Anarköldiki “Wenxé” kiyim-kéchek fabrikisi 100 etrapida Uyghur qizini mejburiy emgekke salmaqta

Igilishimizche, “Wenxé” kiyim-kéchek shirkitining maralbéshidiki kiyim tikish fabrikasida köpinchisi qizlardin teshkillen'gen 100 etrapida ishchi birqanche yildin béri mejburiy emgekke sélinmaqta. Teweliktiki kent mes'uli we mezkur fabrikaning amanliq xadimining pash qilishiche, ishchilar künige 14 sa'et etrapida ishqa sélin'ghan we ayliq mu'ashi üchün aran 300 yüen etrapida heq bérilgen. Ularning ishtin waz kéchishige, hetta ishtin chüshüp öyige qaytishighimu ruxset qilinmighan.

Tordiki matériyallarda tonushturulushiche, “Wenxé” kiyim-kéchek fabrikasi 2014‏-yili maralbéshining anarkül yézisida qurulghan. Shirketning qanuniy wekili yang yüching isimlik birsi bolup, bu shirketning fabrikasi mektep formisi qatarliq kiyim-kéchek türlirini ishlepchiqridiken. Tor uchurlirida bu shirketning 1milyon 200 ming yüen meblighi barliqi qeyt qilin'ghan, emma jem'iy qanchilik ishchi-xizmetchisi barliqi yézilmighan. Teweliktiki yerlik xadimlardin birining közitishiche, zawutta 100 etrapida ishchi-xizmetchi bar bolup, buning köpinchisi toy qilmighan qizlardin teshkillen'gen Uyghur ishchilar iken.

Uning diyishiche, bu zawuttiki ishchilar etigen sa'et7 din kech sa'et 11 ge qeder, künige jem'iy 14 sa'ettin 7 kün ishleydiken. Ariliqta ulargha chüshlük we kechlik tamaq üchün ikki sa'etla dem élish waqti bérilidiken. Mezkur xadimning bayan qilishiche, jiddiy bir éhtiyaj bolmighuche, bu ishchilarning öyige qaytishigha, hetta fabrika qorusidin sirtqa chiqishigha ruxset bérilmeydiken. Mezkur fabrikaning éléktronluq échilip-yépilidighan derwazisida mexsus bir közetchi xadim bar bolup, u ishchilarning bixterlikini qoghdash emes, belki ularning fabrikadin qéchip kétishining aldini élish üchün wezipilen'gen iken.

Téléfonimizni qobul qilghan bu fabrikaning mezkur bixterlik xadimi bu fabrikadiki ishchilarning yéshining 16 yashtin 45 yash arisida ikenliki, köpinchisining toy qilmighan qizlar ikenliki, künige 3 ismina, yeni 3 nöwet ishleydighanliqi, künlük ish sa'itining 14 sa'ettin éship kétidighanliqini delillidi.

Yuqiriqi kent mes'ulining bayan qilishiche, bu fabrikadiki Uyghur ishchilarning ayliq mu'ashi 300 yüendin ashmaydiken. Uning bashqurush tewelikidiki bir a'ilining qizi mezkur fabirikada bir yilda 2200 yüen mu'ash alghan bolup, ayliqi aran 180 yüendin toghra kelgen. Mezkur xadim, fabrikadiki ishchilarni “Mu'ellim” dep atalghan tursun'gül memtimin bilen bir bixeterlik xadimining bashquridighanliqini, bu ikkisini bolsa xitay ölkiliridin kelgen bir jüp xitay er-ayalning bashquridighanliqini tilgha aldi.

Tordiki uchurlarda tonushturushiche, “Wenxé” shirkitining we qanuniy wekili yang yüchingning eslide xénen jéngjuluq bir karaxinichi ikenliki, uning shirkitining kiyim layihelesh, pishshiqlap ishlesh we sétishtin bashqa yene dézinfiksiye boyumliri, maska qatarliq tibbiy buyumlarni sétish, tashqi soda bilen shughullinish qatarliq soda we mulazimet qilishqa hoquqluq ikenliki qeyt qilin'ghan. Uning soda-mulazimet da'irisining bu qeder kengliki we asasliq xéridarlirining dölet igiligiki qurulushlar ikenliki, yang yüchingning rayondiki hökümet emeldarliri bilen qoyuq alaqisidin bisharet bermekte.