Сичүәндики бир ширкәт: “қәшқәрдин 3000 дин артуқ ишчи йөткидуқ, һәр биридин һәр айда 600 йүән һәқ алимиз”
2021.10.25
Йеқинда таратқуларда тарқалған хитайчә бир еланда, уйғурлардин оттура техником вә алий мәктәп пүттүрүш алдида турған вә сиртқа чиқип ишләйдиған 2000 дин артуқ әмгәк күчи барлиқи билдүрүлгән. Бу еланда йәнә еһтияҗлиқ кархана башлиқлириниң алақилишиши үчүн бир телефон номури қалдурулған. Мухбиримизниң ениқлашлири давамида, мәзкур еланни сичүән өлкисидики бир әмгәк күчи йөткәш ширкитиниң чиқарғанлиқи вә мәзкур ширкәтниң йеқинда қәшқәрдин 3000 дин артуқ әмгәк күчини йөткәп, хитайдики икки орунға сатқанлиқи ашкариланди.
Хитайчә чиқирилған мәзкур еланда, уйғур районида оқуш пүттүрүш алдидики яшлардин 2000д ин артуқ әмгәк күчи барлиқи, буларниң сиртта ишләшкә, йәни хитай өлкилиридә ишләшкә тәйяр икәнлики билдүрүлүп, еһтияҗлиқ карханичиларниң алақилишиши үчүн бир телефон номури қалдурулған. Әмма еланда бу еланниң саһиби билдүрүлмигән. Биз мәзкур номурға телефн қилғинимизда, бу еланни чиқарғучиниң сичүән өлкисиниң ляңшйән областидики бир әмгәк күчи йөткәш ширкити икәнлики ашкариланди.
Биз мәзкур ширкәт хадимдин еланда дейилгән әмгәк күчлириниң һелиму бар яки йоқлуқини соридуқ. Бу хадим еланда дейилгән әмгәк күчлириниң бу йил 6 -айда сетилип (йөткилип) болғанлиқини ашкарилиди. Биз бу йөткәлгән кишиләр саниниң қанчилик икәнликини сориғинимизда, у “үч миңдин артуқ” дәп җаваб бәрди. Биз бу сетилип болған әмгәк күчлириниң кимләр икәнликини сориғинимизда, у уларниң һәммисиниң аз санлиқ милләт икәнликини тилға алди. Биз “улар қәйәрдин?” дәп сориғинимизда у: “һәммиси қәшқәрдин, һәммисила уйғур” дәп җаваб бәрди.
Биз қәшқәрдики алақидар органларға телефон қилип, қәшқәрдин йөткәлгән бу әмгәк күчлири һәққидә мәлумат роридуқ. Алақидархадимлар бу һәқтә мәлумат беришни рәт қилди.
Биз сичүәндики мәзкур ширкәт хадимдин қәшқәрдин йөткәлгән 3000 дин артуқ кишиниң нәгә йөткәлгәнликини соридуқ. Мәзкур хадим, уларниң нәнҗиңдики икки орунға йөткәлгәнликини ашкарилиди. Мәзку хадим йәнә соаллиримизға җавабән йөткәлгән һәр бир ишчиға 2000 йүәндин муаш берилидиғанлиқи, буларниң һәр биридин мәзкур ширкәтниң һәр айда 600 йүз йүәндин һәқ алидиғанлиқини баян қилди.
Биз илгири қәшқәргә қарита елип барған ениқлашлиримиз давамида, қәшқәр айрродромидики лагеридин қоюп берилгән әркин һашим қатарлиқ 9 нәпәр сабиқ тутқунниң бир йүк тошуш ширкитидә һаммаллиқ қилидиғанлиқи, уларниң айлиқ муашиниң 2200 йүән икәнлики, буниң 900 йүәнини лагер хадимлириниң тутуп қалидиғанлиқи мәлум болған иди.
Сичүәндики мәзку хадим, қәшқәрдин нәнҗиңға йөткәлгән бу 3 миң кишиниң қәшқәрдики мәктәптин яки җәмийәттин вә яки лагердин йөткигәнлики һәққидә мәлумат бәрмиди.