалийәтчилириниң биридур.

Зумрәт давут ханим бу һәқтә зияритимизни қобул қилди. У йеқинда өзиниң хитайниң үндидар, тик-ток қатарлиқ иҗтимаий таратқулирида мушу хилдики елан вә син филимлирини көп көргәнликини, бир қисим хитайларниң ичкий өлкиләрдики хитай ширкәтлирини уйғур ишләмчилири билән тәминләш һәққидә мәхсус еланларни тарқитиватқанлиқини баян қилди.

Уйғур яшлирини хитай өлкилиридики завут-фабрикиларға ишләмчиликкә йөткәш үчүн чиқирилған чақириқ. 2021-Йили июн.
Уйғур яшлирини хитай өлкилиридики завут-фабрикиларға ишләмчиликкә йөткәш үчүн чиқирилған чақириқ. 2021-Йили июн.
Zumret Dawut teminligen

Униң билдүрүшичә, бу еланларда хитай завут-фабрикилириға ишләмчиликкә тонуштурулған яшларниң 18 яштин 23 яшқичә болған арилиқтики уйғур оқуғучилар икәнлики, һәтта уларниң зор бир қисминиң қизлар икәнлики йезилған икән.

Зумрәт давут ханим йәнә өзи хитай торлиридин байқап йоллиған уйғур ишләмчилири һәққидики син филимлиридә, яш уйғур мәҗбурий әмгәк күчлириниң түрлүк хитай ширкәтлиридә еғир әмгәк мәшғулатиға селинипла қалмастин, бәлки йәнә уларға хитай компартийәсиниң қизил тәшвиқати сиңдүрүлүп, меңисиниң ююлуватқанлиқини билдүрди.

Зумрәт давут ханим нөвәттә “уйғур яшлирини ишқа тонуштуруш” намидики еланларниң хитай торлирида барғанчә көпийиватқанлиқини билдүрди. Униң тәкитлишичә, һазир бу әһвал йәрлик һөкүмәт, хитай тиҗарәтчилири вә завутларни бир гәвдә қилған тиҗарәт торини шәкилләндүргән икән.

Уйғур мәҗбурий әмгәк күчлири һәққидики бу хил син филимлири нөвәттә чәт әлләрдики уйғурлар арисидиму күчлүк инкас қозғимақта. Германийәдики мустәқил анализчи әнвәр әхмәт әпәндиниң қаришичә, 18 яштин 23 яшқичә болған уйғур яшлириниң асаслиқ йөткәш нишани қилиниши, болупму зор түркүмдики уйғур қизлириниң “хизмәткә орунлаштуруш” намида хитай өлкә-шәһәрлиригә йөткилиши, хитайниң “уйғурларни хитайлаштуруш вә еритип түгитиш” истратегийәсиниң муһим бир парчиси икән.

Зумрәт давут ханим, ана юртидин айрилип хитай завутлирида ишләшкә мәҗбур болуватқан яш уйғур қиз-оғуллириниң юртиға қайтип кетиш имканийитиниңму йоқлиқини билдүрди.

Зумрәт ханимни әң әндишигә селиватқини муһәббәтлишиш вә никаһлиниш йешидики бу яш уйғур қизлириниң хитай әрлири билән никаһлинишқа мәҗбур болуши вә униңдин келип чиқидиған мөлчәрлигүсиз яман ақивәтләр икән.

Америка башчилиқидики бир қисим ғәрб демократик дөләтлириниң парламентлири, уйғурларниң пүткүл милләт гәвдиси билән “ирқий қирғинчилиқ” қа учраватқанлиқини, хитай һөкүмитиниң йәнә уйғурлар асас қилған йәрлик мусулман хәлқләргә қарита “инсанийәткә қарши җинайәт” өткүзиватқанлиқини етирап қилған иди. Шуниң билән бир вақитта америка һөкүмити йәнә хитай завутлири вә ширкәтлириниң уйғурларни мәҗбурий әмгәккә селип ишләпчиқарған мәһсулатлириға қарита җаза елан қилған иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.