Chira nahiyesining chaqa yézisida mejburiy emgekning heptide besh kün dawam qiliwatqanliqi delillendi

Washin'gtondin muxbirimiz shöhret hoshur teyyarlidi
2024.05.01
uyghur-hashar-osteng-chepish.jpg Hashargha mejburlinip östeng chépiwatqan Uyghur déhqanlar. Aqsu.
Social Media

Kent sékrétari: “Üch aydin béri öyge qaytmidim, ‛xalisane‚ emgekke yétekchilik qiliwatimen! bügün kentimizdin 400 che kishini ‛xalisane‚ emgekke apardim. ”

Ijtima'iy taratqulardin “Doyin” da ashkarilinishiche, xotenning chira nahiyesi chaqa yézisida bir déhqan 2024-yili 1-ayning 8-küni késel halitide mejburiy emgekke apirilghan. U emgektin qaytqan chéghida yol üstide késili qozghilip jan üzgen. Da'iriler uning ölümige bolghan jawabkarliq we mes'uliyetni üstige almighandin kéyin bu a'ile ezaliri qanuniy yol bilen mesilini hel qilish üchün bir adwokatliq shirkitidin meslihet sorighan. Bu heqtiki söhbettin melum bolushiche, mezkur kenttiki ahaliler her küni heqsiz halda mejburiy emgekke sélinmaqta iken.

Biz bu uchurning toghra-xataliqini aydinglashturush üchün, söhbette nami tilgha élin'ghan chaqa yéziliq saqchixanigha téléfon qilduq. Mezkur xadim bu yézida mejburiy emgekning dawam qiliwatqanliqi, özlirining emgek meydanida nazaretchilik qilip, déhqanlarning “Bixeterliki” ni qoghdawatqanliqini tilgha aldi.

Chaqa yéza chaqa kentining kent sékrétari özining düshenbe küni (29-aprél) 400 che kishini mejburiy emgekke apirip ekelgenlikini ashkarilidi. Uning déyishiche, mezkur kentte 1436 nopus bar bolup, bularning ichidiki emgek küchlirining hemmisi dégüdek mejburiy emgekke qatnashturulghan. Uning bayanliridin melum bolushiche, bu mejburiy emgek chaqa kentidila emes, bashqa kentlerdimu dawam qilmaqta iken.

“Doyin” diki uchurda tekshürüsh guruppisi kelgenliki seweblik ölgüchining qoshna kentke késel halette emgekke élip kétilgenliki qeyt qilin'ghan. Mezkur sékrétar nöwette öz kentide nahiyedin kelgen ikki kadirning wezipe ötewatqanliqini tilgha aldi. U yene özining bashqa kenttin kélip wezipe ötewatqanliqi we üch aydin béri öyge qaytmighanliqini bayan qilish arqiliq bu mejburiy emgekning uzundin béri izchil dawam qilip kéliwatqanliqini ashkarilidi.

Késel we ajiz kishilerning mejburiy emgekke qatnashturulidighan yaki qatnashturulmaydighanliqi heqqidiki so'alimizgha jawab bérishni xalimighan mezkur sékrétar, öz kentide bu yil 1-ayning 8-küni yüz bergen “Bir kishining mejburiy emgektin qaytip jan üzgenliki” heqqidiki weqe toghrisida pikir bayan qilishni ret qildi. Lékin u bundaq bir weqening yüz bergenlikini inkar qilmidi. Biz uningdin shu kishining isim-familisini sorighinimizda bu heqte yüzturane körüshüshtila jawab béridighanliqini bayan qildi.

Mezkur sékrétar 29-aprél ahalilerni ériq-östeng rémont qilishqa achiqqan bolup, u nöwette dawam qiliwatqan mejburiy emgekning iqtisadiy ünümdin köprek muqimliq bilen alaqidar ikenlikini tekitlidi.

2014-Yilidiki bir téléfon ziyaritimizde aqsu shayarda “Dolqun hashar” namidiki mejburiy emgekning dawam qiliwatqanliqi, bu emgekning kishilerning kallisini bosh qoymasliq, yeni “Qalaymiqan” ishlarni oylap weqe chiqirip qoymasliqi üchün élip bériliwatqanliqini ashkara bolghan idi.  

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.