Гуаңҗуда юқумланған икки уйғурниң кимлики вә гуаңдуңдики бир завуттила 1000 чә уйғур барлиқи ашкариланди

Мухбиримиз шөһрәт һошур
2020-05-25
Share
mejburiy-emgek-xitaygha-yotkesh.jpg Тәйгуаң(Tai Guang) завутидики уйғур ишләмчиләр "анар уруқи" кәчлик мәктипиниң ечилиш мурасимида. 2019-Йили июн. (ASPI Ниң доклатидин елинған)
aspi.org.au

Өткән айда гуаңҗуда таҗсиман вирустин юқумланған икки уйғурниң байқалғанлиқи ашкариланған вә вәзийәттин хәвәрдар кишиләр бу иккисиниң уйғур районидин гуаңдуңға йөткәлгән мәҗбурий әмгәк ишчилири икәнликини илгири сүргәниди. Мухбиримизниң бу һәқтә изчил елип барған ениқлашлири давамида, мәзкур икки юқумдардин бириниң ақсу вилайитидин икәнлики, нөвәттә ақсудин гуаңдуңдики бир завутта ишләватқан миң әтрапида ишчи барлиқи айдиңлашти.

Өткәндә айда гуаңҗуда таҗсиман вирус билән юқумланған икки уйғурниң байқалғанлиқи ашкариланғандин кейин, бу икки уйғурниң кимлики, болупму уларниң хитай өлкилиригә әвәтилгән мәҗбурий әмгәк ишчилири яки әмәслики һәққидә изчил ениқлаш елип бардуқ. Телефонимизни қайта қобул қилған қизилсу қирғиз аптоном областлиқ сәһийә башқармисиниң хадимлири мәзкур икки юқумдардин бириниң үрүмчидин, йәнә бириниң ақсудин икәнликини ашкарилиди. Бу хадимлар йәнә бу икки юқумдарниң йешиниң 40тин юқири икәнликини тилға алди. Биз бу учурни айдиңлаштуруш үчүн үрүмчи вә ақсудики алақидар органларға телефон қилдуқ. Телефонимизни қобул қилған үрүмчидики бир хадим икки юқумдардин бирини үрүмчилик әмәс, қәшқәрдин дәп аңлиғанлиқи вә униң гуаңҗудин үрүмчигә мал селиватқан бир аял икәнликини илгири сүрди. Ақсудики алақидар хадимлардин бири, өзиниң бу икки юқумдардин хәвири йоқлуқи, әмма ақсу шәһиридин гуаңдуңда ишләватқан бир завуттила 1000 әтрапида киши барлиқидин хәвәрдар икәнликини ейтти.

Австралийәдики сиясий истратегийә тәтқиқат орни хитайниң һөҗҗәтлик материяллириға асасән, уйғур райондин аз дегәндә 80 миңчә уйғурниң хитай өлкилиридики завут-фабрикиларға мәҗбурий йөткәлгәнликини хәвәр қилғаниди. Хитайниң бүгүнки, йәни 22-майдики бир хәвиридин мәлум болушичә, даириләр йәнә уйғур районидин йәнә бир түркүм уйғурларни хитай өлкилиригә риғбәтләндүрүш йоли билән йөткәш үчүн қатнаш пулини көтүрүш, аилисидә қалған пәрзәнтлири үчүн толуқлима пул бериш қатарлиқ бир қатар йеңи бәлгилимиләрни елан қилған. Әмма даириләрниң һазирға қәдәр бу йөткәлмә ишчиларниң бихәтәрлики вә саламәтликини қоғдаш үчүн қандақ тәдбирләрни алғанлиқи һәққидә һечқандақ мәлумат йоқ. Шуңа гуаңҗуда байқалған икки юқум гумандариниң, юрт тәвәлики мәлум дәриҗидә айдиңлашқан болсиму, әмма уларниң таҗсиман вирустин қандақ шараит астида юқумланғанлиқи техичә, мәлум әмәс.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт