Amérika tamozhna we chégra qoghdash idarisi ijra'iye yardemchi diréktori brénda simis xanim so'allirimizgha jawab berdi (2)

Muxbirimiz gülchéhre
2020-07-10
Élxet
Pikir
Share
Print
Uyghur rayonidiki xitay lagér tutqunlirining chachliri we yaki lagérdikilerni mejburiy emgekke sélish arqiliq ishlep chiqirilghan yalghan chach. 2020-Yili 1-iyul, nyu-york.
Uyghur rayonidiki xitay lagér tutqunlirining chachliri we yaki lagérdikilerni mejburiy emgekke sélish arqiliq ishlep chiqirilghan yalghan chach. 2020-Yili 1-iyul, nyu-york.
AP

Amérika tarmaqliri Uyghur diyaridin éksport qilin'ghan barliq mehsulatlargha nishanliq tekshürüshni kücheytidu

Amérika tamozhna we chégra qoghdash idarisi-1 iyul nyu-york portida lop nahiyesi "Méyshin chach mehsulatliri cheklik shirkiti" ishlepchiqarghan jem'iy 13 tonna, 800 ming amérika dolliri qimmitidiki adem chéchi qoshulghan mehsulatlarni qolgha chüshürdi. Amérika tamozhna we chégra qoghdash idarisi ijra'iye yardemchi diréktori brénda simis xanim muxbirimiz gülchéhrening ziyaritini qobul qilip, bu chachlar üstidin laburatori'iyelik tekshürüshi élip bérilidighanliqini bildürgen. Nöwette mezkur mexsus ziyaret xatirisining dawami diqqtinglarda bolsun. 

So'al: brénda simis xanim, amérika tamozhna we chégra qoghdash idarisi qolgha chüshürgen bu chachlarning asasen méyshin markiliq chach buyumliri ikenliki we bu chachlar üstidin d n a tekshürüshini öz ichige alghan laboratoriyelik tekshürüshi élip baridighanliqini éytip öttingiz. 

Kéyinki qedemde Uyghur diyaridin import qilin'ghan chachtin bashqa yene qaysi xil mehsulatlar nishanlinidu?

Jawab: bilginingizdek, biz ilgiri 2019-yili séntebirde shinjangda ishlepchiqirilghan mehsulatqa munasiwetlik ayrim-ayrim 3 tutup qélish buyruqi chiqarghaniduq. Bu buyruqlarning tunjisi 2019-yili séntebirde, kiyim-kécheklerge munasiwetlik idi. Bayqishimizgha qarighanda, adettiki ishlepchiqirish sana'et mehsulatliri, yén tennerxi töwen kiyim-kéchek we éléktronluq buyumlar küp salmaqni igileydu. Bezi yémek-ichmek, qismen déhqanchiliq we shinjanggha biwasite baghlinishi bolmighan kan mehsulatliri qatarliqlar köprek uchraydu. 

Mushu sahelerde dawamliq qulluq emgekke munasiwetlik mesililerni uchritimiz. Shunga shinjanggha munasiwetlik bu sahelerni izchil közitimiz. Xitayning bu rayonidin éksport qilinidighan mehsulatlarning yenimu ilgiriligen halda xeter peyda qilishining aldini élish üchün nuqtiliq tekshürüshni dawamlashturimiz. 

So'al: tetqiqatchilardin doktor adri'an zénz shinjangdin kelgen barliq mehsulatlarning mejburiy emgek bilen ishlen'genlikini, shunga amérikaning shinjangdin her qandaq nersini import qilishni cheklishi kéreklikini otturigha qoydi. Buninggha qandaq qaraysiz?

Jawab: bizning qanun ijra qilish orunlirimiz bizdin mundaq ikki ishta tolimu konkrét bolushimizni shert qilidu. Buning biri qulluq emgek bilen ishlen'gen her qandaq mehsulatlarning amérikagha import qilinishi, yaki import qilinish éhtimalliqi bolghan bu xildiki mehsulatlar üstidin tutup qélish buyruqi chiqirish üchün u mehsulatlar portqa kelgen haman bu mehsulatlarning teminlesh zenjirini éniqlap chiqish. Bizning qanun organlirimiz bizdin bu yükler heqqide teminligen matériyallirimizning éniq bolushini, seweblerning pütünley qayil qilarliq bolmisimu, tutup qélish ölchemlirige uyghun kélishini telep qilidu. 

So'al: undaqta Uyghur diyarida qulluq emgikide ishlen'gen éksport buyumlirining amérikagha kirishining aldini élishta, amérika tamozhna we chégra qoghdash tarmaqlirining qaysi xildiki pakit yaki uchurlarning qimmiti bolidu ?

Jawab: adette, mejburiy emgek heqqide tekshürüsh élip barghinimizda, eng toghra uchurgha amérika tamozhna we chégra qoghdash xadimliri ishlepchiqirish orunlirigha qarita biwasite élip barghan tekshürüsh netijisidin kelgen bolidu. Uningdin sirt, mejburiy emgek shertige chüshidighan weziyetke qatnashqan shexslerning guwahliqimu muhim rol oynaydu. Emma xitaydiki bu ehwalgha kelgende xadimlirimiz biwasite Uyghur rayondiki zawut-karxanilarni biwasite tekshürüsh imkaniyiti bolmighanliqi üchün, biz kishilik hoquq organliri hökümetsiz teshkilatlar bu heqte toplighan guwahliqlargha tayinimiz hemde biz yene tekshürüsh axbarati hemde shinjanggha munasiwetlik siyaset belgilesh yaki wekillik qilish nopuzigha ige kishiler ashkariliwetken uchurlirighimu tayinimiz. 

Bu yerde simis xanim bir muhim nuqtini tekitlep ötüshni toghra tapqanliqini bildürüp mundaq dédi:

"Bir nersini tekitlishim zörürki, biz amérika soda jem'iyetlirining bu mesilige arilishishini xalaymiz. Biz yene, amérikagha mal yollaydighan hemmeylenning öz mejburiyni toluq jari qilishini xalaymiz. Biz ularning bu mes'uliyitini tonup yétishni we jiddiy mu'amile qilishini ümid qilimiz.

Qanun ijra qilish organlirimizning diqqiti amérikagha yük toshup kélidighan shirketlerningmu özliri amérikagha élip kéliwatqan yüklerning mejburiy emgektin mustesna ikenlikini kapaletke ige qilishigha merkezleshken.

Bizning xizmitimiz yene, bu shirketlerning mehsulatlar biwasite bolmighan teqdirdimu, teminlesh zenjirining üchinchi, tötinchi nuqtilirida bolsimu mejburiy emgekke chétilip qélish hadisisi körülüshke bolmaydighanliqidin ibaret shertlirimizni toluq chüshinishini kapaletke ige qilish.

Ikkinchi tekitleydighinim, egerde shexs, teshkilat yaki organlarda amérika teminlesh zenjiridiki mehsulatlarning mejburiy emgekke chétilidighanliqigha a'it uchurlar bolsa, bularni bizge yollishini xushalliq bilen qarishi alimiz. Bu uchurlarni bizge biwasite yetküzsimu yaki tor bétimizdiki munasiwetlik uchur yetküzüsh qanalliri arqiliq yetküzsimu bolidu. Bu mesilige taqabil turush hemmeylenning ortaq mes'uliyiti".

Muxbir: simis xanim sizning erkin asiya radiyomiz ziyaritini qobul qilghiningizgha teshekkür bildürimen. 

Simis xanim: menmu siz we erkin asiya radiyosining bu mesilide köpligen xewerlerni delillep chiqiwatqininglarni bilimiz. Bu biz nuqtiliq diqqet qiliwatqan mesilining biri shundaqla uzundin buyan silerning bizni bu mesilide muhim pakitliq uchurlar bilen teminlep kéliwatqanliqinglargha alahide teshekkür bildürimen. 

Amérika tamozhna we chégra qoghdash idarisi17-iyun, pütün portlargha "Xoten xawlin chach buyumliri shirkiti" ishlep chiqarghan import mehsulatlarni tutup qélish buyruqi chüshürgenidi. 1-Iyul küni xoten loptiki "Méyshin chach buyumliri shirkiti" de ishlen'gen 13 tonna kélidighan adem chéchini nyu-york portida qolgha chüshürüp musadire qildi. 

Mejburiy emgek bedilige ishlepchiqirilghanliqi seweblik tutup qélin'ghan "Méyshin" chach buyumliri üstidin, amérika tarmaqlirining d n a ni öz ichige alghan laboratoriyelik tekshürüsh élip baridighanliqi melum.

Toluq bet