Чира наһийәсиниң чақа йезисида мәҗбурий әмгәкниң һәптидә бәш күн давам қиливатқанлиқи дәлилләнди

Вашингтондин мухбиримиз шөһрәт һошур тәйярлиди
2024.05.01
uyghur-hashar-osteng-chepish.jpg Һашарға мәҗбурлинип өстәң чепиватқан уйғур деһқанлар. Ақсу.
Social Media

Кәнт секретари: “үч айдин бери өйгә қайтмидим, ‛халисанә‚ әмгәккә йетәкчилик қиливатимән! бүгүн кәнтимиздин 400 чә кишини ‛халисанә‚ әмгәккә апардим. ”

Иҗтимаий таратқулардин “дойин” да ашкарилинишичә, хотәнниң чира наһийәси чақа йезисида бир деһқан 2024-йили 1-айниң 8-күни кесәл һалитидә мәҗбурий әмгәккә апирилған. У әмгәктин қайтқан чеғида йол үстидә кесили қозғилип җан үзгән. Даириләр униң өлүмигә болған җавабкарлиқ вә мәсулийәтни үстигә алмиғандин кейин бу аилә әзалири қануний йол билән мәсилини һәл қилиш үчүн бир адвокатлиқ ширкитидин мәслиһәт сориған. Бу һәқтики сөһбәттин мәлум болушичә, мәзкур кәнттики аһалиләр һәр күни һәқсиз һалда мәҗбурий әмгәккә селинмақта икән.

Биз бу учурниң тоғра-хаталиқини айдиңлаштуруш үчүн, сөһбәттә нами тилға елинған чақа йезилиқ сақчиханиға телефон қилдуқ. Мәзкур хадим бу йезида мәҗбурий әмгәкниң давам қиливатқанлиқи, өзлириниң әмгәк мәйданида назарәтчилик қилип, деһқанларниң “бихәтәрлики” ни қоғдаватқанлиқини тилға алди.

Чақа йеза чақа кәнтиниң кәнт секретари өзиниң дүшәнбә күни (29-апрел) 400 чә кишини мәҗбурий әмгәккә апирип әкәлгәнликини ашкарилиди. Униң дейишичә, мәзкур кәнттә 1436 нопус бар болуп, буларниң ичидики әмгәк күчлириниң һәммиси дегүдәк мәҗбурий әмгәккә қатнаштурулған. Униң баянлиридин мәлум болушичә, бу мәҗбурий әмгәк чақа кәнтидила әмәс, башқа кәнтләрдиму давам қилмақта икән.

“дойин” дики учурда тәкшүрүш гурупписи кәлгәнлики сәвәблик өлгүчиниң қошна кәнткә кесәл һаләттә әмгәккә елип кетилгәнлики қәйт қилинған. Мәзкур секретар нөвәттә өз кәнтидә наһийәдин кәлгән икки кадирниң вәзипә өтәватқанлиқини тилға алди. У йәнә өзиниң башқа кәнттин келип вәзипә өтәватқанлиқи вә үч айдин бери өйгә қайтмиғанлиқини баян қилиш арқилиқ бу мәҗбурий әмгәкниң узундин бери изчил давам қилип келиватқанлиқини ашкарилиди.

Кесәл вә аҗиз кишиләрниң мәҗбурий әмгәккә қатнаштурулидиған яки қатнаштурулмайдиғанлиқи һәққидики соалимизға җаваб беришни халимиған мәзкур секретар, өз кәнтидә бу йил 1-айниң 8-күни йүз бәргән “бир кишиниң мәҗбурий әмгәктин қайтип җан үзгәнлики” һәққидики вәқә тоғрисида пикир баян қилишни рәт қилди. Лекин у бундақ бир вәқәниң йүз бәргәнликини инкар қилмиди. Биз униңдин шу кишиниң исим-фамилисини сориғинимизда бу һәқтә йүзтуранә көрүшүштила җаваб беридиғанлиқини баян қилди.

Мәзкур секретар 29-апрел аһалиләрни ериқ-өстәң ремонт қилишқа ачиққан болуп, у нөвәттә давам қиливатқан мәҗбурий әмгәкниң иқтисадий үнүмдин көпрәк муқимлиқ билән алақидар икәнликини тәкитлиди.

2014-Йилидики бир телефон зияритимиздә ақсу шаярда “долқун һашар” намидики мәҗбурий әмгәкниң давам қиливатқанлиқи, бу әмгәкниң кишиләрниң каллисини бош қоймаслиқ, йәни “қалаймиқан” ишларни ойлап вәқә чиқирип қоймаслиқи үчүн елип бериливатқанлиқини ашкара болған иди.  

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.