Amérika Uyghur élidiki mejburiy emgekke baghlan'ghan quyash énérgiye taxtilirini tutushqa bashlighan

Amérika tamozhna da'iriliri Uyghur élidiki mejburiy emgekke baghlan'ghan xitay shirketlirining quyash énérgiye taxtiliri importini tutup qélishqa bashlighan.

“Washin'gton pochtisi” ning xewer qilishiche, amérika tamozhna emeldarliri yéqinda amérika tamozhna we chégra qoghdash idarisi teripidin chirqirighan cheklesh buyruqigha asasen xitaydin kélidighan bir nechche shirketning quyash énérgiye taxtisini chekleshni yolgha qoyghan.

Xewerde munasiwetlik kespiy xadimlar we analizchilarning bayanliridin neqil élip körsitishiche, yéqinqi bir nechche hepte ichide az dégende üch xitay shirkitining quyash énérgiye taxtiliri nishan qilin'ghan iken.

Amérika tamozhna we chégra qoghdash idarisining bayanatchisi “Washin'gton pochtisi” gha yollighan éléktronluq xette import qilishni cheklesh buyruqigha asasen öz idarisining bir qatar shirkitining quyash énérgiye taxtisi mehsulatlirini tutup qalghanliqini delilligen.

Amérika tamozhna we chégra qoghdash idarisi bu yil iyunda quyash énérgiyesi taxtisida ishlitilidighan xam eshya ishlepchiqiridighan xoshin krémniy shirkitige cheklime qoyghan. Ular eyni chaghda, Uyghur rayonida zawuti bar xoshin shirkitining mejburiy emgek ishlitidighanliqigha da'ir uchurlar barliqini bildürgen.

Xewerge qarighanda, “Washin'gton pochtisi” géziti we kishilik hoquq tetqiqatchiliri öz tetqiqatlirigha asasen xoshin shirkitining Uyghur we bashqa az sanliq milletlerni nishan qilghan mejburiy emgek programmilirigha chétilidighanliqi delillen'gen.

Melum bolushiche, xitay shirketliri yer shari quyash énérgiye sahesini monopol qiliwalghan bolup, bu shirketlerning nurghunliri Uyghur élige jaylashqan xoshinning xam eshyasini ishlitidiken.

Amérika tamozhna we chégra qoghdash idarisini nazaret qilidighan amérika ana weten xewpsizlik idarisining bashliqi aléxandro mayorkas bu yil iyunda chiqirilghan import qilishni cheklesh qararini élan qilish munasiwiti bilen qilghan sözide, amérikining qayta hasil bolidighan énérgiyege qurulushigha alahide ehmiyet béridighanliqini éytqan we: “Emma, qeyerde mewjut bolushidin qet'iy nezer, biz mejburiy emgekni yiltizidin qomurup tashlaymiz, bu intayin muhim,” dégen idi.