Gu'angjuda yuqumlan'ghan ikki Uyghurning kimliki we gu'angdungdiki bir zawuttila 1000 che Uyghur barliqi ashkarilandi

Muxbirimiz shöhret hoshur
2020-05-25
Share
mejburiy-emgek-xitaygha-yotkesh.jpg Teygu'ang(Tai Guang) zawutidiki Uyghur ishlemchiler "Anar uruqi" kechlik mektipining échilish murasimida. 2019-Yili iyun. (ASPI Ning doklatidin élin'ghan)
aspi.org.au

Ötken ayda gu'angjuda tajsiman wirustin yuqumlan'ghan ikki Uyghurning bayqalghanliqi ashkarilan'ghan we weziyettin xewerdar kishiler bu ikkisining Uyghur rayonidin gu'angdunggha yötkelgen mejburiy emgek ishchiliri ikenlikini ilgiri sürgenidi. Muxbirimizning bu heqte izchil élip barghan éniqlashliri dawamida, mezkur ikki yuqumdardin birining aqsu wilayitidin ikenliki, nöwette aqsudin gu'angdungdiki bir zawutta ishlewatqan ming etrapida ishchi barliqi aydinglashti.

Ötkende ayda gu'angjuda tajsiman wirus bilen yuqumlan'ghan ikki Uyghurning bayqalghanliqi ashkarilan'ghandin kéyin, bu ikki Uyghurning kimliki, bolupmu ularning xitay ölkilirige ewetilgen mejburiy emgek ishchiliri yaki emesliki heqqide izchil éniqlash élip barduq. Téléfonimizni qayta qobul qilghan qizilsu qirghiz aptonom oblastliq sehiye bashqarmisining xadimliri mezkur ikki yuqumdardin birining ürümchidin, yene birining aqsudin ikenlikini ashkarilidi. Bu xadimlar yene bu ikki yuqumdarning yéshining 40tin yuqiri ikenlikini tilgha aldi. Biz bu uchurni aydinglashturush üchün ürümchi we aqsudiki alaqidar organlargha téléfon qilduq. Téléfonimizni qobul qilghan ürümchidiki bir xadim ikki yuqumdardin birini ürümchilik emes, qeshqerdin dep anglighanliqi we uning gu'angjudin ürümchige mal séliwatqan bir ayal ikenlikini ilgiri sürdi. Aqsudiki alaqidar xadimlardin biri, özining bu ikki yuqumdardin xewiri yoqluqi, emma aqsu shehiridin gu'angdungda ishlewatqan bir zawuttila 1000 etrapida kishi barliqidin xewerdar ikenlikini éytti.

Awstraliyediki siyasiy istratégiye tetqiqat orni xitayning höjjetlik matériyallirigha asasen, Uyghur rayondin az dégende 80 mingche Uyghurning xitay ölkiliridiki zawut-fabrikilargha mejburiy yötkelgenlikini xewer qilghanidi. Xitayning bügünki, yeni 22-maydiki bir xewiridin melum bolushiche, da'iriler yene Uyghur rayonidin yene bir türküm Uyghurlarni xitay ölkilirige righbetlendürüsh yoli bilen yötkesh üchün qatnash pulini kötürüsh, a'iliside qalghan perzentliri üchün toluqlima pul bérish qatarliq bir qatar yéngi belgilimilerni élan qilghan. Emma da'irilerning hazirgha qeder bu yötkelme ishchilarning bixeterliki we salametlikini qoghdash üchün qandaq tedbirlerni alghanliqi heqqide héchqandaq melumat yoq. Shunga gu'angjuda bayqalghan ikki yuqum gumandarining, yurt teweliki melum derijide aydinglashqan bolsimu, emma ularning tajsiman wirustin qandaq shara'it astida yuqumlan'ghanliqi téxiche, melum emes.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet