“Uyghur mejburiy emgikining aldini élish qanun layihesi” we amérikadiki Uyghur teshkilatlirining tirishchanliqi

Muxbirimiz méhriban
2021-12-09
Share
“Uyghur mejburiy emgikining aldini élish qanun layihesi” we amérikadiki Uyghur teshkilatlirining tirishchanliqi “Uyghur mejburiy emgikining aldini élish qanun layihesi” amérika awam palatasida mutleq yoquri awaz bilen maqulluqtin ötti. 2021-Yili 8-dékabir. Washin'gton d.S., amérika.
c-span.org

Amérika awam palatasining re'isi nensiy pélosi xanim 6-dékabir küni “Uyghur mejburiy emgikining aldini élish qanun layihesi” ning awazgha qoyulidighanliqini bildürgen idi. 8-Dékabir küni Uyghurlargha munasiwetlik bu qanun layihesi amérika awam palatasida awazgha qoyulup, mutleq yoquri awaz bilen maqulluqtin ötti.

Xelq'ara taratqularning ilgiri sürüshiche, “Uyghur mejburiy emgikining aldini élish qanun layihesi” ning amérika awam palatasida maqulluqtin ötüshi, amérika hökümitining Uyghur diyaridiki zulum we basturushlargha chétishliq xitay shirketlirini “Qara tizimlik” ke élishini ishqa ashuridiken. Shundaqla rayonda Uyghurlarning mejburiy emgiki bedilige ishlen'gen herqandaq mehsulatning amérika tamozhnasidin kirishini chekliyeleydiken.

Mezkur qanun layihesi amérika kéngesh palatasida 2020-yili mutleq üstün awaz bilen maqullan'ghan idi. 2021-Yili 8-dékabir küni mezkur qanun layihesi awam palatasida awazgha qoyulup, 428 neper awam palata ezasining birdek qollap bélet tashlishi, peqet birla kishining qarshi turup bélet tashlishi netijiside muweppeqiyetlik halda maqullandi. Nöwette bu qanun layihesi amérika prézidéntining ish üstilige sunulup, prézidént jow baydénning imzasi qoyulghandin kéyin, resmiy qanun'gha aylinidiken.

Bu ehwal xitay hökümitini qattiq bi'aram qilghan. Xitay da'iriliri yéqindin buyan, bayanat élan qilish, axibarat élan qilish yighinliri échish we hökümet taratqulirida tinimsiz siyasiy teshwiqat élip bérish arqiliq “Uyghur diyarida mejburiy emgekning yoqliqi” heqqide jar sélip kelmekte. Halbuki, amérika bashchiliqidiki gherb démokratik döletliride pa'aliyet élip bériwatqan Uyghur teshkilatliri we Uyghur pa'aliyetchiliri, xitay hökümitining bu xil teshwiqat jéngini “Yalghanchiliq” bilen eyiblimekte.

Ular “Uyghur mejburiy emgikining aldini élish qanun layihesi” ning amérika dölet mejliside tézzraq maqullinishini qolgha keltürüsh üchün eng zor tirishchanliqlarni körsitip kelgenlikini ilgiri sürdi.

Amérikadiki Uyghur kishilik hoquq qurulushining diréktori, dunya Uyghur qurultiyi ijra'iye kométitining re'isi ömer qanat ependi ziyaritimizni qobul qilip, “Uyghur mejburiy emgikining aldini élish qanun layihesi” ning otturigha qoyulushi we uning dölet mejlisige sunulush jeryani heqqide melumat berdi. U yene bu qanun layihesining xitay hökümitining bu qeder naraziliqini qozghashtiki sewebler heqqidimu toxtilip ötti.

Ömer qanat ependining bildürüshiche, mezkur qanun layihesi resmiy maqulluqtin ötüp, resmi qanun'gha aylan'ghinida, xitayning janijan iqtisadiy menpe'etige ejellik rerbe bolidiken.

Ömer qanat ependi yene amérikadiki Uyghur teshkilatlirining bu qanun layihesining amérika dölet mejlisige yollinishi üchün üzlüksiz tirishchanliq körsitip kelgenlikini bildürdi.

8-Dékabir küni mezkur qanun layihesi amérika awam palatasida awazgha qoyulushtin ilgiri, Uyghur amérika birleshmisining bash katipi elfidar éltebir xanimmu ziyaritimizni qobul qildi.

Elfidar xanim ikki yildin buyan, Uyghur amérika birleshmisining amérikadiki Uyghur kishilik hoquq qurulushi we “Uyghur herkiti” qatarliq teshkilatlar bilen birlikte amérikadiki parlamént ezaliri bilen birmu-bir körüshüp chiqqanliqi, ularni mezkur qanun layihesige awaz bérishke dewet qilghanliqi, lagér shahitliri we amérikadiki Uyghur jama'itini teshkillep namayish qilish arqiliq amérika dölet mejlisi ezalirini bu qanun layihesini tézraq maqullashqa tesir körsetkenlikini bayan qildi.

Lagér shahitliridin tursun'ay ziyawudun xanim bilen gülzire awulqan xanim, amérika Uyghur birleshmisi qatarliq Uyghur teshkilatliri teshkilligen namayishlargha aktipliq bilen qatniship, “Uyghur mejburiy emgikining aldini élish qanun layihesi” ning maqullinishini köp qétim telep qilghan idi.

Bügün tursunay ziyawudun xanim bilen gülzire xanimlar bu heqte mexsus ziyaritimizni qobul qildi.

Tursunay xanim, özining néme üchün bu xil pa'aliyetlerge aktip qatniship kelgenlikini sewebini anglatti. U Uyghur diyarida yüz bériwatqan lagérlargha qamash we mejburiy emgek mesiliside amérikidek démokratiyeni we kishilik hoquqni muqeddes bilidighan démokratik döletning bashlamchiliq bilen awaz chiqirishini, qanuniy yol arqiliq xitayning Uyghur diyarida yürgüziwatqan mejburiy emgikini tusushni ümid qilghanliqini bildürdi.

Gülzire xanim özining bu xil mejburiy emgekni öz béshidin kechürgen bir tirik shahit ikenlikini, Uyghur diyaridiki mejburiy emgekning eng qehbih, eng wehshiy wastiler arqiliq ijra qiliniwatqanliqini bildürdi.

Amérikidiki “Uyghur herkiti” teshkilatining bashliqi roshen abbas xanimmu ziyaritimizni qobul qilip, “Uyghur mejburiy emgikining aldini élish qanun layihesi” ning awam palatasida awazgha qoyulushini qizghin qarshi alidighanliqini bildürdi. U: “Bu heriket amérikaning Uyghur qirghinchiliqigha taqabil turushtiki bashlamchiliq ornini yene bir qétim namayen qildi!” dédi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet